રેલવે બાદ હવે ટપાલ વિભાગના કર્મચારીઓને દિવાળી ગિફ્ટ: સરકાર આપશે આખા 60 દિવસનું બોનસ

તહેવારી સિઝનમાં કેન્દ્ર સરકારે રેલવે પછી હવે ટપાલ વિભાગના કર્મચારીઓને ભેટ આપી છે. સરકારે નાણાકીય વર્ષ 2025-26 માટે ટપાલ કર્મચારીઓના પર્ફોર્મન્સ લિંક્ડ બોનસ (PLB)ની જાહેરાત કરી દીધી છે. સંચાર મંત્રાલયના ટપાલ વિભાગ દ્વારા જારી કરવામાં આવેલા આદેશ મુજબ, પાત્ર કર્મચારીઓને 60 દિવસ એટલે કે આખા બે મહિનાના પગાર જેટલું બોનસ આપવામાં આવશે.

ટપાલ વિભાગ તરફથી શુક્રવાર, 16 ઓક્ટોબર 2026ના રોજ જારી કરવામાં આવેલા આદેશમાં બોનસની ચુકવણી સાથે જોડાયેલા નિયમો અને પાત્રતાની માહિતી આપવામાં આવી છે. આ આદેશને નાણાપ્રધાનની મંજૂરી પણ મળી ચૂકી છે. એટલે કે ટપાલ વિભાગના કર્મચારીઓને દીવાળી પહેલાં બોનસ મળશે.

કયા કર્મચારીઓને મળશે બોનસ?

નિયમિત કર્મચારીઓ: મલ્ટી ટાસ્કિંગ સ્ટાફ (MTS), ગ્રુપ C અને બિન-રાજપત્રિત ગ્રુપ B ના કર્મચારીઓ.

ગ્રામીણ ટપાલ સેવક (GDS): નિયમિત રીતે કામ કરતા પાત્ર ગ્રામીણ ટપાલ સેવકો.

અસ્થાયી કર્મચારીઓ: નિર્ધારિત શરતોને પૂરી કરતા પૂર્ણસમયના કેઝ્યુઅલ લેબર અને અસ્થાયી દરજ્જા ધરાવતા કેઝ્યુઅલ કર્મચારીઓ.

નિયમિત કર્મચારીઓને 60 દિવસના પગારની બરાબર પ્રોડક્ટિવિટી લિંક્ડ બોનસ આપવામાં આવશે. જ્યારે, ગ્રામીણ ટપાલ સેવકોને નિયમ અનુસાર એક્સ-ગ્રેશિયા બોનસ અને પાત્ર અસ્થાયી કર્મચારીઓને એડ-હોક બોનસ મળશે.

કેટલા રૂપિયાનું મળશે બોનસ?

ટપાલ વિભાગના નિયમિત કર્મચારીઓના બોનસની ગણતરી માટે માસિક પગારની મહત્તમ મર્યાદા 7,000 રૂપિયા નક્કી કરવામાં આવી છે. નાણાકીય વર્ષ 2025-26 દરમિયાન દર મહિને મળતા પાત્ર પગારને આ મર્યાદાના આધારે ગણવામાં આવશે.

આખા વર્ષ દરમિયાન પાત્ર રહેતા કર્મચારી માટે 60 દિવસના બોનસની ગણતરી આ પ્રમાણે સમજી શકાય છે:

ગણતરી માટેનો માસિક પગાર: 7,000 રૂપિયા

એક દિવસનો અનુમાનિત પગાર: 7,000 ÷ 30 = 233.33 રૂપિયા

60 દિવસનું બોનસ: લગભગ 14,000 રૂપિયા

આ રીતે નિર્ધારિત પગાર મર્યાદાના આધારે આખા વર્ષ માટે પાત્ર રહેલા નિયમિત કર્મચારીને આશરે 14,000 રૂપિયાનું બોનસ મળી શકે છે. વાસ્તવિક ચુકવણી કર્મચારીની પાત્રતા, સંબંધિત સમયગાળાના પગાર અને લાગુ પડતા નિયમો અનુસાર નક્કી થશે.

ગ્રામીણ ટપાલ સેવકોને પણ મળશે બોનસ

ટપાલ વિભાગે નિયમિત રૂપથી કામ કરતા ગ્રામીણ ટપાલ સેવકો (GDS) માટે પણ એક્સ-ગ્રેશિયા બોનસની મંજૂરી આપી છે. તેની ગણતરી નાણાકીય વર્ષ 2025-26 દરમિયાન મળેલા ટાઈમ રિલેટેડ કંટીન્યુટી અલાઉન્સ (TRCA) અને સંબંધિત મોંઘવારી ભથ્થાના આધારે કરવામાં આવશે.