અમદાવાદના રાજા ગણેશ મહોત્સવનો સતત 20મા વર્ષે ભવ્ય પ્રારંભ

શ્રી શારદા કોમ્યુનિકેશન દ્વારા આયોજિત મહોત્સવમાં ઇકો-ફ્રેન્ડલી ગણેશજીની મંગલમૂર્તિનું સ્થાપન

અમદાવાદ: વિઘ્નહર્તા ભગવાન શ્રી ગણેશજીના પાવન ગણેશોત્સવને લઈને સમગ્ર અમદાવાદ શહેર ભક્તિના રંગે રંગાઈ ગયું છે. શહેરના વિવિધ વિસ્તારોમાં ગણેશજીની પ્રતિમાઓનું સ્થાપન કરવામાં આવી રહ્યું છે, ત્યારે નહેરુનગર નજીક સહજાનંદ કોલેજ ચાર રસ્તા પાસે શ્રી શારદા કોમ્યુનિકેશન દ્વારા આયોજિત ‘અમદાવાદના રાજા સાર્વજનિક ગણેશ મહોત્સવ’નો સતત 20મા વર્ષે ભવ્ય પ્રારંભ થયો છે.

આ ગણેશ મહોત્સવનું આયોજન શ્રી શારદા કોમ્યુનિકેશનના સંચાલક આનંદ દોશીના માર્ગદર્શન હેઠળ કરવામાં આવી રહ્યું છે. છેલ્લા બે દાયકાથી ચાલી આવતી આ ધાર્મિક પરંપરાને લઈને આયોજકો તેમજ સ્થાનિક ભક્તોમાં વિશેષ ઉત્સાહ જોવા મળી રહ્યો છે. ગણેશોત્સવના પ્રારંભ સાથે જ સમગ્ર વિસ્તાર ‘ગણપતિ બાપ્પા મોરિયા’ના જયઘોષથી ગુંજી ઉઠ્યો છે.

મહોત્સવ અંતર્ગત રાજાધિરાજ ગજાનન શ્રી ગણેશજીની ઇકો-ફ્રેન્ડલી મૂર્તિનું વિધિવત્ સ્થાપન કરવામાં આવ્યું છે. ગણેશજીની ભવ્ય અને મનમોહક પ્રતિમાને આયોજકો તથા સ્થાનિક ભક્તો દ્વારા આકર્ષક શણગાર કરવામાં આવ્યો છે. બાપ્પાના દર્શન અને આશીર્વાદ મેળવવા માટે અમદાવાદના વિવિધ વિસ્તારોમાંથી તેમજ શહેરની બહારથી પણ મોટી સંખ્યામાં શ્રદ્ધાળુઓ અહીં પહોંચી રહ્યા છે.

ગણેશ મહોત્સવ દરમિયાન દરરોજ રાત્રે ભવ્ય મહાઆરતીનું આયોજન કરવામાં આવી રહ્યું છે. મહાઆરતીમાં મોટી સંખ્યામાં ભક્તો ઉપસ્થિત રહી ગણપતિ બાપ્પાના દર્શન કરી આરતીનો લાભ લઈ રહ્યા છે. મહાઆરતી દરમિયાન ‘ગણપતિ બાપ્પા મોરિયા’ના જયઘોષથી સમગ્ર વિસ્તાર ભક્તિમય બની જાય છે અને આસપાસનું વાતાવરણ પણ આસ્થાથી ભરાઈ ઊઠે છે.

‘અમદાવાદના રાજા’ ગણેશ મહોત્સવની વિશેષતા એ છે કે અહીં ધાર્મિક આસ્થા સાથે પર્યાવરણ સંરક્ષણનો સંદેશ પણ આપવામાં આવી રહ્યો છે. ઇકો-ફ્રેન્ડલી ગણેશજીની મૂર્તિ સ્થાપિત કરીને ગણેશોત્સવની ઉજવણી દરમિયાન પર્યાવરણને નુકસાન ન થાય અને લોકોમાં પર્યાવરણ પ્રત્યે જાગૃતિ વધે તેવો સંદેશ આપવામાં આવી રહ્યો છે.

સતત 20મા વર્ષમાં પ્રવેશેલા આ ગણેશ મહોત્સવને વધુ ભવ્ય અને યાદગાર બનાવવા માટે શ્રી શારદા કોમ્યુનિકેશનના સંચાલક આનંદ દોશી સહિત આયોજકો દ્વારા વિવિધ ધાર્મિક અને ભક્તિમય કાર્યક્રમોનું આયોજન કરવામાં આવ્યું છે. આગામી દિવસોમાં પણ મહાઆરતી સહિતના વિવિધ કાર્યક્રમોમાં મોટી સંખ્યામાં ભક્તો જોડાય તેવી અપેક્ષા છે.

અહીંથી ‘અમદાવાદના રાજા’ ગણેશજીની ભવ્ય વિસર્જન યાત્રા ગણેશ સ્થાપનાના સાતમા દિવસે એટલે કે 20 તારીખે સાંજે નીકળશે. વિસર્જન યાત્રામાં પણ મોટી સંખ્યામાં ભક્તો જોડાય તેવી શક્યતા છે.

આમ, છેલ્લા બે દાયકાથી અમદાવાદમાં શ્રદ્ધા, ભક્તિ અને પર્યાવરણ જાગૃતિનો સંદેશ ફેલાવતો ‘અમદાવાદના રાજા’ ગણેશ મહોત્સવ આ વર્ષે પણ ભક્તો માટે આસ્થાનું મહત્વનું કેન્દ્ર બન્યો છે. ગણેશજીના દર્શન માટે ઉમટી રહેલા શ્રદ્ધાળુઓમાં પણ ભારે ઉત્સાહ જોવા મળી રહ્યો છે.