SBI હોમ લોન મોંઘી થઈ! 50 લાખની લોન પર દર મહિને ₹781 વધુ EMI, જાણો નવા વ્યાજદર અને ગણતરી

સ્ટેટ બેંક ઑફ ઇન્ડિયા (SBI)ના હોમ લોનધારકો માટે મહત્વના સમાચાર સામે આવ્યા છે. બેંકે રેપો રેટ સાથે જોડાયેલી હોમ લોનના વ્યાજદરમાં 0.25 ટકા એટલે કે 25 બેસિસ પોઇન્ટનો વધારો કર્યો છે. આ નવા દર 15 ઑક્ટોબર, 2026થી અમલમાં આવ્યા છે. આ ફેરફારની અસર સંબંધિત વ્યાજદર સાથે જોડાયેલી લોન લેનારા ગ્રાહકો પર પડશે. હવે કેટલાક ગ્રાહકોની માસિક હપ્તાની રકમ (EMI) વધી શકે છે અથવા લોન ચૂકવવાની મુદત (Loan Tenure) લાંબી થઈ શકે છે.

SBIના હોમ લોનના નવા વ્યાજદર કેટલા?

SBIએ એક્સટર્નલ બેન્ચમાર્ક લિંક્ડ રેટ (EBLR) અને રેપો લિંક્ડ લેન્ડિંગ રેટ (RLLR)માં 25 બેસિસ પોઇન્ટનો વધારો કર્યો છે. અહેવાલ મુજબ, નિયમિત હોમ લોનના વ્યાજદર હવે 7.50 ટકાથી 8.80 ટકા વચ્ચે છે.

• નિયમિત હોમ લોન: 7.50%થી 8.80%

• હોમ લોન મેક્સગેઇન: 8%થી 9.30%

• ટોપ-અપ લોન: 8%થી 10.75%

• ટોપ-અપ ઓવરડ્રાફ્ટ લોન: 8.50%થી 11.25%

ગ્રાહકોનો વાસ્તવિક વ્યાજદર લોનના પ્રકાર, પાત્રતા અને બેંકની લાગુ શરતો પર આધારિત રહેશે.

50 લાખની લોન પર EMI કેટલી વધશે?

બેંકબજારના અંદાજ મુજબ, જો હોમ લોનનો વ્યાજદર 8 ટકાથી વધીને 8.25 ટકા થાય અને બાકી મુદત 20 વર્ષની હોય, તો હપ્તામાં આટલો ફેરફાર થઈ શકે છે.

આ ગણતરી 20 વર્ષની બાકી મુદત અને વ્યાજદરમાં 0.25 ટકાના વધારાના આધારે છે. વાસ્તવિક EMIમાં ફેરફાર લોનની બાકી રકમ અને શરતો પ્રમાણે અલગ હોઈ શકે છે.

EMI વધારવી કે લોનની મુદત?

વ્યાજદર વધ્યા બાદ ગ્રાહકો પાસે બે વિકલ્પ હોઈ શકે છે. તેઓ બેંકની મંજૂરી અને શરતોને આધારે માસિક EMI વધારી શકે છે અથવા EMI યથાવત રાખીને લોનની મુદત લંબાવી શકે છે. EMI વધારવાથી વધારાના વ્યાજનો બોજ મર્યાદિત રાખવામાં મદદ મળી શકે છે, જ્યારે મુદત લંબાવવાથી લાંબા ગાળે કુલ વ્યાજ વધુ ચૂકવવું પડી શકે છે.

તેથી ગ્રાહકોએ પોતાની માસિક આવક, ઘરખર્ચ, બચત અને અન્ય લોનની જવાબદારીઓ ધ્યાનમાં રાખીને નિર્ણય લેવો જોઈએ. SBIના ગ્રાહકોએ પોતાના લોન ખાતામાં લાગુ પડતા નવા વ્યાજદર અને EMI અંગે બેંક પાસેથી ચોક્કસ માહિતી મેળવવી જરૂરી છે.