Sensex today: ફાર્મા અને મેટલ શેરોમાં લેવાલીથી બજારમાં ઉછાળોઃ સેન્સેક્સ 304 પોઈન્ટ વધ્યો, નિફ્ટી 24619 પર બંધ
છેલ્લું અપડેટ : 13 Aug 2025
Sensex today: બુધવારે (13 ઓગસ્ટ) વૈશ્વિક બજારોમાં મજબૂત તેજી વચ્ચે ભારતીય શેરબજાર મજબૂત રીતે બંધ થયા. મેટલ, ફાર્મા અને ઓટો શેરોમાં ખરીદીને કારણે મુખ્ય બેન્ચમાર્ક સૂચકાંકો નિફ્ટી-50 અને સેન્સેક્સ લીલા નિશાનમાં રહેવામાં સફળ રહ્યા. સ્થાનિક મોરચે, છૂટક ફુગાવાના ડેટામાં નરમાઈથી બજારના સેન્ટિમેન્ટમાં વધારો થયો હતો. છૂટક ફુગાવો ઘણા વર્ષોમાં તેના સૌથી નીચા સ્તરે પહોંચી ગયો હતો.
30 શેરો ધરાવતો બીએસઈ સેન્સેક્સ 200 પોઈન્ટથી વધુ વધીને 80,492 પોઈન્ટ પર ખુલ્યો. ટ્રેડિંગ દરમિયાન, તે 80,683 પોઈન્ટ પર પહોંચ્યો. અંતે, તે 304.32 પોઈન્ટ અથવા 0.38 ટકાના વધારા સાથે 80,539.91 પોઈન્ટ પર બંધ થયો.
એ જ રીતે, નેશનલ સ્ટોક એક્સચેન્જનો નિફ્ટી50 પણ 24,586 પોઈન્ટ પર મજબૂત રીતે ખુલ્યો. ટ્રેડિંગ દરમિયાન, તે 24,586 પોઈન્ટના નીચા સ્તરે અને 24,664 પોઈન્ટના ઉચ્ચ સ્તરે પહોંચ્યો. અંતે, તે 131.95 પોઈન્ટ અથવા 0.54 ટકાના વધારા સાથે 24,619.35 પર બંધ થયો.
મિડકેપ અને સ્મોલકેપ સૂચકાંકોએ સારું પ્રદર્શન કર્યું. બીએસઇ મિડકેપમાં 0.56 ટકાનો વધારો જોવા મળ્યો, જ્યારે બીએસઇ સ્મોલકેપમાં 0.58 ટકાનો વધારો જોવા મળ્યો.
જિયોજિત ઇન્વેસ્ટમેન્ટ લિમિટેડના રિસર્ચ હેડ વિનોદ નાયરે જણાવ્યું હતું કે, “રિટેલ ફુગાવો (સીપીઆઇ) આઠ વર્ષના નીચલા સ્તરે આવી જતાં ભારતીય શેરબજારોમાં વ્યાપક તેજી જોવા મળી હતી. આનાથી ઓટો અને મેટલ ક્ષેત્રોના નેતૃત્વમાં વિવેકાધીન ખર્ચમાં પુનર્જીવનની અપેક્ષાઓ વધી. મિડકેપ શેરોએ સારો દેખાવ કર્યો, જે રોકાણકારોના મજબૂત રસને પ્રતિબિંબિત કરે છે.
તેમણે કહ્યું, "વૈશ્વિક સ્તરે પણ વાતાવરણમાં સુધારો થયો છે. ચીન દ્વારા ટેરિફની સમયમર્યાદા લંબાવવા અને ક્રૂડ ઓઇલના ભાવમાં નરમાઈથી બજારને ટેકો મળ્યો. જોકે, ટ્રમ્પની વેપાર નીતિઓ અને અન્ય વૈશ્વિક જોખમો અંગે અનિશ્ચિતતા રહે છે. આમ છતાં, નાણાકીય વર્ષ 26 માટે ભારતનો વિકાસ અને ફુગાવાનો માહોલ અનુકૂળ રહે છે. જોકે, ટેરિફ પરના અપડેટના આધારે થોડો ડાઉનગ્રેડ થવાનું જોખમ રહેલું છે. ભારત 15 ઓગસ્ટે ટ્રમ્પ-પુતિન બેઠક પર નજર રાખી રહ્યું છે.
