પ્રોવિડન્ટ ફંડમાંથી કયા કામ માટે ઉપાડી શકાય છે પૈસા? જાણો EPFમાંથી ઉપાડ માટેના નવા નિયમો

સેલેરીમાંથી દર મહિને પ્રોવિડન્ટ ફંડ એટલે કે EPF માટે પૈસા કાપવામાં આવે છે. આ વાત સેલેરી મેળવનાર દરેક વ્યક્તિ જાણે છે. પ્રોવિડન્ટ ફંડનો હેતુ નિવૃત્તિ પછીના જીવન માટે આર્થિક વ્યવસ્થા કરવાનો છે, તેથી EPF એકાઉન્ટમાં જમા કરવામાં આવેલી રકમ સામાન્ય રીતે નોકરીના અંત પછી જ ઉપલબ્ધ થાય છે. પરંતુ કેટલાક ખાસ સંજોગોમાં નોકરી દરમિયાન પણ તમે EPFમાં જમા કરેલા તમારા પૈસા સંપૂર્ણ અથવા આંશિક રીતે ઉપાડી શકો છો.

કયા હેતુ માટે અથવા કઈ જરૂરિયાતો માટે કેટલી રકમ ઉપાડી શકાય તે EPFO ​​એટલે કે કર્મચારી ભવિષ્ય નિધિ સંગઠનના નિયમો અનુસાર નક્કી કરવામાં આવે છે. જો તમારે ક્યારેય તમારા પ્રોવિડન્ટ ફંડમાંથી પૈસા ઉપાડવાની જરૂર હોય, તો આ નિયમોનું જ્ઞાન તમારા માટે ખૂબ જ ઉપયોગી સાબિત થશે. અમે અહીં એવા હેતુઓ અથવા જરૂરિયાતોની સંપૂર્ણ વિગતો આપી રહ્યા છીએ કે જેના માટે નોકરી દરમિયાન પ્રોવિડન્ટ ફંડ EPFમાંથી પૈસા ઉપાડવાની પરવાનગી આપવામાં આવે છે.

તબીબી સારવાર માટે

કર્મચારીઓ પોતાની અથવા તેમના પરિવારના સભ્યોની સારવાર માટે EPF એકાઉન્ટમાંથી પૈસા ઉપાડી શકે છે. આ પરવાનગી માત્ર ત્યારે જ મળે છે જો:
- હોસ્પિટલમાં મોટું ઓપરેશન કરાવવાનું હોય
- એક મહિનાથી વધુ સમય સુધી હોસ્પિટલમાં દાખલ રહેવું પડે
- ટીબી, કેન્સર, લેપ્રોસી, પેરાલિસિસ, માનસિક બીમારી અને હૃદયરોગ જેવા ગંભીર રોગોની સારવાર માટે કર્મચારીઓ રજા પર હોય.
- વધુમાં વધુ 6 મહિનાની બેસિક સેલેરી+ મોંઘવારી ભથ્થા જેટલી મહત્તમ રકમ ઉપાડી શકાય છે.
- સારવાર માટે EPFO ​​તરફથી એડવાન્સ એવા કર્મચારીઓને પણ આપી શકાય છે જેઓ નવા છે અથવા જેમનું પ્રોવિડન્ટ ફંડ તાજેતરમાં કપાવાનું શરૂ થયું છે.
- આ નિયમ હેઠળ એડવાન્સ લેવા માટે ફોર્મ 31 સાથે ડૉક્ટરનું પ્રમાણપત્ર પણ આપવું પડે છે.
- જો જરૂરી હોય તો આ સુવિધા ગમે તેટલી વખત મેળવી શકાય છે.

લગ્ન માટે

જે કર્મચારીઓના પૈસા દર મહિને તેમના પગારમાંથી કાપીને પ્રોવિડન્ટ ફંડમાં જમા કરવામાં આવે છે, તેઓ લગ્ન માટે EPF એકાઉન્ટમાંથી એડવાન્સ પણ લઈ શકે છે. આ માટે આ શરતોને પૂર્ણ કરવી જરૂરી છે:
- આ લાભ એવા કર્મચારીઓને જ મળે છે જેમની નોકરી ઓછામાં ઓછી 7 વર્ષની છે.
- કર્મચારીઓ તેમના EPF ખાતામાં જમા કરવામાં આવેલી રકમમાંથી તેમના યોગદાન અને તેના પર મળેલા વ્યાજના મહત્તમ 50% ઉપાડી શકે છે.
- આ નિયમ હેઠળ કોઈપણ કર્મચારી વધુમાં વધુ ત્રણ વખત પૈસા ઉપાડી શકશે.
- કર્મચારી પોતાના લગ્ન સિવાય તેના બાળકો અને ભાઈ-બહેનના લગ્ન માટે પણ પૈસા ઉપાડી શકે છે.

