VIDEO: પહેલી નજરનો પ્રેમ અને 5 વર્ષનો છુપો સંબંધ! જાણો મહેશ બાબુ અને નમ્રતા શિરોડકરની સિક્રેટ લવ સ્ટોરી!
છેલ્લું અપડેટ : 09 Aug 2026
મહેશ બાબુ સાઉથ સિનેમાના સૌથી દમદાર કલાકારોમાંથી એક છે અને તેમની ગણના સુપરસ્ટાર તરીકે થાય છે. તે જેટલા વ્યાવસાયિક જીવનમાં સફળ છે, તેટલા જ અંગત જીવનમાં પણ સફળ છે. એક્ટરે બોલિવૂડ અભિનેત્રી નમ્રતા શિરોડકર સાથે લગ્ન કર્યા છે. બંનેના લગ્નને ઘણા વર્ષો થઈ ચૂક્યા છે અને આજે પણ તેને સહુથી વધુ પસંદ કરવામાં આવતા કપલ્સમાંના એક છે. તેમની લવ સ્ટોરી કોઈ પરીકથાથી ઓછી નથી.
નમ્રતા શિરોડકરે લગ્ન પછી એક્ટિંગની દુનિયાને અલવિદા કહી દીધું હતું અને પોતાનું પૂરૂં ધ્યાન ફેમિલી લાઈફ પર કેન્દ્રિત કર્યું. તે સોશિયલ મીડિયા પર ખૂબ સક્રિય રહે છે અને અવારનવાર પરિવારની ખાસ ક્ષણો શેર કરે છે. મહેશ બાબુના જન્મદિવસે જાણીએ નમ્રતા શિરોડકર સાથે તેમની મુલાકાત કેવી રીતે થઈ અને આ લવ સ્ટોરી લગ્ન સુધી કેવી રીતે પહોંચી.
ફિલ્મના સેટ પર પહેલી મુલાકાત
નમ્રતા શિરોડકર અને મહેશ બાબુની લવ સ્ટોરી એક ફિલ્મના સેટ પરથી શરૂ થઈ હતી. બંનેએ ફિલ્મ 'વામસી'માં સાથે સ્ક્રીન શેર કરી હતી. શૂટિંગ દરમિયાન બંને વચ્ચે સારી મિત્રતા થઈ અને તે એકબીજાને પસંદ કરવા લાગ્યા. શૂટિંગ પૂરું થતાં સુધીમાં આ મિત્રતા પ્રેમમાં બદલાઈ ગઈ હતી.
પાંચ વર્ષ સુધી છુપાવ્યો સંબંધ
વર્ષ 2000માં આવેલી ફિલ્મ 'વામસી' એક તેલુગુ રોમેન્ટિક ડ્રામા હતી. બંનેએ લગભગ 5 વર્ષ સુધી એકબીજાને ડેટ કર્યા, પરંતુ પોતાના સંબંધને દુનિયાથી છુપાવી રાખ્યો હતો. આખરે, 10 ફેબ્રુઆરી 2005ના રોજ બંને લગ્નના બંધનમાં બંધાઈ ગયા હતાં.
મહેશ બાબુ અને નમ્રતાનો પરિવાર
લગ્નના આટલા વર્ષો પછી પણ તેમની વચ્ચે બોન્ડિંગ જબરદસ્ત છે. કપલને બે બાળકો છે - પુત્ર ગૌતમ ઘટ્ટામનેની અને પુત્રી સિતારા ઘટ્ટામનેની. ગૌતમ સોશિયલ મીડિયા અને લાઈમલાઈટથી થોડો દૂર રહે છે, જ્યારે પુત્રી સિતારા સોશિયલ મીડિયા પર ખૂબ ફેમસ છે. તે ડાન્સમાં નિપુણ છે અને જાણીતી જ્વેલરી બ્રાન્ડની જાહેરાતમાં પણ જોવા મળી ચૂકી છે.
મહેશ બાબુનું વર્ક ફ્રન્ટ
મહેશ બાબુની મોસ્ટ અવેટેડ ફિલ્મની વાત કરીએ તો, તે ડિરેક્ટર એસ. એસ. રાજામૌલીની ફિલ્મ 'વારાણસી'માં જોવા મળશે, જેમાં તેમની સાથે પ્રિયંકા ચોપડા પણ હશે. આ ફિલ્મ 7 એપ્રિલ 2027ના રોજ સિનેમા ઘરોમાં રિલીઝ થશે.
