VIDEO: Auto News / સુઝુકીની મોટી તૈયારી; પેટ્રોલ-CNG નહીં, હવે હાઇડ્રોજન પર દોડશે કાર
છેલ્લું અપડેટ : 07 May 2026
મારુતિ સુઝુકી સ્વિફ્ટ ભારતીય બજારની સૌથી લોકપ્રિય કારોમાંની એક છે. માત્ર ભારત જ નહીં, પરંતુ દુનિયાના અન્ય ઘણા દેશોમાં પણ સ્વિફ્ટને ખૂબ પસંદ કરવામાં આવે છે. ગ્લોબલ માર્કેટમાં આ કાર મલ્ટીપલ પાવરટ્રેનમાં ઉપલબ્ધ છે. અલગ-અલગ માર્કેટમાં તેના પેટ્રોલ, ટર્બો પેટ્રોલ, ડીઝલ, માઈલ્ડ હાઈબ્રિડ અને સીએનજી વેરિઅન્ટ્સ વેચાય છે.
હવે આ કાર એક નવા પ્રકારના ફ્યુઅલ ઓપ્શનમાં આવી શકે છે. કંપનીએ આ કારનું હાઇડ્રોજન એન્જિન વાળું વેરિઅન્ટ રજૂ કર્યું છે. આ કારને વિયેના મોટર સિમ્પોઝિયમ 2026માં પ્રદર્શિત કરવામાં આવી છે. હાઇડ્રોજન વ્હીકલ્સ લાંબા સમયથી આપણી વચ્ચે અસ્તિત્વ ધરાવે છે.
હાઇડ્રોજન કાર કેવી રીતે કામ કરે છે?
આ કારોમાં હાઇડ્રોજન ફ્યુઅલ સેલ્સનો ઉપયોગ હાઇડ્રોજનમાંથી વીજળી બનાવવા માટે કરવામાં આવે છે. આ હાઇડ્રોજન કારની ટેન્કમાં સ્ટોર હોય છે. આ વીજળીની મદદથી બેટરી ચાર્જ કરવામાં આવે છે, જે કારમાં લાગેલી ઇલેક્ટ્રિક મોટર્સને પાવર આપે છે. આ રીતે એક હાઇડ્રોજન કાર રસ્તા પર દોડે છે. આ સમગ્ર પ્રક્રિયામાં માત્ર પાણી જ બહાર નીકળે છે, એટલે કે પ્રદૂષણની કોઈ ચિંતા રહેતી નથી.
જોકે, હવે ટેકનોલોજી એડવાન્સ થઈ રહી છે, જેમાં હાઇડ્રોજનનો ઉપયોગ સીધો જ ઈંધણ (ફ્યુઅલ) તરીકે કરવામાં આવે છે. એટલે કે તેનાથી વીજળી બનાવવાની જરૂર રહેતી નથી. મોબિલિટી ટેકનોલોજી કંપની 'એવીએલ' (AVL) અને સુઝુકી મોટર કોર્પોરેશન દ્વારા હાઇડ્રોજન એન્જિનની દિશામાં કંઈક ખાસ તૈયાર કરવામાં આવ્યું છે.
કંપની તેને 2026 વિયેના મોટર સિમ્પોઝિયમમાં બતાવી રહી છે. આ ટેકનોલોજીને એક સુઝુકી સ્વિફ્ટમાં દર્શાવવામાં આવશે. આ કાર પ્રોટોટાઇપ હાઇડ્રોજન એન્જિન પર ચાલશે, જેને કંપની 'હાઇડ્રોજન ડીઆઈ ટેકનોલોજી' (Hydrogen DI Technology) કહી રહી છે. એવીએલની આ સિસ્ટમ સુઝુકીના 1.4 લિટર ફોર સિલિન્ડર હાઇડ્રોજન એન્જિન પર લગાવવામાં આવી છે.
ભારતમાં અત્યારે શું સ્થિતિ છે?
જોકે ભારતમાં અત્યારે હાઇડ્રોજન કાર્સ વેચાતી નથી. તેમ છતાં, ભવિષ્યમાં ઓટો સેક્ટર કઈ દિશામાં વળાંક લેશે તે કહી શકાય તેમ નથી. માર્ગ પરિવહન મંત્રી નિતિન ગડકરી ભારતમાં ગ્રીન ફ્યુઅલ અને કાર્બન ફૂટપ્રિન્ટ ઘટાડવા પર સતત ભાર મૂકતા રહે છે. હાલમાં ભારતમાં ઇલેક્ટ્રિક અને હાઇબ્રિડ કારોને પ્રોત્સાહન આપવામાં આવી રહ્યું છે.
સાથે જ ઇથેનોલ બ્લેન્ડિંગ વધારવા પર પણ વિચાર કરવામાં આવી રહ્યો છે. આવી સ્થિતિમાં હાઇડ્રોજન એક બહેતર અને વ્યવહારુ વિકલ્પ બની શકે છે. હાલમાં કોચી એરપોર્ટ પર એક હાઇડ્રોજન સ્ટેશન સેટઅપ કરવામાં આવ્યું છે. આ સ્ટેશન એરપોર્ટ પર ચાલતી હાઇડ્રોજન બસો અને અન્ય વાહનો માટે તૈયાર કરાયું છે.
