શું બિગ બોસ સ્ક્રિપ્ટેડ હોય છે? BB 16ની આ કન્ટેસ્ટન્ટે કર્યો ઘરના અંદરના રહસ્યોનો ખુલાસો

ફેમસ ટીવી એક્ટ્રેસ અને 'બિગ બોસ 16'ની સ્પર્ધક ટીના દત્તા આ શો પછી પણ સતત સમાચારોમાં રહે છે. તાજેતરમાં, અભિનેત્રીએ ડિજિટલ કોમેન્ટરી પોડકાસ્ટમાં 'બિગ બોસ' અને તેની કારકિર્દી વિશે ઘણી વાત કરી છે. તેણે એ પણ ખુલાસો કર્યો છે કે, બિગ બોસ પછી, સ્પર્ધકો સાથે તેની મિત્રતા હજુ પણ અકબંધ છે. અભિનેત્રીએ જણાવ્યું કે, તેને ટીવી શો 'ઉતરન' માટે કેવી રીતે કાસ્ટ કરવામાં આવી હતી.

આ રીતે મળ્યું 'ઉતરન'માં કામ

પોડકાસ્ટમાં ટીનાએ જણાવ્યું કે, તે દિવસોમાં તે બાલાજી ટેલિફિલ્મ્સના ટીવી શો 'કોઈ આને કો હૈ'માં કામ કરતી હતી. તેનું શૂટિંગ પૂરું કર્યા પછી, તે કોલકાતા પરત આવી અને 2 અન્ય બંગાળી શો માટે કામ કરવાનું શરૂ કર્યું. આ દરમિયાન એક દિવસ ટીનાને 'ઉતરન'ના મેકર્સનો ફોન આવ્યો. તેમણે અભિનેત્રીને ઓડિશન માટે આવવા કહ્યું. જોકે, તે સમયે ફ્લાઇટના ભાડા ઊંચા હોવાને કારણે ટીના કોલકાતાથી મુંબઈ વારંવાર મુસાફરી કરી શકતી ન હતી, તેથી તેણે ઓડિશન માટે મુંબઈ આવવાની ના પાડી. આ પછી નિર્માતાઓએ 'ઉતરન' માટે ટીનાનું ઓડિશન કોલકાતામાં જ લીધું હતું.

5 દિવસમાં કોલ આવ્યો

અભિનેત્રીએ વધુમાં જણાવ્યું કે, ઓડિશનના 5 દિવસ પછી જ તેને 'ઉતરન'ની ટીમ તરફથી ફોન આવ્યો કે તેને કાસ્ટ કરવામાં આવી છે. ટીનાએ એ પણ ખુલાસો કર્યો કે, અગાઉ આ શોમાં તેની ભૂમિકા માટે અન્ય કોઈને કાસ્ટ કરવામાં આવી હતી, પરંતુ તે અભિનેત્રીએ કરાર તોડીને ઘણા ઈન્ટરવ્યૂ આપ્યા હતા. આવી સ્થિતિમાં 'ઉતરન'ની 'ઇચ્છા'નું પાત્ર ટીના પાસે આવ્યું.

શો સ્ક્રિપ્ટેડ નથી

આ જ પોડકાસ્ટમાં ટીનાને 'બિગ બોસ'ની સ્ક્રિપ્ટ અંગે પણ સવાલો પૂછવામાં આવ્યા હતા. અભિનેત્રીએ કહ્યું કે, આ શો સ્ક્રિપ્ટેડ નથી, પરંતુ તમારી સામે સંજોગો એવા બનાવવામાં આવે છે કે, તમારી વચ્ચે ઝઘડા થશે. તેણે કહ્યું કે, તમને એવા કામ આપવામાં આવે છે જેના કારણે તમે ઝઘડો કરવા લાગો છો. અભિનેત્રીએ કહ્યું, 'ધારો કે બે લોકો સારા મિત્રો છે, તો તેમને ટાસ્કમાં અલગ-અલગ ટીમમાં મૂકવામાં આવશે. આવી સ્થિતિમાં ચોક્કસ લડાઈ થશે. ટીનાએ કહ્યું કે 'બિગ બોસ'ના ઘરમાં તમને તમારી દરેક એક્ટિવિટી પર જજ કરવામાં આવે છે.

કયા લોકોની ફ્રેન્ડશિપ ટકી રહે છે?

શો પછી ફ્રેન્ડશિપના પ્રશ્ન પર, અભિનેત્રીએ કહ્યું કે, જે લોકો કેમેરા માટે ફ્રેન્ડ્સ નથી બનતા તેમની ફ્રેન્ડશિપ ટકી રહે છે. અભિનેત્રીએ જણાવ્યું કે, શોમાં પ્રિયંકા ચહર ચૌધરી સાથે તેની ફ્રેન્ડશિપ હજુ પણ અકબંધ છે. ટીનાએ કહ્યું કે, તે અને પ્રિયંકા શોના અંતના થોડા સમય પહેલા મિત્ર બની ગયા હતા અને આજે પણ સારા મિત્રો છે. આ સિવાય ટીના અંકિતા અને અર્ચના ગૌતમની પણ ફ્રેન્ડ છે.