VIDEO: ANDARNI VAAT / પહલગામના અવોરા નાલામાં વાદળ ફાટતાં તબાહી, ધસમસતા પાણીના પ્રવાહે મચાવી ભારે અફરાતફરી!

જમ્મુ-કાશ્મીરના વિશ્વપ્રસિદ્ધ પ્રવાસન સ્થળ પહલગામ નજીકના અવોરા નાલા વિસ્તારમાં અચાનક વાદળ ફાટવાની ભયાનક ઘટના સામે આવી છે. વાદળ ફાટવાને કારણે અવોરા નાળામાં ક્ષણભરમાં પૂરની સ્થિતિ સર્જાઈ હતી અને પાણીનો પ્રચંડ પ્રવાહ ધસી આવ્યો હતો. ધસમસતા પાણી અને કાદવના પ્રવાહે આસપાસના વિસ્તારોમાં ભારે અફરાતફરી મચાવી દીધી હતી, જેનાથી સ્થાનિક રહીશો અને યાત્રિકોમાં દહેશતનો માહોલ ફેલાઈ ગયો હતો. પહાડો પરથી વહી આવેલા કાંપ અને પથ્થરોના કારણે નાળા કિનારે આવેલા માર્ગો તેમજ ખેતરોને મોટું નુકસાન પહોંચ્યું છે. સ્થાનિક લોકોએ તાત્કાલિક ધોરણે સુરક્ષિત સ્થળો તરફ દોડી જઈને પોતાનો જીવ બચાવ્યો હતો. આ ઘટનાને કારણે સ્થાનિક જનજીવન સંપૂર્ણપણે અસ્તવ્યસ્ત થઈ ગયું છે. તંત્ર દ્વારા ઘટનાસ્થળે પરિસ્થિતિનો તાગ મેળવવા માટે સ્થાનિક ટીમોને રવાના કરવામાં આવી છે.

આ ઘટનાની જાણ થતાં જ વહીવટી તંત્ર અને આપત્તિ વ્યવસ્થાપન ટીમો તાત્કાલિક એક્શનમાં આવી ગઈ હતી. પ્રશાસન દ્વારા અવોરા નાલા અને તેની આસપાસના નીચાણવાળા વિસ્તારોમાં રહેતા લોકોને તાત્કાલિક ધોરણે ચેતવણી આપીને સુરક્ષિત સ્થળે ખસવા અપીલ કરવામાં આવી છે. નદી-નાળાઓમાં પાણીની સપાટી ભયજનક રીતે વધતાં તંત્ર દ્વારા આસપાસના વિસ્તારોમાં એલેર્ટ જાહેર કરી દેવાયું છે. પૂરના કારણે ખોરવાયેલા માર્ગો અને નુકસાન પામેલી માળખાકીય સુવિધાઓને પુનઃસ્થાપિત કરવા માટે રાહત કામગીરી હાથ ધરવામાં આવી છે. સતત બદલાતા હવામાનને ધ્યાનમાં રાખીને પ્રવાસીઓ અને સ્થાનિકોને જળાશયો કે નાળાઓ નજીક ન જવાની સખત સૂચના આપવામાં આવી છે. સુરક્ષા દળો અને તંત્ર સતત પરિસ્થિતિ પર નજર રાખી રહ્યા છે.

બ્યૂરો રિપોર્ટ જીએસટીવી