ટોપ ગેનર્સ અને લૂઝર્સ
સેન્સેક્સમાં સામેલ કંપનીઓમાં ભારત ઇલેક્ટ્રોનિક્સ, એટરનલ, મહિન્દ્રા એન્ડ મહિન્દ્રા, કોટક મહિન્દ્રા, ટાટા મોટર્સ, પાવર ગ્રીડ, ભારતી એરટેલ, સન ફાર્મા અને બજાજ ફાઇનાન્સ મુખ્ય વધ્યા હતા. બીજી તરફ, અદાણી પોર્ટ્સ, અલ્ટ્રાટેક સિમેન્ટ અને આઇટીસી લાલ નિશાનમાં બંધ થયા.
નિફ્ટી-50ના ટોપ ગેનર્સની વાત કરવામાં આવે તો આમાં એપોલો હોસ્પિટલ્સનો સ્ટોક ટોચ પર હતો, જેમાં 7.91 ટકાનો વધારો જોવા મળ્યો. આ પછી, હિન્ડાલ્કોમાં 5.02 ટકા, ડૉ. રેડ્ડીઝમાં 2.72 ટકા, હીરો મોટોકોર્પમાં 2.66 ટકા, સિપ્લામાં 2.59 ટકાનો વધારો જોવા મળ્યો. નિફ્ટી-50માં ઇન્ડસઇન્ડ બેંકને સૌથી મોટો ઘટાડો થયો, જે 1.23 ટકા ઘટ્યો. આ પછી, અદાણી પોર્ટ્સ 0.82 ટકા, ટાઇટન કંપની 0.58 ટકા, આઇટીસી 0.56 ટકા, અલ્ટ્રાટેક સિમેન્ટ્સ 0.39 ટકા ઘટ્યા.
બ્રોડર માર્કેટ્સમાં બીએસઇ મિડકેપ ઇન્ડેક્સ 0.63 ટકાના વધારા સાથે સ્થિર થયો અને બીએસઇ સ્મોલકેપ ઇન્ડેક્સ 0.66 ટકા વધ્યો. ક્ષેત્રીય મોરચે, નિફ્ટી હેલ્થકેર 2.13 ટકાના વધારા સાથે ટોચનો વધારો કરનાર હતો. આ પછી નિફ્ટી ફાર્મા 1.73 ટકા, નિફ્ટી મેટલ સેક્ટર 1.26 ટકા અને ઓટો 1.12 ટકા વધ્યા હતા. નિફ્ટી એફએમસીજી, પીએસયુ બેંક અને ઓઇલ એન્ડ ગેસ અનુક્રમે ૦.૦4 ટકા, ૦.14 ટકા અને ૦.૦5 ટકા ઘટ્યા હતા.
જુલાઈમાં ફુગાવો ઘટ્યો
ગ્રાહક ભાવાંક આધારિત છૂટક ફુગાવાનો દર જુલાઈમાં ઘટીને 1.55 ટકા થયો, જે લગભગ આઠ વર્ષમાં તેનો સૌથી નીચો આંકડો છે. જૂનમાં, આ આંકડો 2.1 ટકા હતો. રાષ્ટ્રીય આંકડાકીય કાર્યાલય દ્વારા આજે જાહેર કરાયેલા આંકડા અનુસાર, છેલ્લી વખત જૂન 2017માં છૂટક ફુગાવો આના કરતા ઓછો નોંધાયો હતો. તે મહિનામાં આ આંકડો 1.46 ટકા હતો.ફુગાવામાં નરમાઈ આવવાનું મુખ્ય કારણ ખાદ્ય ચીજવસ્તુઓના ભાવમાં ઘટાડો છે. ડેટા દર્શાવે છે કે શાકભાજીના ભાવમાં 20.7 ટકાનો ઘટાડો થયો છે, જે સપ્ટેમ્બર 2021 પછીનો સૌથી મોટો ઘટાડો છે.
વૈશ્વિક બજારોમાંથી શું સંકેતો મળી રહ્યા છે? બુધવારે એશિયન બજારોમાં સુધારો જોવા મળ્યો. ચીનનો સીએસઆઇ 300 ઇન્ડેક્સ 0.37 ટકા, હોંગકોંગનો હેંગ સેંગ ઇન્ડેક્સ 0.94 ટકા, જાપાનનો નિક્કી ઇન્ડેક્સ 1.3 ટકા અને દક્ષિણ કોરિયાનો કોસ્પી 0.38 ટકા વધ્યો.
