દેશના આ શહેરમાં લોન્ચ થયું E85 પેટ્રોલ, નોર્મલ કરતાં 20 રૂપિયા સસ્તું; શું તમારી ગાડીમાં ચાલશે?

સરકારે દેશનું પહેલું E85 પેટ્રોલ મુંબઈમાં લોન્ચ કરી દીધું છે. આની કિંમત ૯૧.૧૮ રૂપિયા પ્રતિ લીટર રાખવામાં આવી છે. એટલે કે અત્યારના સમયમાં મુંબઈમાં મળી રહેલા નોર્મલ પેટ્રોલ (૧૧૧ રૂપિયા પ્રતિ લીટર) કરતાં આશરે ૨૦ રૂપિયા સસ્તું છે. થોડા દિવસો પહેલાં જ કેન્દ્રીય મંત્રી નીતિન ગડકરીએ દેશમાં ૧૦૦ ટકા ઇથેનોલ એટલે કે E100 ફ્યુઅલના નિયમોને સત્તાવાર રીતે મંજૂરી આપી દીધી હતી. તેવામાં પેટ્રોલ પંપ પર લાઈન લગાવતા પહેલાં એ જાણી લેવું જરૂરી છે કે, શું આ ફ્યુઅલ તમારી ગાડી માટે બન્યું છે કે નહીં.  

E85 પેટ્રોલનો અર્થ સમજો

  સૌથી પહેલાં એ સમજો કે E85 પેટ્રોલ શું છે? વાસ્તવમાં આ ફ્યુઅલમાં ૮૫% ઇથેનોલ અને ૧૫% પેટ્રોલ મિક્સ કરવામાં આવે છે. ઇથેનોલ સામાન્ય રીતે શેરડી અને મકાઈના પાકમાંથી તૈયાર કરવામાં આવતું એક બાયો-ફ્યુઅલ (જૈવિક બળતણ) છે. દેશમાં સરકાર પ્રદૂષણ ઘટાડવા અને તેલ પરની નિર્ભરતા ઓછી કરવા માટે ઇથેનોલ બ્લેન્ડિંગ (મિશ્રણ) પર ઝડપથી કામ કરી રહી છે.  

શું તમે તમારી કાર કે બાઇકમાં આ તેલ પુરાવી શકો છો?

  અત્યારના સમયમાં આ ફ્યુઅલનો ઉપયોગ તમે તમારી હાલની કાર કે બાઇકમાં કરી શકો નહીં. પેટ્રોલિયમ મંત્રાલયના જણાવ્યા અનુસાર, E85 પેટ્રોલના ઉપયોગ માટે ગાડીમાં 'ફ્લેક્સ ફ્યુઅલ એન્જિન' (Flex-Fuel Engine) હોવું જરૂરી છે. અત્યારના સમયના વાહનો વધુમાં વધુ ૨૦% ઇથેનોલ પર જ કામ કરી શકે છે. જો તમે તમારી સામાન્ય કાર કે બાઇકમાં ૮૫% ઇથેનોલવાળું તેલ નાખી દેશો, તો તેનું એન્જિન અને ફ્યુઅલ સિસ્ટમ બગડી શકે છે.  

દેશમાં E85 માટે કઈ ગાડીઓ તૈયાર છે?

  દેશના માર્કેટમાં અત્યારે ફ્લેક્સ ફ્યુઅલ ગાડીઓના ઓપ્શન ખૂબ જ ઓછા છે. કાર સેગમેન્ટમાં મારુતિ સુઝુકી વેગનઆર બાયો ફ્લેક્સ (Maruti Suzuki WagonR Bio-Flex) દેશની પહેલી ફ્લેક્સ ફ્યુઅલ પેસેન્જર કાર છે, જે E20 થી લઈને E100 સુધીના ફ્યુઅલ પર ચાલી શકે છે. જોકે, સામાન્ય નાગરિકો માટે હજી તેનું વેચાણ શરૂ થયું નથી. બીજી તરફ, ટુ-વ્હીલર સેગમેન્ટમાં હીરો મોટોકોર્પની પોપ્યુલર બાઇક સ્પ્લેન્ડર પ્લસ ફ્લેક્સ ફ્યુઅલ (Splendor+ Flex Fuel) અને ડીલક્સ ફ્લેક્સ ફ્યુઅલ (Deluxe Flex Fuel) ને ટૂંક સમયમાં જ માર્કેટમાં લોન્ચ કરવામાં આવી શકે છે.   સરકારનો ટાર્ગેટ છે કે વર્ષ ૨૦૨૬ના અંત સુધીમાં દેશમાં ૫૦૦ અને ડિસેમ્બર ૨૦૨૭ સુધીમાં આખા ભારતમાં ૫ હજાર E85 ફ્યુઅલ સ્ટેશન (પેટ્રોલ પંપ) ખોલવામાં આવે, જેથી જ્યારે કંપનીઓ નવી ફ્લેક્સ ફ્યુઅલ ગાડીઓ લાવે ત્યારે લોકોને આ ફ્લેક્સ તેલની અછત વર્તાય નહીં.