VIDEO: AI મોડલને ટ્રેનિંગ આપો અને મેળવો 1.7 કરોડ રૂપિયાનો પગાર, હવે આ સેક્ટરની નોકરીઓ પર ખતરો!
છેલ્લું અપડેટ : 09 Jul 2026
OpenAI Investment Banking Model: AIએ કોડિંગ, કસ્ટમર સપોર્ટ અને રિસર્ચ જેવા ક્ષેત્રોમાં કામ કરવાની રીત બદલી નાખી છે. હવે તેનો પ્રભાવ ઇન્વેસ્ટમેન્ટ બેન્કિંગ ક્ષેત્ર પર પણ જોવા મળી શકે છે. મીડિયા અહેવાલો મુજબ, OpenAI ઇન્વેસ્ટમેન્ટ બેન્કર્સ માટે એક નવું AI મોડલ તૈયાર કરી રહી છે. આ મોડલને ટ્રેનિંગ આપવા માટે કંપની ઇન્વેસ્ટમેન્ટ બેન્કિંગના નિષ્ણાતોની શોધમાં છે. આ કામ માટે કંપની અંદાજે 1.7 કરોડ રૂપિયા વાર્ષિક બેઝ સેલરી ઓફર કરી રહી છે.
1.7 કરોડના પગાર સામે શું કરવું પડશે?
આ પદ માટે OpenAI એવા ઉમેદવારની શોધમાં છે જેને ઓછામાં ઓછો બે વર્ષનો ઇન્વેસ્ટમેન્ટ બેન્કિંગનો અનુભવ હોય. ઉમેદવારે કંપની અને ઉદ્યોગ સંબંધિત રિસર્ચ, ફાઇનાન્સિયલ એનાલિસિસ, વેલ્યુએશન, ડીલ એક્ઝિક્યુશન અને ક્લાયન્ટ પ્રેઝન્ટેશન જેવા કાર્યો કર્યા હોવા જોઈએ.
પસંદ થયેલા ઉમેદવારને બેન્કિંગનું કામ નહીં કરવું પડે, પરંતુ નવા AI મોડલને ટ્રેનિંગ આપવાનું અને તેની કામગીરીનું મૂલ્યાંકન કરવાનું રહેશે. AIને ઇન્વેસ્ટમેન્ટ બેન્કર્સ કેવી રીતે કામ કરે છે તે શીખવવાની જવાબદારી નિષ્ણાતને સોંપવામાં આવશે.
આ મોડલ જાહેર થયા પછી ઇન્વેસ્ટમેન્ટ બેન્કર્સની નોકરીઓ પર તેની કેટલી અસર પડશે તે જોવું મહત્વનું રહેશે. શરૂઆતમાં કંપનીઓ AIને સહાયક તરીકે અપનાવે છે, પરંતુ સમય જતાં ઘણી જગ્યાએ આવી ટેક્નોલોજી કર્મચારીઓની જરૂરિયાત પણ ઘટાડી દે છે. જેથી તેમની નોકરીઓ પર પણ સંકટ પેદા થાય છે.
હવે ફાઇનાન્સિયલ સર્વિસિસ પર AI કંપનીઓનું ધ્યાન
OpenAI સહિત અનેક AI કંપનીઓ હવે ફાઇનાન્સિયલ સર્વિસિસ ક્ષેત્ર પર વધુ ધ્યાન કેન્દ્રિત કરી રહી છે. OpenAI ઇન્વેસ્ટમેન્ટ બેન્કિંગ માટે નવું મોડલ તૈયાર કરી રહી છે, જ્યારે તેની પ્રતિસ્પર્ધી કંપની Anthropicએ તાજેતરમાં એવા AI એજન્ટ્સ રજૂ કર્યા છે, જે ફાઇનાન્સિયલ સંસ્થાઓમાં થતા પુનરાવર્તિત કાર્યોને ઓટોમેટ કરી શકે છે. Anthropicના જણાવ્યા અનુસાર, ટેક્નોલોજી પછી હવે ફાઇનાન્સિયલ સર્વિસિસ તેનું બીજું સૌથી મોટું એન્ટરપ્રાઇઝ બિઝનેસ બની ગયું છે.
મોટી બેન્કો પણ AIમાં કરી રહી છે ભારે રોકાણ
એક તરફ AI કંપનીઓ નવી ફાઇનાન્સિયલ સર્વિસિસ વિકસાવી રહી છે, તો બીજી તરફ મોટી ઇન્વેસ્ટમેન્ટ બેન્કો પણ AI ટેક્નોલોજીમાં અબજો ડોલરનું રોકાણ કરી રહી છે. JPMorgan દર વર્ષે ટેક્નોલોજી પર અંદાજે 18 બિલિયન ડોલર ખર્ચે છે, જેમાં મોટો હિસ્સો AI માટે ફાળવવામાં આવે છે. જ્યારે Goldman Sachs પણ ટેક્નોલોજી પર દર વર્ષે આશરે 6 બિલિયન ડોલરનું રોકાણ કરી રહી છે.