ફતેપુરા પંચાયતમાં જન્મના દાખલા માટે 200 રૂપિયા ઉઘરાવતા ભ્રષ્ટ VCE વિજય પરમારને ફરજ મુક્ત કરાયા

ફતેપુરા પંચાયતમાં જન્મના દાખલા માટે 200 રૂપિયા ઉઘરાવતા ભ્રષ્ટ VCE વિજય પરમારને ફરજમુક્ત કરાયા

  વીડિયો વાયરલ થતા જ તાલુકા વિકાસ અધિકારીએ તપાસના આદેશ આપ્યા હતા, ભ્રષ્ટાચાર સાબિત થતા તલાટીએ VCEને પદ પરથી હટાવી ફોજદારી કાર્યવાહીની આપી ચીમકી   દાહોદ જિલ્લાના ફતેપુરા તાલુકા મથકે આવેલી ગ્રામ પંચાયત કચેરીમાં જનતાની મજબૂરીનો ફાયદો ઉઠાવી ગેરકાયદે નાણાં ખંખેરતા વિલેજ કોમ્પ્યુટર આંત્રપ્રિન્યોર (VCE) સામે તંત્રએ લાલ આંખ કરી છે. જન્મના પ્રમાણપત્ર આપવા માટે નિયત ફી કરતા અનેકગણા વધુ રૂપિયા લેતા VCE વિજયભાઈ નારણભાઈ પરમારનો વીડિયો વાયરલ થયા બાદ, તાલુકા વિકાસ અધિકારી (TDO) એ કડક વલણ અપનાવી તેને તાત્કાલિક અસરથી ફરજમુક્ત કરવાનો આદેશ કર્યો છે.   પ્રાપ્ત વિગતો અનુસાર, ફતેપુરા ગ્રામ પંચાયતમાં VCE તરીકે ફરજ બજાવતા વિજય પરમાર દ્વારા અરજદારો પાસેથી જન્મનું પ્રમાણપત્ર કાઢી આપવાના બદલામાં બિન્દાસ રીતે 200 રૂપિયાની માંગણી કરવામાં આવતી હતી. આ ગેરકાયદે ઉઘરાણીનો વીડિયો સોશિયલ મીડિયામાં વાયુવેગે વાયરલ થયો હતો. વીડિયોમાં કર્મચારી જે રીતે કોઈપણ ડર વગર નાણાં સ્વીકારી રહ્યો હતો, તેનાથી પંચાયત વહીવટની પારદર્શિતા સામે ગંભીર સવાલો ઉભા થયા હતા.   સરકારના આરોગ્ય અને પરિવાર કલ્યાણ વિભાગના ૨૭ ફેબ્રુઆરી ૨૦૨૫ના નોટિફિકેશન મુજબ, જન્મ-મરણના દાખલા માટે ફીના ધોરણો નક્કી કરવામાં આવ્યા છે, જેમાં 21 દિવસની અંદર મળતી સેવા નિઃશુલ્ક હોય છે. તેમ છતાં, VCE દ્વારા કરાતી આ લૂંટની ગંભીર નોંધ લઈને તાલુકા વિકાસ અધિકારીએ ગત 8 મે 2026ના રોજ પત્ર લખીને તપાસ બાદ કાર્યવાહી કરવા નિર્દેશ આપ્યો હતો.   તાલુકા વિકાસ અધિકારીના કડક આદેશના પગલે આજે સોમવારે ૧૧ મે ૨૦૨૬ના રોજ ફતેપુરા ગ્રામ પંચાયતના તલાટી-કમ-મંત્રી અને સરપંચ દ્વારા સંયુક્ત રીતે VCE વિજય પરમારને ફરજમુક્ત કરતો લેખિત હુકમ સોંપવામાં આવ્યો હતો. આ હુકમમાં સ્પષ્ટ જણાવાયું છે કે, નિયત ફી કરતા વધુ નાણાં વસૂલવાનું કૃત્ય ગંભીર છે, તેથી તેને તાત્કાલિક અસરથી છૂટો કરવામાં આવે છે.   તંત્રએ માત્ર ફરજમુક્ત કરીને સંતોષ નથી માન્યો, પરંતુ કડક શરતો પણ લાદી છે. પંચાયત દ્વારા VCE ને તમામ સરકારી આઈ.ડી. અને પાસવર્ડ તલાટીને સુપ્રત કરવા જણાવવામાં આવ્યું છે. જો આ પ્રક્રિયામાં કોઈ પણ પ્રકારની ક્ષતિ કે આનાકાની કરવામાં આવશે, તો તેની સામે ફોજદારી (ક્રિમિનલ) રાહે કાર્યવાહી કરવામાં આવશે તેવી ગંભીર નોંધ લેખિતમાં આપવામાં આવી છે. તંત્રની આ આકરી કાર્યવાહીથી પંચાયત આલમમાં ભ્રષ્ટાચાર આચરતા તત્વોમાં ફફડાટ વ્યાપી ગયો છે.