37 વર્ષની સોનાક્ષી સિંહા બનવા જઈ રહી છે દુલ્હન, જલ્દી જ 'બોયફ્રેન્ડ' ઝહીર ઈકબાલ સાથે લેશે સાત ફેરા!

હાલમાં આપણે એક પછી એક ઘણી અભિનેત્રીઓ જેમ કે રકુલ પ્રીત સિંહ, કૃતિ ખરબંદા અને તાપસી પન્નુને લગ્નના બંધનમાં બંધાતા જોઈ, હવે  પછી બી-ટાઉનની વધુ એક સુંદર અભિનેત્રી લગ્ન કરવા જઈ રહી છે. આ અભિનેત્રી બીજું કોઈ નહીં પણ સોનાક્ષી સિન્હા છે. 37 વર્ષની સોનાક્ષી દુલ્હન બનવા જઈ રહી છે.

સોનાક્ષી સિંહા ઘણા સમયથી એક્ટર ઝહીર ઈકબાલને ડેટ કરી રહી છે. ભલે બંનેએ સત્તાવાર રીતે તેમના સંબંધોની પુષ્ટિ કરી ન હોય, પરંતુ તેમની બોન્ડિંગ અને પ્રેમથી ભરેલી તસવીરો અને પોસ્ટ્સ ચોક્કસપણે તેમના સંબંધોને જાહેર કરે છે.

સોનાક્ષી ક્યારે લગ્ન કરી રહી છે?

હવે સમાચાર આવી રહ્યા છે કે સોનાક્ષી સિંહા વર્ષો સુધી ડેટ કર્યા બાદ ઝહીર સાથેના પોતાના સંબંધોને નવા સ્તરે લઈ જવાની તૈયારી કરી રહી છે. એક અહેવાલ મુજબ, 'દબંગ' અભિનેત્રી માત્ર 13 દિવસ પછી  એટલે કે  23 જૂને પોતાના બોયફ્રેન્ડ ઝહીર સાથે લગ્નના બંધનમાં બંધાશે. 

લગ્નમાં કોણ હાજરી આપશે?

એવું કહેવામાં આવી રહ્યું છે કે સોનાક્ષી સિંહા અને ઝહીર ઈકબાલના લગ્ન મુંબઈમાં જ થશે. લગ્નની ઉજવણી શિલ્પા શેટ્ટીની રેસ્ટોરન્ટ બાસ્ટિયનમાં કરવામાં આવશે. આમાં અભિનેત્રીનો પરિવાર અને નજીકના મિત્રો સામેલ થશે. તેમજ 'હીરામંડી'ની આખી કાસ્ટ પણ ભાગ લઈ શકે છે. જો કે અત્યાર સુધી સોનાક્ષી સિંહા કે ઝહીર ઈકબાલે તેમના લગ્નની સત્તાવાર જાહેરાત કરી નથી. બંનેએ આ સમાચાર પર કોઈ પ્રતિક્રિયા આપી નથી.

કોણ છે ઝહીર ઈકબાલ?

ઝહીર ઈકબાલ એક બિઝનેસમેન પરિવાર સાથે સંબંધ ધરાવે છે. તેના પિતા ઈકબાલ રતનસી એક જાણીતા જ્વેલર અને બિઝનેસમેન છે. સલમાન ખાનના પરિવાર સાથે પણ તેની ગાઢ મિત્રતા છે. સલમાન ખાને ઝહીરને વર્ષ 2019માં ફિલ્મ 'નોટબુક'થી લોન્ચ કર્યો હતો. સોનાક્ષીએ પહેલીવાર ઝહીર સાથે ફિલ્મ 'ડબલ XL'માં કામ કર્યું હતું.