28 વર્ષ પહેલા KKએ આ ગીતથી બોલિવૂડમાં કર્યું હતું ડેબ્યુ, ગૂગલે ખાસ રીતે સિંગરને કર્યો યાદ

પોતાના અવાજથી મ્યુઝિક ઈન્ડસ્ટ્રીમાં નામ કમાનાર કૃષ્ણકુમાર કુન્નથ ઉર્ફે કેકે (KK) ભલે આજે આ દુનિયામાં નથી, પરંતુ તે આજે પણ પોતાના ગીતો દ્વારા લાખો ફેન્સના દિલો પર રાજ કરે છે. આજના જ દિવસે (25 ઓકટોબર) તેણે હિન્દી ફિલ્મોમાં પ્લેબેક સિંગિંગની શરૂઆત કરી હતી. આ અવસર પર ગૂગલે તેને શ્રદ્ધાંજલિ આપી છે.

કેકેએ 90ના દાયકામાં ગીતોને અવાજ આપવાનું શરૂ કર્યું હતું. પહેલા તે જિંગલ્સ ગાતો હતો અને પછી તેણે સાઉથની ફિલ્મોમાં ગાવાનું શરૂ કર્યું હતું. કારકિર્દીના શરૂઆતના દિવસોમાં તેણે કુલ 35 હજાર જિંગલ્સ ગાયા. આ પછી, તેણે 1996માં બોલિવૂડમાં પ્રવેશ કર્યો અને પ્રથમ ગીતથી જ તે દર્શકોના દિલમાં વસી ગયો. તેણે બોલિવૂડમાં ડેબ્યુ કર્યાને આજે 28 વર્ષ થઈ ગયા છે અને ગૂગલે આ ખાસ પળની ઉજવણી કરી છે.

ગૂગલે કેકેનું સન્માન કર્યું

ગૂગલે ડૂડલ દ્વારા વિશ્વના દિગ્ગજને શ્રદ્ધાંજલિ આપે છે. 25 ઓક્ટોબરના રોજ, ગૂગલે ડૂડલ ગ્રાફિક દ્વારા કેકેના બોલિવૂડ ડેબ્યુના 28 વર્ષની ઉજવણી કરી છે. એનિમેટેડ ડૂડલમાં કેકે હાથમાં માઈક લઈને ઊભેલા અને ગાતા બતાવે છે. આ એનિમેટેડ ડૂડલની સાથે ગૂગલે લખ્યું છે કે, "આ ડૂડલ કૃષ્ણકુમાર કુન્નથની ઉજવણી કરે છે, જેને કેકે તરીકે પણ ઓળખવામાં આવે છે, જેઓ સફળ પ્લેબેક સિંગર હતા."

ગૂગલે આગળ લખ્યું, "તેઓ તેમની પ્રતિભા માટે જાણીતા છે. હિન્દી, તમિલ, તેલુગુ, કન્નડ, મલયાલમ, મરાઠી, ઓડિયા, બંગાળી, આસામી અને ગુજરાતી સહિત ઘણી ભાષાઓમાં ગીતો રેકોર્ડ કરવા માટે તેમને યાદ કરવામાં આવે છે."

આ ગીતથી ડેબ્યુ કર્યું

સાઉથ ઇન્ડસ્ટ્રીમાં વર્ષો સુધી પોતાનો જાદુ ફેલાવ્યા પછી, કેકેએ 1996માં ગુલઝારની ફિલ્મ 'માચીસ' થી બોલિવૂડમાં તેની કારકિર્દીની શરૂઆત કરી હતી. તેણે 'છોડ આયે હમ' ગીતને પોતાનો અવાજ આપ્યો હતો. આ ગીતને ખૂબ પસંદ કરવામાં આવ્યું હોવા છતાં, કેકેને સફળ બનાવવાનો શ્રેય ફિલ્મ 'હમ દિલ દે ચૂકે સનમ' ના ગીત 'તડપ તડપ' ને જાય છે. સલમાન ખાન અને ઐશ્વર્યા રાયની ફિલ્મના સુપરહિટ ગીતે કેકેને બોલિવૂડમાં લોકપ્રિય બનાવ્યો હતો.