રોહિત શેટ્ટીને ફરી મળી ધમકી, ફોન કરનારે 20 કરોડ રૂપિયા માંગ્યા; ચાર મહિના પહેલા ઘરની બહાર થયું હતું ફાયરીંગ
છેલ્લું અપડેટ : 28 Jun 2026
બોલીવુડના દિગ્દર્શક રોહિત શેટ્ટીને ફરી એક ખંડણીની માંગણી મળી છે. શનિવારે સવારે દિગ્દર્શકને ધમકીભર્યો ફોન આવ્યો હતો, જેમાં 20 કરોડ રૂપિયાની માંગણી કરવામાં આવી હતી. કોલમાં એમ પણ કહેવામાં આવ્યું હતું કે જો ખંડણીની રકમ ચૂકવવામાં નહીં આવે તો તેનું લક્ષ્ય તેનું ઘર નહીં, પરંતુ રોહિત શેટ્ટી પોતે હશે. આ સમાચારે ફરી એકવાર બોલિવૂડમાં ખળભળાટ મચાવ્યો છે.હજુ સુધી ફોન કરનારની ઓળખ નથી થઈ. મુંબઈ પોલીસ આ ધમકીભર્યા કોલ પાછળના ગુનેગારની તપાસ કરી રહી છે.
રોહિત શેટ્ટી પાસેથી 20 કરોડ રૂપિયાની ખંડણી માંગવામાં આવી
એક રિપોર્ટ અનુસાર, રોહિત શેટ્ટીને 20 કરોડ રૂપિયાની માંગણી કરતી ઓડિયો ક્લિપ દ્વારા ધમકી આપવામાં આવી હતી. આ ઘટના દિગ્દર્શકના જુહુ સ્થિત ઘરે ગોળીબાર થયાના થોડા મહિના પછી જ બની છે, જેના કારણે ફરી એકવાર ઇન્ડસ્ટ્રીમાં ખળભળાટ મચી ગયો છે. પોલીસના જણાવ્યા અનુસાર, રોહિત શેટ્ટીના સ્ટાફને શનિવારે સવારે એક ઓડિયો ક્લિપ મળી હતી. આશરે 90 સેકન્ડની આ ઓડિયો ક્લિપમાં જો તે માંગેલા પૈસા નહીં આપે તો તેને મારી નાખવાની ધમકી આપવામાં આવી છે.
બિશ્નોઈ ગેંગ સાથે લિંક્સ
ઓડિયો ક્લિપમાં લોરેન્સ બિશ્નોઈના નજીકના સાથી શુભમ લોનકરનો અવાજ હોવાનું કહેવાય છે. તે 2024માં બાબા સિદ્દીકીની હત્યા અને આ વર્ષની શરૂઆતમાં રોહિત શેટ્ટીના ઘરે ગોળીબાર માટે વોન્ટેડ છે. ઓડિયો ક્લિપ મળી આવ્યા બાદ, જુહુ પોલીસે કેસ નોંધીને તપાસ શરૂ કરી છે. અવાજની ઓળખ નક્કી કરવા માટે ઓડિયો ક્લિપને ફોરેન્સિક તપાસ માટે મોકલવામાં આવી છે.
ફેબ્રુઆરીમાં રોહિત શેટ્ટીના ઘરની બહાર ગોળીબાર
અગાઉ, 1 ફેબ્રુઆરીએ, મોડી રાત્રે રોહિત શેટ્ટીના ઘરની બહાર પાંચ રાઉન્ડ ગોળીબાર થયો હતો. જુહુના મેહમૂદ ચોક નજીક તેના ઘરે ગોળીબારથી આખો વિસ્તાર ગુંજી ઉઠ્યો હતો, ત્યારબાદ બિશ્નોઈ ગેંગે હુમલાની જવાબદારી સ્વીકારી હતી. ડિરેક્ટરના ઘરે ગોળીબાર કરનાર દીપક શર્માની પોલીસે આગ્રામાં ધરપકડ કરી હતી. તેણે સોશિયલ મીડિયા પર ખુલાસો કર્યો હતો કે તે બિશ્નોઈ ગેંગ સાથે જોડાયેલો હતો અને ગેંગથી પ્રભાવિત થઈને રોહિત શેટ્ટીના ઘરની બહાર ગોળીબાર કર્યો હતો.
રોહિત શેટ્ટીનું વર્ક ફ્રંટ
વર્ક ફ્રંટની વાત કરીએ તો, રોહિત શેટ્ટી હાલમાં તેના સ્ટંટ-આધારિત રિયાલિટી શો 'ખતરોં કે ખિલાડી 15' માટે સમાચારમાં છે, જેની રિલીઝ તારીખ તાજેતરમાં જાહેર કરવામાં આવી છે. આ સિઝનમાં ફરહાના ભટ્ટ, ઓરી, ગૌરવ ખન્ના, રૂબીના દિલૈક, કરણ વાહી, અવિનાશ મિશ્રા, જાસ્મીન ભસીન, રિત્વિક ધનજાની, અવિકા ગૌર, હર્ષ ગુજરાલ, શગુન શર્મા અને વિશાલ આદિત્ય સિંહ જેવી હસ્તીઓ જોવા મળશે. આ શો 25 જુલાઈથી દર શનિવાર અને રવિવારે રાત્રે 9 વાગ્યે કલર્સ ટીવી અને જિયો હોટસ્ટાર પર પ્રસારિત થશે.
