પગાર આવતા જ ખાલી થઈ જાય છે એકાઉન્ટ? અપનાવો સેલેરીને 4 ભાગમાં વહેંચવાની આ સ્માર્ટ ફોર્મ્યુલા
છેલ્લું અપડેટ : 20 Aug 2026
ઘણા નોકરીયાત લોકો સાથે એવું બનતું હોય છે કે દર મહિને પગાર આવતાની સાથે જ શરૂઆતના દિવસોમાં જ પૂરો થઈ જાય છે. ત્યારબાદ તેઓ મહિનાના બાકીના દિવસોમાં આગામી પગારની આતુરતાથી રાહ જોતા હોય છે. જો તમારી સાથે પણ આવું થતું હોય તો આવી સ્થિતિથી બચવા માટે પગારને એકસાથે ખર્ચવાને બદલે તેને 4 ભાગમાં વહેંચીને ઉપયોગ કરી શકાય છે. તેનો ફાયદો એ છે કે જરૂરી ખર્ચ, બચત, ભવિષ્યની જરૂરિયાતો અને પોતાની ઈચ્છાઓ માટે પૈસા પહેલાથી જ અલગ થઈ જાય છે.
પગારને 4 ભાગમાં કેવી રીતે વહેંચવો?
ધારી લો કે કોઈ વ્યક્તિનો માસિક ઈન-હેન્ડ પગાર 50,000 રૂપિયા છે. તેને ચાર ભાગમાં વહેંચવા માટે એક સરળ રસ્તો અપનાવી શકાય છે-
પગારના લગભગ 50% એટલે કે 25,000 રૂપિયા ઘરના જરૂરી ખર્ચાઓ માટે રાખી શકાય છે. જેમાં ભાડું અથવા હોમ લોનની EMI, વીજળી-પાણીનું બિલ, રાશન, મુસાફરી ખર્ચ, મોબાઈલ-ઈન્ટરનેટ અને અન્ય જરૂરી ખર્ચાઓ સામેલ હોઈ શકે છે. જોકે, એવું જરૂરી નથી કે દરેક વ્યક્તિ માટે 50% જ સાચો આંકડો હોય. જો કોઈનું ભાડું કે EMI વધારે હોય તો આ હિસ્સો વધી પણ શકે છે.
20% પૈસા બચત અને રોકાણ માટે
પગારના બીજા 20% એટલે કે 10,000 રૂપિયા સીધા બચત અથવા રોકાણ માટે અલગ કરી શકાય છે. જેમાં SIP, RD, FD કે અન્ય નાણાકીય લક્ષ્યો માટે પૈસા રાખી શકાય છે. સૌથી જરૂરી વાત એ છે કે બચતને મહિનાના અંતે વધેલી રકમ સાથે ન જોડો. જો પહેલા ખર્ચ કરી લીધો અને પછી વધેલા પૈસા રોકાણ કરવાનો પ્રયાસ કર્યો, તો ઘણીવાર કંઈપણ બચતું નથી. તેથી પગાર આવતાની સાથે જ આ 10,000 રૂપિયા અલગ ખાતામાં ટ્રાન્સફર કરી શકાય છે.
20% પૈસા વ્યક્તિગત અને મનોરંજનના ખર્ચ માટે
બજેટનો અર્થ એ નથી કે વ્યક્તિ પોતાની પસંદગીની વસ્તુઓ પર બિલકુલ ખર્ચ ન કરે. તેથી 10,000 રૂપિયા એટલે કે 20% પૈસા શોપિંગ, બહાર જમવું, મૂવી, ફરવા જવું, ઓનલાઈન ઓર્ડર કે અન્ય ઈચ્છાઓ પર ખર્ચ કરી શકાય છે. આ હિસ્સાની સૌથી મોટી ખાસિયત એ છે કે તેને ખર્ચ કરવા પર અપરાધભાવ અનુભવવાની જરૂર નહીં રહે, કારણ કે તેનું બજેટ પહેલાથી જ નક્કી છે.
10% પૈસા ઈમરજન્સી અને અનિયમિત ખર્ચ માટે
વધેલા 10% એટલે કે 5,000 રૂપિયા ઈમરજન્સી અને અચાનક આવી પડતા ખર્ચાઓ માટે રાખી શકાય છે. ઉદાહરણ તરીકે અચાનક ડોક્ટરની ફી, દવા, બાઈકનું રિપેરિંગ, ઘરનો કોઈ જરૂરી સામાન કે પ્રવાસ સંબંધિત ખર્ચ સામે આવી શકે છે. જો કોઈ મહિને આ પૈસા ખર્ચ ન થાય તો તેને આગામી મહિના માટે બચાવી શકાય છે. ધીમે-ધીમે આ જ રકમ એક સારો ઈમરજન્સી ફંડ બનાવવામાં મદદ કરી શકે છે.
