ઓસ્કાર વિજેતા Robert Redford નું 89 વર્ષની વયે અવસાન, જાણો તેમની નેટ વર્થ
છેલ્લું અપડેટ : 17 Sept 2025
ઓસ્કાર વિજેતા અભિનેતા અને ફિલ્મ નિર્માતા રોબર્ટ રેડફોર્ડનું 89 વર્ષની વયે અવસાન થયું છે. તેમના મૃત્યુનું કારણ હજુ સ્પષ્ટ થયું નથી. તેમણે તેમના કરિયરમાં અભિનય અને દિગ્દર્શન દ્વારા મનોરંજન જગતને ખૂબ પ્રભાવિત કર્યું હતું.
ઓસ્કાર વિજેતા અભિનેતા અને ફિલ્મ નિર્માતા રોબર્ટ રેડફોર્ડનું 89 વર્ષની વયે મંગળવારે સવારે તેમના યુટાહ સ્થિત ઘરે અવસાન થયું હતું. એક અહેવાલ મુજબ, તેમના મૃત્યુનું કારણ હજુ સામે આવ્યું નથી. પબ્લિસિટી કંપની રોજર્સ એન્ડ કોવાન PMKના મુખ્ય કાર્યકારી અધિકારી સિન્ડી બર્ગરે જણાવ્યું હતું કે ‘ધ સ્ટિંગ’ ફિલ્મના સ્ટાર રેડફોર્ડનું નિદ્રામાં જ અવસાન થયું હતું.
લગભગ સાત દાયકાઓ સુધી રોબર્ટ રેડફોર્ડે તેમના અભિનય અને દિગ્દર્શન દ્વારા મનોરંજન જગતને પ્રભાવિત કર્યું હતું. તેમણે 1950ના દાયકામાં પોતાની વ્યાવસાયિક કરિયરની શરૂઆત કરી હતી અને 1960માં ટેલિવિઝન સાથે જોડાયા હતા. તેમણે ‘આલ્ફ્રેડ હિચકોક પ્રેઝન્ટ્સ’ અને ‘ધ ટ્વાઈલાઈટ ઝોન’ જેવા શોમાં કામ કર્યું હતું. 1962માં ‘વોર હન્ટ’ ફિલ્મથી તેમણે ફિલ્મોમાં પ્રવેશ કર્યો હતો.
1973માં ‘ધ સ્ટિંગ’ ફિલ્મમાં શાનદાર અભિનય માટે તેમને શ્રેષ્ઠ અભિનેતા માટે ઓસ્કાર નોમિનેશન મળ્યું હતું. જોકે, તેમને પ્રથમ ઓસ્કાર 1980માં તેમની પ્રથમ દિગ્દર્શક ફિલ્મ ‘ઓર્ડિનરી પીપલ’ માટે શ્રેષ્ઠ દિગ્દર્શક તરીકે મળ્યો હતો.
રોબર્ટ રેડફોર્ડની નેટ વર્થ કેટલી છે?
2002માં સિનેમા જગતમાં યોગદાન માટે તેમને એકેડેમી ઓનરરી એવોર્ડ પણ આપવામાં આવ્યો હતો. સેલિબ્રિટી નેટ વર્થ અનુસાર, રોબર્ટ રેડફોર્ડે તેમની લાંબી કરિયરમાં લગભગ 200 મિલિયન ડોલર (આશરે 1,600 કરોડ રૂપિયા)ની સંપત્તિ બનાવી હતી.
રોબર્ટ રેડફોર્ડનું બાળપણ સાન્તા મોનિકા, કેલિફોર્નિયામાં વીત્યું હતું. એક અહેવાલ મુજબ, તેમના પિતાએ શરૂઆતના દિવસોમાં પરિવાર ચલાવવા માટે દૂધની સપ્લાયનું કામ કર્યું હતું, પછીથી તેઓ સ્ટાન્ડર્ડ ઓઈલ ઓફ કેલિફોર્નિયામાં એકાઉન્ટન્ટ બન્યા હતા. રેડફોર્ડની માતાનું અવસાન 1955માં થયું હતું, જ્યારે તેઓ માત્ર 18 વર્ષના હતા.