રહેણાંક મકાન ખરીદવા અથવા બનાવવા માટે

કર્મચારીઓ તેમના રહેણાંક મકાન બનાવવા અથવા ખરીદવા માટે ભવિષ્ય નિધિમાંથી પૈસા પણ ઉપાડી શકે છે. જો તમે આ હેતુ માટે પૈસા ઉપાડવા માગતા હો, તો તમારે આ શરતો પૂરી કરવી જરૂરી છે:
- કર્મચારી જે જમીન અથવા મકાન ખરીદવા માગે છે તે તેના અને તેના જીવનસાથીના અથવા સંયુક્ત રીતે બંનેના નામ પર હોવું જોઈએ.
- કર્મચારીની નોકરી ઓછામાં ઓછી 5 વર્ષની હોવી જોઈએ
- 24 મહિનાની બેસિક સેલેરી + મોંઘવારી ભથ્થા જેટલી મહત્તમ રકમ ઉપાડી શકાય છે.

હોમ લોન ચૂકવવા માટે

જો કોઈ કર્મચારીએ ઘર ખરીદવા માટે હોમ લોન લીધી હોય તો તેને ચૂકવવા માટે ભવિષ્ય નિધિમાંથી પૈસા ઉપાડી શકાય છે.
- આ સુવિધા તે કર્મચારીઓ જ મેળવી શકે છે જેઓ 10 વર્ષ કે તેથી વધુ સમયથી કામ કરી રહ્યા છે.
- આ સુવિધા જીવનમાં માત્ર એક જ વાર મેળવી શકાય છે.
- તમે ઘર ખરીદવું અથવા જૂની હોમ લોન ચૂકવવામાંથી કોઈ પણ એક જ હેતુ માટે પૈસા ઉપાડી શકો છો.
- જે મકાન માટે કર્મચારી હોમ લોન ચુકવવા માગે છે તે મકાન તેની, તેની પત્ની અથવા બંનેની સંયુક્ત માલિકીમાં હોવું જોઈએ.
- ભાઈ-બહેન કે માતા-પિતા સાથે સંયુક્ત રીતે લીધેલી હોમ લોનની ચુકવણી કરવા માટે EPFમાંથી એડવાન્સ લઈ શકાતું નથી.
- હોમ લોન ચૂકવવા માટે EPF એકાઉન્ટમાંથી 36 મહિનાની બેસિક સેલરી + DA જેટલી મહત્તમ રકમ ઉપાડી શકાય છે.

ઘરના રિનોવેશન માટે

કર્મચારીઓ તેમના જૂના મકાનને રિપેર કરવા અથવા સુધારવા માટે પ્રોવિડન્ટ ફંડમાંથી એડવાન્સ પણ લઈ શકે છે. આ લાભ મેળવવા માટે આ નિયમો અને શરતોને પૂર્ણ કરવી જરૂરી છે:
- ઘરના રિનોવેશન માટે માસિક પગારમાંથી મહત્તમ 12 ગણો ઉપાડી શકાય છે.
- જે ઘરનું રિપેર કરાવવાનું છે તે ઘર 5 વર્ષ કે તેથી વધુ જૂનું હોવું જોઈએ.
- કર્મચારીની નોકરીને ઓછામાં ઓછા 10 વર્ષ થઈ ગયા હોય.
- તમે આ નિયમનો લાભ તમારા જીવનમાં માત્ર એક જ વાર લઈ શકો છો.
- જે મકાનનું રિનોવેશન કરાવવાનું છે તે કર્મચારીના પોતાના નામનું, જીવનસાથીના નામનું અથવા બંનેની સંયુક્ત માલિકીનું હોવું જોઈએ.

શિક્ષણ માટે

કર્મચારીઓ તેમના બાળકોના શિક્ષણ માટે પ્રોવિડન્ટ ફંડમાંથી એડવાન્સ પણ લઈ શકે છે.
- આ એડવાન્સ માત્ર ધોરણ 10 પછીના શિક્ષણ માટે જ ઉપલબ્ધ છે. એટલે કે, જો તમે તમારા દીકરા કે દીકરીને કોલેજ, યુનિવર્સિટી અથવા કોઈપણ ઉચ્ચ શિક્ષણ સંબંધિત સંસ્થામાં પ્રવેશ અપાવવા માગો છો, તો તમે તેના માટે EPF એકાઉન્ટમાંથી એડવાન્સ લઈ શકો છો.
- આ લાભ એવા કર્મચારીઓને જ મળશે જેમની નોકરી ઓછામાં ઓછી 7 વર્ષની છે.