મહેસાણા જિલ્લા પ્રાથમિક શિક્ષક સંઘના પ્રમુખ રાકેશકુમાર બાબુલાલ પટેલનું આકસ્મિક અવસાન

મહેસાણા જિલ્લા પ્રાથમિક શિક્ષક સંઘના પ્રમુખ તથા વિજાપુર તાલુકાના ગોવિંદપુરા ગામના વતની  રાકેશકુમાર બાબુલાલ પટેલનું આજે આકસ્મિક અવસાન થયું છે. તેમના અવસાનથી સમગ્ર શિક્ષક જગત સહિત શૈક્ષણિક અને સામાજિક ક્ષેત્રમાં ઘેરો શોક વ્યાપી ગયો છે. શ્રી પટેલ સરળ સ્વભાવ, સકારાત્મક વિચારધારા અને અડીખમ નેતૃત્વ માટે વિશેષ ઓળખ ધરાવતા હતા.

શિક્ષકોના હિત માટે સતત પ્રયત્નશીલ રહેલા રાકેશકુમાર પટેલે વિજાપુર તાલુકા પ્રાથમિક શિક્ષક સંઘના મંત્રી તથા પ્રમુખ તરીકે તેમજ મહેસાણા જિલ્લાના મહામંત્રી અને જિલ્લા સંયુક્ત મોરચાના પ્રમુખ તરીકે પણ સેવાઓ આપી હતી. તેઓ માત્ર પદાધિકારી જ નહોતા, પરંતુ શિક્ષકોના પ્રશ્નોને પોતાની જવાબદારી માનીને તેના ઉકેલ માટે હંમેશા સક્રિય રહેતા. તેમનું નેતૃત્વ શાંત, સંયમિત અને અસરકારક હતું. તેમની કાર્યશૈલી, સહજ વર્તન અને દરેક પરિસ્થિતિમાં હકારાત્મક અભિગમને કારણે તેઓ સૌમાં લોકપ્રિય હતા. તેમના આકસ્મિક અવસાનથી શિક્ષક સમાજે એક માર્ગદર્શક અને પ્રેરણાદાયી વ્યક્તિત્વ ગુમાવ્યું છે, જેની ખોટ લાંબા સમય સુધી અનુભવાશે. પરમાત્મા દિવંગત આત્માને શાંતિ અર્પે અને શોકાકુલ પરિવારજનો, સહયોગીઓ તેમજ સમગ્ર શિક્ષક સમુદાયને આ અપૂરણીય ક્ષતિ સહન કરવાની શક્તિ આપે. રાકેશકુમાર બાબુલાલ પટેલ દ્વારા શિક્ષણ અને સમાજ માટે કરવામાં આવેલી સેવાઓ હંમેશા સન્માન અને કૃતજ્ઞતાપૂર્વક સ્મરણમાં રહેશે.