VIDEO: ANDARNI VAAT / બલરામપુરના ગામડાઓમાં હવે ક્યારેય નહીં સર્જાય જળસંકટ, ‘મોર ગાવ મોર પાની’ અભિયાનથી ધરતી માતા થઈ તૃપ્ત!

છત્તીસગઢના બલરામપુર જિલ્લામાંથી જળ સંરક્ષણ અને ગ્રામીણ વિકાસને પ્રોત્સાહન આપતો એક અત્યંત પ્રેરણાદાયી અને સકારાત્મક અહેવાલ સામે આવ્યો છે. બલરામપુર વહીવટી તંત્ર દ્વારા શરૂ કરવામાં આવેલા મોર ગાવ મોર પાની એટલે કે મારું ગામ મારું પાણી અભિયાન અંતર્ગત સમગ્ર જિલ્લામાં જળ સુરક્ષાને મજબૂત કરવા માટે ભગીરથ પ્રયાસો હાથ ધરવામાં આવ્યા છે. આ ખાસ ઝુંબેશ હેઠળ ભૂગર્ભ જળસ્તરને ઊંચું લાવવા અને વરસાદી પાણીના સંગ્રહ માટે પહાડી અને ઢોળાવવાળા વિસ્તારોમાં ૨૫૦૦ થી વધુ કન્ટૂર ટ્રેન્ચ એટલે માટીના ખાસ ખાડાનું સફળતાપૂર્વક નિર્માણ કરવામાં આવ્યું છે. કુદરતી પાણીનો વેડફાટ અટકાવતી આ પદ્ધતિથી જિલ્લાના અનેક ગામડાઓમાં કૂવા અને બોરવેલના જળસ્તરમાં નોંધપાત્ર સુધારો જોવા મળ્યો છે, જેના લીધે વર્ષોથી પાણીની કટોકટીનો સામનો કરી રહેલા ગ્રામજનોને મોટી રાહત મળી છે..

આ ભગીરથ જળ અભિયાનની સફળતા અંગે બલરામપુરના કલેક્ટર ચંદન સંજય ત્રિપાઠીએ મહત્વપૂર્ણ વિગતો આપતા જણાવ્યું છે કે, આ યોજના માત્ર જળ સંરક્ષણ સુધી સીમિત નથી, પરંતુ તેનાથી સ્થાનિક ગ્રામીણોને મોટા પાયે રોજગારીની તકો પણ સાંપડી છે. સ્થાનિક રહીશો અને જનપ્રતિનિધિઓના સક્રિય ભાગીદારીથી આ સરકારી અભિયાન હવે એક વ્યાપક લોક આંદોલનમાં પરિવર્તિત થઈ ગયું છે. વહીવટી તંત્રના આ અથાક પ્રયાસોને પગલે જમીનનું ધોવાણ અટક્યું છે અને ખેતીલાયક જમીનની ફળદ્રુપતામાં પણ વધારો થયો છે. મોર ગાવ મોર પાની અભિયાનની સફળતાના વિઝ્યુઅલ્સ સોશિયલ મીડિયા પર વાયરલ થઈ રહ્યા છે અને સમગ્ર રાજ્યમાં બલરામપુર જિલ્લાના આ મોડેલની ભારોભાર પ્રશંસા થઈ રહી છે..

બ્યૂરો રિપોર્ટ જીએસટીવી