પ્રખ્યાત તેલુગુ અભિનેતા ફિશ વેંકટનું 53 વર્ષની વયે અવસાન, આ ગંભીર બીમારીથી હાર્યા જિંદગીની જંગ
છેલ્લું અપડેટ : 19 Jul 2025
તેલુગુ સિનેમાના પ્રખ્યાત અભિનેતા ફિશ વેંકટ ઉર્ફે વેંકટ રાજાનું 18 જુલાઈ 2025ના રોજ અવસાન થયું હતું. ફિશ વેંકટ છેલ્લા કેટલાક સમયથી ગંભીર બીમારીથી પીડાતા હતા અને તેમને હોસ્પિટલમાં ICUમાં દાખલ કરવામાં આવ્યા હતા. પરંતુ ફિશ વેંકટને ત્યાં બચાવી શકાયા નહીં અને ગઈકાલે રાત્રે તેમનું અવસાન થયું હતું.
કિડની ફેલ્યોરને કારણે ડાયાલિસિસ કરાવી રહ્યા હતા
53 વર્ષીય ફિશ વેંકટ છેલ્લા ઘણા મહિનાઓથી કિડની ફેલ્યોરને કારણે ગંભીર સ્વાસ્થ્ય સમસ્યાઓથી પીડાતા હતા. તેમનું ડાયાલિસિસ ચાલી રહ્યું હતું અને તાજેતરમાં તેમની તબિયત બગડતાં તેમને વેન્ટિલેટર પર રાખવામાં આવ્યા હતા. ડોકટરોના પ્રયાસો છતાં તેમને બચાવી શકાયા નહીં. તેમણે હૈદરાબાદની એક હોસ્પિટલમાં અંતિમ શ્વાસ લીધા.
હાસ્યના પાત્રોથી નામ કમાયું
ફિશ વેંકટ એક પ્રખ્યાત હાસ્ય કલાકાર હતા. તેમણે પડદા પર વિવિધ પ્રકારના પાત્રો ભજવ્યા હતા. હાસ્ય કલાકાર હોવા ઉપરાંત તેઓ ઘણી ફિલ્મોમાં નકારાત્મક ભૂમિકાઓમાં પણ દેખાયા હતા. તેઓ તેલુગુ ઈન્ડસ્ટ્રીમાં એક જાણીતો ચહેરો હતા. હૈદરાબાદમાં જન્મેલા ફિશ વેંકટે 2000ના દાયકાની શરૂઆતમાં ફિલ્મ 'કુશી' દ્વારા તેલુગુ ફિલ્મ ઈન્ડસ્ટ્રીમાં પ્રવેશ કર્યો હતો. તેમણે 'આદિ', 'બન્ની', 'અદૂર', 'ગબ્બર સિંહ' અને 'ડીજે ટિલ્લુ' જેવી ઘણી ફિલ્મોમાં શાનદાર અભિનય કર્યો હતો. ફિશ વેંકટ તાજેતરમાં 'સ્લમ ડોગ હસબન્ડ', 'નરકાસુર' અને 'કોફી વિથ અ કિલર' જેવી ફિલ્મોમાં જોવા મળ્યા હતા.
પ્રભાસ મદદ માટે આવ્યો હતો આગળ
બાહુબલી સ્ટાર પ્રભાસ ફિશ વેંકટને તેના મુશ્કેલ સમયમાં મદદ કરવા આગળ આવ્યો હતો. પ્રભાસે ફિશ વેંકટના કિડની ટ્રાન્સપ્લાન્ટ માટે 50 લાખ રૂપિયા આપ્યા હતા. આ માહિતી ફિશ વેંકટની પુત્રી શ્રાવંતીએ પોતે મીડિયાને આપી હતી. આ પછી શ્રાવંતીએ તેલુગુ સિનેમાના અન્ય સ્ટાર્સને પણ મદદ કરવા અપીલ કરી હતી. શ્રાવંતીએ ચિરંજીવી, પવન કલ્યાણ, અલ્લુ અર્જુન અને જુનિયર એનટીઆર જેવા સુપરસ્ટારને ફિશ વેંકટને મુશ્કેલ સમયમાં મદદ કરવા અપીલ કરી હતી.
