VIDEO: અફઘાનિસ્તાનના કૃષિ મંત્રીનો પ્રથમ ભારત પ્રવાસ: વિદેશ મંત્રાલય દ્વારા કરાયું ભવ્ય સ્વાગત

અફઘાનિસ્તાનના કૃષિ, સિંચાઈ અને પશુપાલન મંત્રી મૌલવી અતાઉલ્લાહ ઓમરી હાલ ભારતના પ્રવાસે છે. ભારત આગમન પર થયેલા ભવ્ય સ્વાગત અને અહીંના વાતાવરણથી તેઓ અત્યંત પ્રભાવિત થયા છે. તેમણે ભારત અને અફઘાનિસ્તાન વચ્ચેના સદીઓ જૂના સાંસ્કૃતિક અને ભાવનાત્મક સંબંધોને રેખાંકિત કરતા એક ખૂબ જ મહત્વપૂર્ણ નિવેદન આપ્યું છે.

ભારત પ્રવાસ અને ઉષ્માભર્યું સ્વાગત

પોતાના અનુભવો શેર કરતા અફઘાન મંત્રી મૌલવી અતાઉલ્લાહ ઓમરીએ જણાવ્યું હતું કે, "આ મારો ભારતનો પહેલો પ્રવાસ છે. જે દિવસથી હું ભારતમાં આવ્યો છું, તે પહેલા જ દિવસથી ભારત સરકાર, વિદેશ મંત્રી અને મને મળેલા તમામ લોકો તરફથી મારું ખૂબ જ ઉષ્માભર્યું અને ભવ્ય સ્વાગત કરવામાં આવ્યું છે."

"આપણું DNA એક છે"

ભારતમાં મળેલા અપાર પ્રેમથી ભાવુક થઈને કહ્યું કે, "અહીં આવીને મને એવું જ લાગે છે કે જાણે હું મારા પોતાના જ લોકોની વચ્ચે છું. આ આપણો પોતાનો જ દેશ હોય તેવો અહેસાસ થાય છે અને જેમ તમે પણ ઉલ્લેખ કર્યો છે તેમ, આપણું DNA એક જ છે."

અફઘાનિસ્તાનના મંત્રીનું આ નિવેદન બંને દેશો વચ્ચેના ગાઢ અને ઐતિહાસિક સંબંધોને દર્શાવે છે. તેમની આ મુલાકાતથી આગામી સમયમાં ભારત અને અફઘાનિસ્તાન વચ્ચે કૃષિ અને અન્ય ક્ષેત્રોમાં દ્વિપક્ષીય સહયોગ વધુ મજબૂત બને તેવી આશા રાખવામાં આવી રહી છે.