દુઆ લિપાના કોન્સર્ટમાં શાહરૂખ ખાનને મળ્યો ક્રેડિટ, તો ગુસ્સે થયો આ સિંગરનો પુત્ર

બ્રિટિશ સિંગર દુઆ લિપા આ દિવસોમાં ભારતમાં ખૂબ જ ચર્ચામાં છે. તેનો કોન્સર્ટ 30 નવેમ્બરે મુંબઈમાં યોજાયો હતો. સામાન્ય લોકોની સાથે ઘણા ભારતીય ફિલ્મ સ્ટાર્સ પણ તેના કોન્સર્ટમાં સામેલ થયા હતા. તે દરમિયાન ફેન્સની ભારે ભીડ જોવા મળી હતી અને બધાએ તેના પરફોર્મન્સનો આનંદ માણ્યો હતો. આ દરમિયાન તેણે શાહરૂખ ખાનની ફિલ્મનું એક ગીત ગાયું હતું, પરંતુ તે ગીતનો ક્રેડિટ ન મળવાને કારણે એક ભારતીય સિંગરનો પુત્ર ગુસ્સે થઈ ગયો હતો.

આ પણ વાંચો: વિક્રાંત મેસીએ એક્ટિંગમાંથી નિવૃત્તિની કરી જાહેરાત, પોસ્ટ શેર કરી જણાવ્યું

તે સિંગર બીજું કોઈ નહીં પણ અભિજીત ભટ્ટાચાર્ય છે, જેણે પોતાની કારકિર્દીમાં 6 હજારથી વધુ ગીતો ગાયા છે. તેના પુત્રએ સોશિયલ મીડિયા પર એક લાંબી પોસ્ટ લખીને પોતાનો ગુસ્સો વ્યક્ત કર્યો છે અને પૂછ્યું છે કે શા માટે હંમેશા માત્ર એક્ટરની જ વાત કરવામાં આવે છે. 

દુઆ લિપાના કોન્સર્ટમાં શું થયું?

કોન્સર્ટમાં, દુઆ લિપાએ શાહરૂખ ખાનની ફિલ્મ 'બાદશાહ'નું પ્રખ્યાત ગીત 'વો લડકી જો સબસે અલગ હૈ' ગાયું હતું. આ પછી તે સમયનો વીડિયો સોશિયલ મીડિયા પર વાયરલ થયો હતો. દરેક જગ્યાએ શાહરૂખનો ઉલ્લેખ થવા લાગ્યો. તેના ફેન્સ ખૂબ જ ઉત્સાહિત થઈ ગયા. ફેન્સે વીડિયો શેર કરી એવું કહેવાનું શરૂ કર્યું કે દુઆ લિપાએ શાહરૂખ ખાનનું ગીત ગાયું.

અભિજીત ભટ્ટાચાર્યના પુત્રએ શું લખ્યું?

શાહરૂખની ફિલ્મનું આ ગીત અભિજીત ભટ્ટાચાર્યએ ગાયું છે. જોકે, દુઆ લિપાના કોન્સર્ટ પછી જ્યારે ક્યાંય પણ તેનો ઉલ્લેખ ન થયો ત્યારે સિંગરનો પુત્ર જય ભટ્ટાચાર્ય ગુસ્સે થઈ ગયો. તેણે ઇન્સ્ટાગ્રામ સ્ટોરી પર લખ્યું, “સમસ્યા એ છે કે કોઈ આ વિશે વાત કરતું નથી. 'વો લડકી…' અભિજીતે ગાયું. કમનસીબી એ છે કે કોઈપણ ન્યુઝ આઉટલેટ્સ અથવા ઇન્સ્ટાગ્રામ પેજે આ ગીતના સિંગરનો ઉલ્લેખ નથી કર્યો. આ દેશમાં શા માટે હંમેશા એક્ટર વિશે જ વાત થાય છે?"

'હું શાહરૂખ ખાનનો ફેન છું...'

તેણે આગળ લખ્યું, "મને ખાતરી છે કે જ્યારે દુઆએ આ ગીત સાંભળ્યું, ત્યારે તેણે તે વ્યક્તિની પ્રશંસા કરી હશે જેણે તેને ગાયું હતું. અને તે ગાનાર વ્યક્તિ અમિતાભ ભટ્ટાચાર્ય છે, શાહરૂખ ખાન નહીં. અને આ ગીત અનુ મલિકે કમ્પોઝ કર્યું છે." તેણે પોસ્ટમાં એમ પણ લખ્યું કે, "આ શાહરૂખ ખાન વિશે નથી, હું તેનો સૌથી મોટો ફેન છું. આ આપણા દર્શકો અને આપણી મીડિયા વિશે છે, જેઓ સિંગરને સપોર્ટ નથી કરતા."