શ્રી રેસીડેન્સી સોસાયટી બન્યુ ગોકુલ ધામ

પાટણ, તા. 5: પાટણ શહેરમાં જન્માષ્ટમી પર્વની ભક્તિભાવ અને ઉત્સાહ સાથે ઉજવણી થઈ રહી છે ત્યારે પદ્મનાભ ચોકડી નજીક આવેલી શ્રી રેસીડેન્સી સોસાયટીમાં પણ જન્માષ્ટમી નિમિત્તે ભક્તિમય માહોલ જોવા મળ્યો હતો.

શ્રી રેસીડેન્સી સોસાયટીમાં ગલી-ગલી અને ઘરે-ઘરે ભગવાન શ્રીકૃષ્ણના જન્મોત્સવની ઉજવણી કરવામાં આવી હતી. રહીશોએ પોતાના ઘરોને સુંદર રીતે શણગારી ભગવાન શ્રીકૃષ્ણની પૂજા-અર્ચના કરી હતી. બાળકો, યુવાનો અને વડીલોએ ઉત્સાહપૂર્વક ઉજવણીમાં ભાગ લીધો હતો.

જન્માષ્ટમી નિમિત્તે સોસાયટીમાં વિવિધ ધાર્મિક કાર્યક્રમો યોજાયા હતા. ખાસ કરીને ગરબા અને મટકી ફોડ કાર્યક્રમમાં બાળકો તથા યુવાનોમાં ભારે ઉત્સાહ જોવા મળ્યો હતો. મટકી ફોડ દરમિયાન ‘જય કનૈયા લાલ કી’ અને ‘નંદ ઘેર આનંદ ભયો’ના જયઘોષથી સમગ્ર સોસાયટી કૃષ્ણમય બની ગઈ હતી.

સોસાયટીની ગલીઓમાં ધાર્મિક ગીતો સાથે ગરબાની રમઝટ જોવા મળી હતી. મહિલાઓ અને યુવતીઓએ પરંપરાગત વસ્ત્રોમાં ગરબા રમી ઉજવણીને વધુ રંગીન બનાવી હતી. કેટલાક યુવાનોએ કૃષ્ણ-રાધાનો વેશ ધારણ કરી સૌનું ધ્યાન ખેંચ્યું હતું.

આ પ્રસંગે સોસાયટીના રહીશો મોટી સંખ્યામાં એકત્રિત થયા હતા અને પરિવાર સાથે ધાર્મિક કાર્યક્રમોમાં જોડાઈ કૃષ્ણ જન્મોત્સવનો આનંદ માણ્યો હતો.

આમ, શ્રી રેસીડેન્સી સોસાયટીમાં કૃષ્ણના જયઘોષ, ભક્તિગીતો અને ગરબાની રમઝટ વચ્ચે જન્માષ્ટમીની ભવ્ય ઉજવણી કરવામાં આવી હતી. સમગ્ર સોસાયટી જાણે ગોકુળધામમાં ફેરવાઈ ગઈ હોય તેવો સુંદર અને ભક્તિમય માહોલ સર્જાયો હતો