VIDEO: અમરેલી-લાઠી હાઇવેની અત્યંત ખરાબ હાલત: વાહનચાલકોમાં ભારે રોષ અને ફોર-લાઈન બનાવવાની માંગ

અમરેલીથી લાઠીને જોડતો મહત્વપૂર્ણ હાઇવે હાલમાં અત્યંત ખખડધજ અને બિસ્માર હાલતમાં ફેરવાઈ ગયો છે, જેના કારણે વાહનચાલકો અને મુસાફરો ભારે પરેશાનીનો સામનો કરી રહ્યા છે. આ રોડ ભાવનગર અને અમદાવાદને પણ જોડતો મુખ્ય માર્ગ છે, પરંતુ લાંબા સમયથી નવો ન બનવાને કારણે તેની સ્થિતિ દયનીય બની ગઈ છે. ખાસ કરીને લાઠી અને વરસડા નજીક રોડ પર મસમોટા ખાડાઓનું સામ્રાજ્ય ફેલાયેલું છે. સંકડા અને ક્ષતિગ્રસ્ત રસ્તાના કારણે આ હાઇવે પર અવારનવાર ગંભીર અકસ્માતો સર્જાય છે. સ્થાનિક લોકો અને વાહનચાલકો દ્વારા આ માર્ગને તાત્કાલિક ધોરણે ફોર-લાઈન બનાવવા અથવા નવો બનાવવા માટે પ્રબળ માંગ ઉઠી છે. આશ્ચર્યની વાત એ છે કે ગાંધીનગર આવન-જાવન માટે આ જ માર્ગ પરથી અવારનવાર સ્થાનિક ધારાસભ્યો અને સાંસદો પસાર થતા હોવા છતાં, જનપ્રતિનિધિઓની નજર આ જર્જરિત માર્ગ પર કેમ પડતી નથી તેવા ગંભીર સવાલો પણ લોકમુખે ચર્ચાઈ રહ્યા છે