VIDEO: બે લગ્ન કરવા પોલીસકર્મીને ભારે પડ્યા, CM હિમંત બિસ્વા સરમાનો આદેશ- 'આને આજે રાત્રે જ પકડો'

આસામમાં બે લગ્ન કરનાર એક પોલીસકર્મી વિરુદ્ધ મુખ્યમંત્રી (Chief Minister) હિમંત બિસ્વા સરમાએ કડક વલણ અપનાવતા તાત્કાલિક ધરપકડ કરવાનો આદેશ આપ્યો છે. જન સુનાવણી કાર્યક્રમ દરમિયાન એક પીડિત મહિલાએ મુખ્યમંત્રી સમક્ષ ફરિયાદ કરી હતી કે, પોલીસ વિભાગમાં ફરજ બજાવતા તેના પતિએ તેની મંજૂરી વિના બીજા લગ્ન કરી લીધા છે અને હવે તેને છૂટાછેડા (Divorce) આપવાની ધમકી આપી રહ્યો છે. મહિલાની આ આપવીતી સાંભળ્યા બાદ મુખ્યમંત્રી સરમાએ ત્યાં હાજર ઉચ્ચ અધિકારીઓને કડક સૂચના આપતા કહ્યું કે, "આની ધરપકડ કરો. આને આજે રાત્રે જ પકડો."

સરકારી કર્મચારીઓ માટે બદલાયા નિયમો

આસામ સરકાર બહુ-વિવાહ (Polygamy) ની પ્રથા નાબૂદ કરવા માટે સતત કડક પગલાં ભરી રહી છે. તાજેતરમાં જ રાજ્યના બજેટ (Budget) દરમિયાન આ પ્રથાને અટકાવવા માટેના ઘણા પ્રસ્તાવો રજૂ કરવામાં આવ્યા હતા. આસામના નાણાં મંત્રીએ જાહેરાત કરી હતી કે બહુ-વિવાહ કરનારા પુરુષોને રાજ્યની કલ્યાણકારી યોજનાઓ (Welfare Schemes) નો લાભ મળશે નહીં. આ ઉપરાંત સરકારે 'આસામ સેવા નિયમો' માં સુધારો કરવાનો પણ પ્રસ્તાવ મૂક્યો છે, જે અંતર્ગત જો કોઈ સરકારી કર્મચારી પ્રથમ પત્નીની હયાતીમાં બીજા લગ્ન કરશે તો તેને નોકરીમાંથી બરતરફ (Dismissed) કરવામાં આવી શકે છે.

સમાન નાગરિક ધારા તરફ પગલાં

અધિકારીઓના જણાવ્યા અનુસાર, આ કડક કાયદાઓનો મુખ્ય હેતુ મહિલાઓના અધિકારોને મજબૂત કરવાનો અને જાતિગત ન્યાય (Gender Justice) ને પ્રોત્સાહન આપવાનો છે. ભાજપ શાસિત રાજ્યો હાલમાં સમાન નાગરિક ધારા (Uniform Civil Code) તરફ આગળ વધી રહ્યા છે, જ્યાં તમામ નાગરિકો માટે લગ્ન અને છૂટાછેડાના સમાન નિયમો લાગુ પડે. સરકારનો દાવો છે કે કાયદાકીય રીતે દરેક વ્યક્તિને માત્ર એક જ લગ્ન કરવાનો અધિકાર હોવો જોઈએ, અને જો કોઈ વ્યક્તિ બીજા લગ્ન કરવા માંગે છે તો તેણે પહેલા કાયદેસર રીતે છૂટાછેડા લેવા ફરજિયાત રહેશે.