વિરપુર તાલુકામાં મતદાર યાદીમાં એક જ વ્યક્તિના નામે ચાર એપીક કાર્ડ બન્યા

મહિસાગર જીલ્લાના વિરપુર તાલુકામાં મતદારયાદી સુધારણાના સરકારી દાવાઓ અને તંત્રની કામગીરી વચ્ચે તાલુકામાં એક મોટી બેદરકારી સામે આવી છે. વિરપુરના લીમરવાડા ગામની મતદાર યાદીમાં એક જ વ્યક્તિના ચાર અલગ-અલગ એપીક નંબર સાથે નામ હોવાનો કિસ્સો પ્રકાશમાં આવતા ચકચાર મચી ગઈ છે. વિરપુર તાલુકામાં તાજેતરમાં જ સંપન્ન થયેલી મતદારયાદી સુધારણા કાર્યક્રમ બાદ પણ તંત્રની ઘોર બેદરકારી ઉઘાડી પડી છે.

લીમરવાડા ગામના કુલદીપસિંહ પુષ્પકસિંહ રાઠોડ નામની વ્યક્તિના મતદાર યાદીમાં એક-બે નહીં પરંતુ ચાર વખત નામ નોંધાયેલા જોવા મળ્યા છે. સૌથી ગંભીર બાબત એ છે કે, આ ચારેય એન્ટ્રીમાં અલગ-અલગ એપીક (EPIC) નંબર ફાળવવામાં આવ્યા છે.આ સાથે તંત્ર દ્વારા કરવામાં આવેલા મતદારયાદી સુધારણાના દાવાઓ આ કિસ્સાથી પોકળ સાબિત થયા છે.

આ પ્રકારની ગંભીર ભુલને પગલે સમગ્ર યાદીમાં અન્ય કેટલા છબરડાં હશે ? તે અંગે તપાસની માંગ ઉઠી છે. આ બેદરકારી બદલ બીએલઓથી લઈને લાયઝન અધિકારી સુધીના તમામ જવાબદારો સામે કડક કાર્યવાહી કરવાની માંગણી કરવામાં આવી છે. આ અંગે વિરપુર તાલુકાના મામલતદાર એસ.ડી. પટેલે જણાવ્યું હતું કે, આ અંગે તપાસ કરવામાં આવશે.