VIDEO: Zepto-Blinkitથી D-Mart થી લઈ લોકલ માર્કેટમાં પણ લિમિટ, ખાંડના ભાવ વધ્યા બાદ ખરીદી પર પણ મર્યાદા
છેલ્લું અપડેટ : 27 Aug 2026
તહેવારોની સિઝન શરૂ થાય તે પહેલાં ખાંડના વધતા ભાવથી સામાન્ય ગ્રાહકોની ચિંતા વધી છે. બજારમાં ખાંડ મોંઘી થવાની સાથે હવે તેની ખરીદી પર પણ મર્યાદા જોવા મળી રહી છે. કેટલાક ક્વિક-કોમર્સ પ્લેટફોર્મ્સ (Quick-Commerce Platforms) અને ઓફલાઇન સ્ટોર્સમાં ગ્રાહકો એકસાથે વધુ માત્રામાં ખાંડ ખરીદી શકતા નથી.
ઓનલાઈન ખરીદી પર પણ મર્યાદા
Zepto, Blinkit અને Swiggy Instamart જેવા પ્લેટફોર્મ્સ પર કેટલાક ખાંડના પેકેટ્સ માટે ખરીદીની મર્યાદા જોવા મળી રહી છે. Swiggy Instamart પર એક કિલોના ચોક્કસ પેકેટ માટે એક ઓર્ડરમાં વધુમાં વધુ બે પેકેટ ખરીદવાની મર્યાદા દર્શાવવામાં આવી છે. જોકે, આ મર્યાદા દરેક પ્રોડક્ટ અને દરેક વિસ્તારમાં એકસરખી હોય તે જરૂરી નથી.
ઓફલાઇન સ્ટોર્સમાં પણ કાપ
ખાંડની ખરીદી પર મર્યાદા માત્ર ઓનલાઈન બજાર સુધી સીમિત નથી. કેટલાક ઓફલાઇન સ્ટોર્સ (Offline Stores)માં પણ ગ્રાહકોને મર્યાદિત માત્રામાં ખાંડ આપવામાં આવી રહી છે. D-Martના કેટલાક સ્ટોર્સમાં આશરે 2થી 3 કિલો સુધીની ખરીદી મર્યાદા હોવાની માહિતી સામે આવી છે. કેટલાક Reliance સ્ટોર્સમાં પણ આવી મર્યાદા જોવા મળી રહી છે.
સરકારનો ખાંડની આયાતનો નિર્ણય
ખાંડના વધતા ભાવ અને સ્થાનિક પુરવઠા પર દબાણ વચ્ચે સરકારે વધારાની ખાંડ ઉપલબ્ધ કરાવવાના પ્રયાસો શરૂ કર્યા છે. 20 ઓગસ્ટની સૂચના હેઠળ TRQ (Tariff Rate Quota) મારફતે 10 લાખ ટન કાચી ખાંડની ડ્યૂટી-ફ્રી આયાતને મંજૂરી આપવામાં આવી છે. આ મંજૂરી 31 ઓક્ટોબર 2026 સુધી લાગુ રહેશે.
ગ્રાહકો પર શું અસર થશે?
રોજિંદા ઉપયોગ માટે એક-બે કિલો ખાંડ ખરીદતા ગ્રાહકો પર મર્યાદાની ખાસ અસર નહીં પડે. જોકે, તહેવારો દરમિયાન મીઠાઈ, બેકરી અને અન્ય વાનગીઓ માટે મોટી માત્રામાં ખાંડ ખરીદતા પરિવારો અને વેપારીઓને મુશ્કેલી પડી શકે છે. સરકારના આયાતી ખાંડના નિર્ણયથી આગામી સમયમાં બજારમાં પુરવઠો વધે અને ભાવ પર દબાણ ઘટે તેવી આશા છે.