VIDEO: ANDARNI VAAT / રાજૌરીના મલિક માર્કેટમાં પૂરનો પ્રકોપ, ઘરો અને દુકાનોમાં પાણી ઘૂસતાં ભારે તારાજી!

જમ્મુ-કાશ્મીરના રાજૌરી જિલ્લામાં આકાશી આફતે ભારે તબાહી મચાવી છે. અવિરત પડી રહેલા મુશળધાર વરસાદને કારણે રાજૌરીના પ્રસિદ્ધ મલિક માર્કેટ વિસ્તારમાં પૂરના ધસમસતા પાણી ઘૂસી જતાં મોટી અનારત સર્જાઈ છે. પૂરના કાદવયુક્ત પાણી લોકોના ઘરો અને વેપારીઓની દુકાનોમાં ફરી વળતાં કરોડો રૂપિયાનો સામાન પલળીને નષ્ટ થઈ ગયો છે. માર્કેટ વિસ્તારમાં આવેલા અનેક મકાનો અને વેપારી મથકોને ભારે આર્થિક નુકસાન પહોંચ્યું છે, જેના કારણે સ્થાનિક રહેવાસીઓ અને વેપારીઓ મુશ્કેલીમાં મુકાઈ ગયા છે. અચાનક આવી પડેલી આ હોનારતને પગલે સમગ્ર મલિક માર્કેટમાં અફરાતફરીનો માહોલ સર્જાયો હતો અને લોકો પોતાની માલ-મિલકત બચાવવા માટે સતત મથામણ કરતા જોવા મળ્યા હતા.

પૂરના પ્રચંડ પ્રવાહને કારણે વિસ્તારના માર્ગો પર પણ વ્યાપક ધોવાણ થતાં વાહનવ્યવહાર ઠપ્પ થઈ ગયો છે. માર્કેટમાં રહેલો કિંમતી સ્ટોક અને ઘરવખરી પૂરના પાણીમાં તણાઈ જવાથી સ્થાનિક નાગરિકો આર્થિક રીતે પાયમાલ થઈ ગયા છે. ઘટનાની જાણ થતાં જ વહીવટી તંત્ર અને આપત્તિ બચાવ ટુકડીઓએ પ્રભાવિત વિસ્તારમાં પહોંચીને સ્થાનિક લોકોને મદદરૂપ થવાની કામગીરી શરૂ કરી છે. પૂરના પાણી ઓસર્યા બાદ કાદવ-કીચડ દૂર કરવા અને નુકસાનીનું આંકલન કરવા માટે રાહત કામગીરી ઝડપી બનાવવામાં આવી છે. આ આકાશી હોનારતને કારણે સમગ્ર રાજૌરી ક્ષેત્રમાં જનજીવન અસ્તવ્યસ્ત થઈ ગયું છે..

બ્યૂરો રિપોર્ટ જીએસટીવી