દીપિકા પાદુકોણે તોડી ચૂપ્પી, બોલિવૂડનાં સુપરસ્ટાર્સ વિશે કહ્યું, "વર્ષોથી 8 કલાક કામ..."
છેલ્લું અપડેટ : 10 Oct 2025
બોલિવૂડ અભિનેત્રી દીપિકા પાદુકોણ ઘણા સમયથી વિવાદોને કારણે ઘેરાયેલી છે. તેની આઠ કલાકની શિફ્ટની માગણી અને વધુ પૈસાની માગણીને લઈને ઘણો વિવાદ થયો હતો. જેના કારણે દીપિકાને સાઉથની બે મોટી ફિલ્મો 'સ્પિરિટ' અને 'કલ્કિ 2'માંથી પણ બહાર કરવામાં આવી હતી. અભિનેત્રીના ફિલ્મમાંથી બહાર થવાના ઘણા કારણો સામે આવ્યા હતા.
8 કલાકના શિફ્ટ વિવાદ પર દીપિકાએ શું કહ્યું?
દીપિકા પાદુકોણ પર ઘણા આરોપો લાગ્યા હતા. ઘણા લોકોએ તેની માગણીઓને 'અનપ્રોફેશનલ' ગણાવી હતી. હવે અભિનેત્રીએ ઘણા સમય બાદ તેના પર લાગેલા તમામ આરોપો પર ચૂપ્પી તોડી છે. એક ઈન્ટરવ્યૂમાં દીપિકાએ ઇન્ડસ્ટ્રીના 'બેવડા ધોરણો' પર કહ્યું, 'એક મહિલા હોવાના કારણે જો આ દબાણ લાગે છે, તો એવું જ છે. પરંતુ આ કોઈ સિક્રેટ નથી કે ભારતીય ફિલ્મ ઇન્ડસ્ટ્રીમાં ઘણા સુપરસ્ટાર, પુરુષ સુપરસ્ટાર, વર્ષોથી 8 કલાક કામ કરે છે અને આ વાતની ક્યારે પણ હેડલાઈન નથી બની.'
'હું હમણાં કોઈનું નામ લેવા માગતી નથી અને આને વધુ મોટું બનાવવા માગતી નથી. પરંતુ આ વાત સામાન્ય છે, જાહેરમાં ઘણા અભિનેતાઓ વિશે જાણીતું છે જેઓ વર્ષોથી 8 કલાક કામ કરે છે. તેમાંથી ઘણા સોમવારથી શુક્રવાર સુધી માત્ર 8 કલાક જ કામ કરે છે. તેઓ સપ્તાહના અંતે કામ નથી કરતા. મને લાગે છે કે મોટો મુદ્દો એ છે કે ભારતીય ફિલ્મ ઇન્ડસ્ટ્રીને 'ઇન્ડસ્ટ્રી' તો કહેવામાં આવે છે, પરંતુ અમે ક્યારેય વાસ્તવમાં તે રીતે કામ કર્યું નથી. આ ખૂબ જ અવ્યવસ્થિત ઇન્ડસ્ટ્રી છે અને હવે સમય આવી ગયો છે કે આપણે તેમાં યોગ્ય વ્યવસ્થા અને માળખું લાવીએ.'
દીપિકાએ આગળ તેના વિવાદ પર કહ્યું, 'મેં ઘણા સ્તરે આવું કર્યું છે. આ મારા માટે નવું નથી. મને લાગે છે, જ્યાં સુધી પૈસાનો સવાલ છે, મારે તેની સાથે આવતી દરેક બાબતનો સામનો કરવો પડ્યો છે. મને ખબર નથી કે આને શું કહેવું, પરંતુ હું તે લોકોમાંથી છું જેમણે હંમેશા પોતાની લડાઈઓ શાંતિથી લડી છે.'
'અને કોઈ વિચિત્ર કારણોસર ક્યારેક આ જાહેર થઈ જાય છે, જે મને ખબર નથી અને ન તો મને આ રીતે ઉછેરવામાં આવી છે. પરંતુ હા, મારી લડાઈઓ શાંતિથી અને આદરપૂર્વક લડવી એ જ મારી રીત છે.'
દીપિકાના પ્રોજેક્ટ્સની વાત કરીએ તો, 'સ્પિરિટ' અને 'કલ્કિ 2'માંથી બહાર થયા બાદ પણ, તે હાલમાં બે મોટા પ્રોજેક્ટ્સનો ભાગ છે. દીપિકા શાહરૂખ ખાનની 'કિંગ'માં કામ કરી રહી છે. આ ઉપરાંત તે અલ્લુ અર્જુન-એટલીની પેન ઇન્ડિયા અનટાઇટલ્ડ ફિલ્મમાં પણ જોવા મળશે.
