'Avatar 3'માં ગોવિંદાએ કેમિયો કર્યો? કહ્યું-"મેં જ આ ફિલ્મનું નામ 'અવતાર' રાખ્યું હતું"
છેલ્લું અપડેટ : 23 Dec 2025
થોડા સમય પહેલા જ જેમ્સ કેમેરોનની 'અવતાર 3' (Avatar 3) રિલીઝ થઈ છે. ઘણા વર્ષો પહેલા ગોવિંદાએ એક ઇન્ટરવ્યુમાં જણાવ્યું હતું કે તેમને 'અવતાર' ફિલ્મની ઓફર મળી હતી અને તે સમયે જેમ્સ કેમેરોન કલાકારોના શરીર પર પેઇન્ટ કરવા માંગતા હતા. 'હીરો નંબર 1' અભિનેતાએ દાવો કર્યો હતો કે તેમણે આ ફિલ્મ ઠુકરાવી દીધી હતી.
કેટલાક ઇન્ટરનેટ યુઝર્સ 'અવતાર 3' જોતી વખતે થિયેટરમાંથી તસવીરો શેર કરી રહ્યા છે અને દાવો કરી રહ્યા છે કે ગોવિંદાએ ફિલ્મમાં કેમિયો કર્યો છે.
યુઝર્સે કરી રમુજી કોમેન્ટ્સ
તમે આ તસવીરોને સાચી માની લો તે પહેલા અમે તમને જણાવી દઈએ કે અભિનેતાએ ફિલ્મમાં કોઈ કેમિયો કર્યો નથી. આ તસવીરો કાં તો ફોટોશોપ કરવામાં આવી છે અથવા આર્ટિફિશિયલ ઇન્ટેલિજન્સ (AI) દ્વારા બનાવવામાં આવી છે. જોકે, ફેન્સ આ તસવીરો પર ખૂબ જ રમુજી પ્રતિક્રિયા આપી રહ્યા છે. એક યુઝરે લખ્યું, "જેમ્સ કેમેરોને ગોવિંદાને અવતાર 3 માં કેમિયો કરવા માટે મનાવી જ લીધા હશે." અન્ય એક યુઝરે લખ્યું, "ગોવિંદાએ આખરે જેમ્સ કેમેરોનની અવતાર ફિલ્મ માટે હા કહી દીધી."
ગોવિંદાએ વર્ષો પહેલા એક ઇન્ટરવ્યુમાં 'અવતાર' વિશે વાત કરી હતી. પરંતુ, આ વર્ષની શરૂઆતમાં વાતચીત દરમિયાન તેમણે ફરી એકવાર આ વિષય પર ચર્ચા કરી હતી.
ગોવિંદાએ પોતે આપ્યું હતું નિવેદન
અભિનેતાએ જણાવ્યું હતું કે થોડા વર્ષો પહેલા જ્યારે તેઓ અમેરિકા ગયા હતા, ત્યારે ત્યાં એક બિઝનેસમેન દ્વારા તેમની મુલાકાત જેમ્સ કેમેરોન સાથે થઈ હતી. ગોવિંદાએ કહ્યું, "તેમણે મને જેમ્સ સાથે ફિલ્મ કરવાની દરખાસ્ત મૂકી હતી, તેથી મેં તેમને આ વિશે ચર્ચા કરવા માટે ડિનર પર આમંત્રિત કર્યા. મેં જ આ ફિલ્મનું નામ 'અવતાર' રાખ્યું હતું."
તેમણે આગળ ઉમેર્યું, "જેમ્સે મને કહ્યું હતું કે ફિલ્મનો હીરો દિવ્યાંગ છે, તેથી મેં કહ્યું કે હું આ ફિલ્મ નહીં કરું. તેમણે મને આ માટે 18 કરોડ રૂપિયાની ઓફર કરી હતી અને કહ્યું હતું કે મારે 410 દિવસ સુધી શૂટિંગ કરવું પડશે. મેં કહ્યું કે બરાબર છે, પરંતુ જો હું મારા શરીર પર પેઇન્ટ લગાવીશ તો મારે હોસ્પિટલમાં દાખલ થવું પડશે."