દસ વર્ષમાં બિટકોઈન ₹8 કરોડ અને સોનાનો ભાવ ₹8.8 લાખ પહોંચશે; જાણો કોણે કરી ભવિષ્યવાણી
છેલ્લું અપડેટ : 20 Apr 2025
સોનાનો ભાવ એ પણ 8.8 લાખ જો કોઈ આવું કહે તો શું તમે વિશ્વાસ કરશો. કદાચ નહિ.. પરંતુ તમે માનો કે ના માનો, "રિચ ડેડ પુઅર ડેડ"(Rich dad poor dad) પુસ્તકના લેખક રોબર્ટ કિયોસાકી(Robert Kiyosaki) આ વાત જાણે છે. એક મોટા દાવામાં તેમણે કહ્યું કે 2035 સુધીમાં, બિટકોઈન 1 મિલિયન (લગભગ 8 કરોડ રૂપિયા), સોનું 30,000 ડોલર પ્રતિ ઔંસ અને ચાંદી 3,000 ડોલર સુધી પહોંચી શકે છે. હાલમાં, બિટકોઈન રૂ. 1 લાખથી નીચે છે અને સોનાની કિંમત $3300 ની આસપાસ છે.
તેમણે સોશિયલ મીડિયા પ્લેટફોર્મ X પર આ વાતો લખી છે. તેમણે અમેરિકન અર્થતંત્રની વર્તમાન સ્થિતિ પર ચિંતા વ્યક્ત કરી અને પુનરોચ્ચાર કર્યો કે અમેરિકા એક મોટા આર્થિક સંકટ તરફ આગળ વધી રહ્યું છે. તેમણે કહ્યું કે "2025 માં ક્રેડિટ કાર્ડ દેવું અત્યાર સુધીના સર્વોચ્ચ સ્તરે છે. અમેરિકાના કુલ દેવાએ પણ રેકોર્ડ તોડી નાખ્યા છે. બેરોજગારી વધી રહી છે. 401 (k) જેવા નિવૃત્તિ ભંડોળ ઘટી રહ્યા છે અને પેન્શન પણ જોખમમાં છે. અમેરિકા કદાચ એક મોટી મંદી તરફ આગળ વધી રહ્યું છે, જેને હું 'ગ્રેટર ડિપ્રેશન' કહું છું."
તેમણે આગળ લખ્યું, "મને ખાતરી છે કે 2035 સુધીમાં એક બિટકોઈન $1 મિલિયનથી વધુ હશે, સોનું $30,000 સુધી પહોંચી શકે છે અને ચાંદી $3,000 સુધી પહોંચી શકે છે. પૈસા કમાવવાની આ સૌથી સરળ તક હોઈ શકે છે."
કિયોસાકીએ એમ પણ કહ્યું કે આ તકનો લાભ ફક્ત તે જ લોકોને મળશે જે સમયસર પગલાં લેશે. તેમનો સ્પષ્ટ સંદેશ છે કે, "જો તમે આજે રોકાણ કરો છો, પછી ભલે તે બિટકોઈન હોય, થોડું સોનું હોય કે ચાંદી, જ્યારે મોટી કટોકટી આવે છે, ત્યારે તમે તેમાંથી ધનવાન બની શકો છો. પરંતુ જો તમે વિલંબ કરશો, તો ખૂબ મોડું થઈ શકે છે."
મૂંઝવણમાં હોય તેવા લોકો માટે સલાહ
જે લોકો હજુ પણ વિચારી રહ્યા છે કે શું કરવું, તેમણે સ્પષ્ટપણે કહ્યું, "હજુ પણ કંઈક કરી શકાય છે. તમે ખૂબ જ ધનવાન પણ બની શકો છો." તેમણે એવા ટીકાકારોને પણ જવાબ આપ્યો જેઓ કહે છે કે તેઓ વારંવાર એક જ વાતનું પુનરાવર્તન કરે છે, "હા, હું વારંવાર એક જ સલાહ આપું છું, સોનું, ચાંદી અને બિટકોઇન ખરીદો અને હું આજે પણ એ જ વાત કહી રહ્યો છું."
કિયોસાકીએ પણ ચેતવણી આપી
પોતાની પોસ્ટના અંતે, તેમણે ચેતવણી આપી હતી કે, "'મહાન મંદી' આવી રહી છે, તે લાખો લોકોને ગરીબ બનાવશે... પરંતુ જે લોકો સમયસર પગલાં લે છે તેઓ ખૂબ જ ધનવાન અને મુક્ત બની શકે છે. આ આર્થિક મંદી જેની મેં આગાહી કરી હતી, અને જે હાલમાં થઈ રહી છે, તે તમારા જીવનની સૌથી મોટી તક હોઈ શકે છે. નાણાકીય સ્વતંત્રતા પ્રાપ્ત કરવાની તક."
