પદ્મશ્રી સવજીભાઈ ઘોળકીયા અને ગુજરાત સરકારના સહયોગથી મતીરાળાની જંમકુડી નદી છલોછલ ભરાઈ

જમકુડી નદીમાં નવા નીરના વધામણા : માત્ર ૧૨૦ દિવસમાં કાયાપલટ થતા બોટ અને જેટસ્કીથી આનંદોત્સવ ઉજવાયો ​- ગુજરાત સરકાર અને ધોળકિયા ફાઉન્ડેશનના સંયુક્ત પ્રયાસોથી જમકુડી નદીમાં સર્જાઈ જળ ક્રાંતિ ​- ૧ એપ્રિલના રોજ મુખ્યમંત્રીના હસ્તે થયેલા ખાતમુહૂર્ત બાદ માત્ર ૪ મહિનામાં કરોડો લીટર પાણીનો સંગ્રહ ​- નદીમાં પ્રથમવાર પાણી ભરાતા ગ્રામજનો દ્વારા બોટ અને જેટસ્કી ચલાવીને ઉજવાયો ઉત્સવ ​ મતીરાળા ખાતે સમસ્ત ગ્રામજનો દ્વારા ઉત્સાહભેર જમકુડી નદીમાં નવા નીરના વધામણા કરવામાં આવ્યા છે. અલી ઉદયપુર-માલવિયા, પીપરિયા, મતીરાડા, કેરાડા, અકાડા અને કૃષ્ણગઢથી લુવારિયા, કાગળિયા નદી તરફ વહેતી જમકુડી નદી બાબતે એક સમયની લોકવાયકા અને કહેવત હતી કે આ નદીમાં પાણી ક્યારેય ટકતું નથી. પરંતુ ગુજરાત સરકારના સહયોગ અને ધોળકિયા ફાઉન્ડેશનના પ્રણેતા પદ્મશ્રી સવજીભાઈ ધોળકિયાના માર્ગદર્શન હેઠળ હાથ ધરવામાં આવેલા જળ સંરક્ષણના કાર્યોએ આ કહેવતને હંમેશા માટે ખોટી સાબિત કરી દીધી છે. માત્ર ૧૨૦ દિવસમાં ઐતિહાસિક સિદ્ધિ અને ખાતમુહૂર્ત   ​આ મહત્ત્વપૂર્ણ જળ સંરક્ષણ કાર્યનું ખાતમુહૂર્ત ગત ૧ એપ્રિલ ૨૦૨૬ ના રોજ માનનીય મુખ્યમંત્રી સાહેબના વરદ્ હસ્તે કરવામાં આવ્યું હતું. માત્ર ૧૨૦ દિવસ (ચોક્કસ ચાર મહિના) જેટલા અત્યંત ટૂંકા ગાળામાં ગુજરાત સરકાર અને ધોળકિયા ફાઉન્ડેશનના સંયુક્ત સહયોગથી, પદ્મશ્રી સવજીભાઈ ધોળકિયા તથા પ્રોજેક્ટ મેનેજર કાનક પટેલ અને તેમની પૂરી ટીમ દ્વારા અદભુત કામગીરી કરીને આ પ્રોજેક્ટને આટલા ભવ્ય સ્તરે લઈ જવામાં આવ્યો છે અને જમકુડી નદીમાં કરોડો લીટર પાણીનો સંગ્રહ કરવામાં સફળતા મળી છે. ​ ઐતિહાસિક જળસંગ્રહ અને બોટ-જેટસ્કીનું આકર્ષણ અલી ઉદયપુર-માલવિયાથી શરૂ થઈને પીપરિયા, મતીરાડા, કેરાડા, અકાડા અને કૃષ્ણગઢ થઈને લુવારિયા, કાગળિયા નદી તરફ વહેતી જમકુડી નદીના ૧૦ કિલોમીટરના વિસ્તારમાં જળ સંરક્ષણની વ્યાપક કામગીરી કરવામાં આવી છે. આ વિસ્તારમાં ૪૫ ફૂટનો ઊંચો ઢાળ હોવાને કારણે અગાઉ પાણી વહી જતું હતું, પરંતુ ગુજરાત સરકાર અને ધોળકિયા ફાઉન્ડેશનના સહયોગથી તથા પ્રોજેક્ટ ટીમ દ્વારા ૩ થી ૪ નાના ચેકડેમ, કાચી માટીના તથા ટેમ્પરરી બોરીબંધ બનાવીને પાણી રોકવામાં આવ્યું છે. ​નદીના ઇતિહાસમાં પહેલીવાર આટલી મોટી માત્રામાં પાણીનો સંગ્રહ થયો છે, જેના કારણે નદી બે કાંઠે વહેતી થઈ છે. આ અદ્ભુત દ્રશ્યો જોઈને ગ્રામજનોનો ઉત્સાહ બેવડાઈ ગયો હતો. નવા નીરના આ વિરાટ સંગ્રહને વધાવવા માટે નદીના પાણીમાં બોટ અને જેટસ્કી (Jet Ski) ચલાવીને અનોખી ખુશી વ્યક્ત કરવામાં આવી હતી અને યુવાનો તથા ગ્રામજનોએ ઉત્સવ જેવું વાતાવરણ સર્જ્યું હતું. ​ જળ સંરક્ષણ અને તેના વ્યાપક લાભો ​ ટૂંકા ગાળામાં જળ ક્રાંતિ: માત્ર ૪ મહિનામાં જ અકલ્પનીય જળસંગ્રહ થવાથી આસપાસના ગ્રામીણ વિસ્તારોમાં ભૂગર્ભ જળસ્તર ઊંચા આવ્યા છે. ​ગ્રામીણ સમૃદ્ધિ: ગુજરાત સરકાર અને ધોળકિયા ફાઉન્ડેશનની સહિયારી મહેનતથી અલી ઉદયપુર-માલવિયા, પીપરિયા, મતીરાડા, કેરાડા, અકાડા, કૃષ્ણગઢ, લુવારિયા અને કાગળિયા નદી તરફના આસપાસના ગામોના ખેડૂતો અને પશુપાલકો માટે સિંચાઈ તથા પીવાના પાણીની મોટી સમસ્યા હલ થઈ છે. ​પર્યાવરણ અને જીવસૃષ્ટિ: આ જળસંચયથી વન્ય પ્રાણીઓ, પશુ-પક્ષીઓ અને માલધારીઓને મોટો ફાયદો થયો છે તથા સમગ્ર પ્રદેશ હરિયાળો બન્યો છે.   ​પદ્મશ્રી સવજીભાઈ ધોળકિયા અને ટીમનું ભવ્ય સન્માન ​ પ્રકૃતિના આ અદ્ભુત પ્રસાદ અને જળ ક્રાંતિ બદલ મતીરાળા સમસ્ત ગામ દ્વારા પદ્મશ્રી સવજીભાઈ ધોળકિયા, ધોળકિયા ફાઉન્ડેશન તેમજ પ્રોજેક્ટ મેનેજર કનક પટેલ અને તેમની સમગ્ર ટીમનું વિશેષ સન્માન કરવામાં આવ્યું હતું. પ્રકૃતિ સંવર્ધનની આ પહેલ ગુજરાત સરકારના સહયોગથી સમગ્ર વિસ્તાર માટે એક પ્રેરણારૂપ મિસાલ બની રહી છે.