જુલાઇમાં ગ્રાહક ભાવાંકના આંકડા ધારણા કરતાં નીચા રહેવાને કારણે વોલસ્ટ્રીટ ઇન્ડેક્સ વધીને બંધ રહ્યો હતો. તેનાથી રોકાણકારોનો ડર ઓછો થયો કે ટેરિફના કારણે કિંમતો વધી રહી નથી. અર્થશાસ્ત્રીઓની અપેક્ષાઓ અનુસાર, જૂનમાં 0.3 ટકા વધ્યા બાદ, ગયા મહિને ગ્રાહક ભાવાંક 0.2 ટકા વધ્યો હતો.
મંગળવારે એસએન્ડપી 500 અને Nasdaq કમ્પોઝિટ અનુક્રમે 1.1 ટકા અને 1.4 ટકાના વધારા સાથે નવા રેકોર્ડ ઉચ્ચ સ્તરે બંધ થયા. ડાઉ જોન્સ 1.1 ટકાના વધારા સાથે બંધ થયા.
બજારમાં હવે આગળ ઉપર શું?
ભારતીય શેરબજારમાં ગુરુવારે આ સપ્તાહનું છેલ્લું કારોબારી સત્ર છે. તો બીજી તરફ શુક્રવારે રશિયા અને અમેરિકાની વચ્ચે બેઠક યોજાવાની છે. બજાર આ બેઠકમાં ભારત માટે સંકેતો શોધશે. લાંબા વીક એન્ડ અને આ સમયગાળા દરમિયાન ટેરિફ અંગેની કોઈપણ જાહેરાતની આશંકા આવતીકાલના સત્રમાં ટ્રેડર્સની વ્યૂહરચનાને અસર કરી શકે છે.
નિષ્ણાતોનું કહેવું છે કે, આ મુજબ, બજારનો બંધ સારો રહ્યો પરંતુ બજારમાં આ વૃદ્ધિ ચાલુ રહે તે મહત્વપૂર્ણ છે. વૃદ્ધિની સાથે સાથે બજારમાં ઘટાડો પણ જોવા મળી રહ્યો છે. આવી સ્થિતિમાં, બજારમાં એક દિવસની વૃદ્ધિના આધારે કંઈ કહી શકાય નહીં.
આવી સ્થિતિમાં, નવા સંકેતોના આધારે નવા દિવસ માટે નવી રણનીતિ રાખો. ગુરુવારનું બજાર મહત્વપૂર્ણ રહેશે કારણ કે તે જાણી શકાશે કે બજારમાં આજનીતેજી સ્થાયી છે કે ફરીથી એકવખત ઘટાડો હાવી થઇ જાય છે.
આજના સત્રની ખાસ વાત એ છે કે બેંકિંગ કે આઈટી સક્રિય નહોતા, છતાં નિફ્ટી ઉપર હતો. કાલે વીકલી એક્સપાયરી છે, તેથી ઇન્ટ્રાડેમાં તકો મળશે, ત્યારબાદ બજાર 3 દિવસ માટે બંધ રહેશે, તેથી આ સમયગાળા દરમિયાન ઘણા મોટા સંકેતો મળી શકે છે. એકવાર નિફ્ટી 24800 ને મજબૂત રીતે પાર કરે પછી પોઝિશનલ લોંગ્સ લઈ શકાય છે. આ સ્તર પહેલાં બજારમાં જોખમ રહેશે.
તેજી માટે બજાર શેની રાહ જોઈ રહ્યું છે
પાઈપર સેરિકાના સ્થાપક અને ફંડ મેનેજર અભય અગ્રવાલના મતે, બજારે ટેરિફ સંબંધિત તમામ નકારાત્મક સમાચારોને સારી રીતે સંભાળ્યા છે અને કોઈપણ પ્રકારનો ડર બજારમાં હાવી થયો નથી. એફઆઇઆઇની વેચવાલી અને પરિણામોને કારણે બજાર દબાણ હેઠળ હતું પરંતુ કોઈ ડર હાવી થયો ન હતો, છેલ્લા 2-3 દિવસથી બજાર સંકેત આપી રહ્યું છે કે તે સકારાત્મક ટ્રિગરની રાહ જોઈ રહ્યું છે જેના પછી બજાર તેજી નોંધાવી શકે છે. બજારની નજર હવે રશિયા અને અમેરિકા વચ્ચેની બેઠક પર છે. એવી અપેક્ષા રાખવામાં આવે છે કે જો એક નાનો પણ સકારાત્મક સમાચાર આવે તો બજારમાં તેજી જોવા મળશે. તહેવારોની મોસમ અને કંપનીઓની કમાણી સંબંધિત સંકેતો અને અંદાજો પર વધુ ધ્યાન આપવામાં આવશે. એકંદરે, બજાર હવે તેજી માટે સંકેતો શોધી રહ્યું છે.
