VIDEO: બ્રિટનમાં બે હજાર ફ્લાઈટો રદ થતાં ભારતીયો સહિત હજારો પ્રવાસી રઝળ્યા, શાક માર્કેટથી પણ વધારે ભીડ
છેલ્લું અપડેટ : 10 Sept 2026
બ્રિટનમાં એર ટ્રાફિક કંટ્રોલ સિસ્ટમ્સના લીધે મંગળવાર સુધીમાં બે હજાર ફ્લાઇટ્સ રદ કરવામાં આવતા ગુજરાતીઓ અને સંખ્યાબંધ ભારતીયો સહિત હજારો પેસેન્જરો બ્રિટનના ૧૫ એરપોર્ટ પર અટવાઈ ગયા છે. બ્રિટિશ એરપોર્ટો પર જાણે શાક માર્કેટથી પણ વધારે ભીડ હોય અને જાણે કોઈ આફ્રિકન દેશના વિમાનીમથક પર આવી ગયા હોય તેવી અંધાધૂંધી સર્જાઈ હોવાનું લોકો કહી રહ્યા છે.એરપોર્ટ વિલંબિત ફ્લાઇટ્સનો જંગી બેકલોગ ક્લિયર કરવામાં લાગેલા છે, તેના લીધે સંખ્યાબંધ ફ્લાઇટ્સમાં વિલંબ થઈ રહ્યો છે અને વધુને વધુ લોકો કનેક્ટિંગ ફ્લાઇટ છૂટતા વિવિધ એરપોર્ટ પર મોટા પાયા પર ભીડ જોવા મળી રહી છે. એક બ્રિટિશ મહિલાને ગેટવિક એરપોર્ટ પર ઉતરવાનું હતું, તેના માટે તેણે ત્રણ કલાક સુધી રયાન એરની ફ્લાઇટમાં બેસેલા રહેવું પડયું હતું.
ઘણાએ તો એરપોર્ટ પરથી બહાર નીકળવાના સંઘર્ષની તુલનાએ અલ્કાટ્રાઝ ટાપુ પરની કુખ્યાત જેલમાંથી બહાર આવવા સાથે કરી હતી. અલ્કાટ્રાઝ કેલિફોર્નિયાની સાનફ્રાન્સિસ્કોની ખાડીમાં આવેલો ટાપુ છે, જ્યાં લશ્કરી કિલ્લેબંધી જેવી કુખ્યાત જેલ છે. લંડનના હીથ્રો એરપોર્ટ પરથી તો ડિપાર્ચર શરૂ થયુ છે, પરંતુ મંગળવારની રાત માટે એરાઇવલ રદ કરવામાં આવ્યું હતું.બ્રિટિશ એરવેઝે જણાવ્યું હતું કે તેની ૧૦૦થી વધુ ફ્લાઇટ્સ ક્યાં તો રદ કરવાની કે ક્યાં તો બીજે વાળવાની ફરજ પડી છે. રયાન એરે જણાવ્યું હતું કે તેની ૫૦થી વધુ ફ્લાઇટ્સ રદ થઈ છે અને અત્યાર સુધીમાં તેના ૬૫ હજારથી વધુ પ્રવાસીઓને અસર થઈ ચૂકી છે. બજેટ એરલાઇન્સ ઇઝીજેટે જણાવ્યું હતું કે તેમની કેટલીક ફ્લાઇટ ટેકઓફ જ કરી શકી નથી.
એર ટ્રાફિક કંટ્રોલ સિસ્ટમની નિષ્ફળતાના લીધે આખા યુરોપની ફ્લાઇટ પર અસર પડી છે. બ્રિટનના અસર પામેલા એરપોર્ટમાં લંડન ઉપરાંત માંચેસ્ટર, બર્મિંઘમ, ગેટવિક અને સ્કોટલેન્ડનો સમાવેશ થાય છે. એર ટ્રાફિક કંટ્રોલ બોસે યુકેના એરપોર્ટ પર સાઇબર હુમલાની સંભાવના નકારી કાઢી હતી. યુકેના સૌથી વ્યસ્ત એરપોર્ટ હીથ્રો, ગેટવિક, સ્ટેનસ્ટેડ, લ્યુટન અને માંચેસ્ટરમાં ફ્લાઇટ્સ મોટાપાયા પર રદ થઈ છે અથવા તો વિલંબ થયો છે. જો કે આ બધા વચ્ચે યુકે નેશનલ એર ટ્રાફિક (નેટ્સ)ના સીઇઓ માર્ટિન રોલ્ફે સાઇબર હુમલાની સંભાવના નકારી કાઢી છે. તેમણે દાવો કર્યો હતો કે ફ્લાઇટ પ્રોસેસિંગ સિસ્ટમમાં આવેલી મુશ્કેલીના લીધે આ સ્થિતિ સર્જાઈ છે. આ અગાઉ ૨૦૨૩ અને ૨૦૨૫માં પણ બ્રિટિશ વિમાનીમથકોએ આ પ્રકારની સ્થિતિનો સામનો કરવો પડયો હતો. યુકેના ટ્રાન્સપોર્ટ સેક્રેટરી હૈદી એલેકઝાન્ડરે તેને નેટ્સના સીઇઓને બ્રીફિંગ માટે બોલાવ્યા છે. નેટ્સના વર્તમાન સીઇઓના કાર્યકાળમાં આ પ્રકારનો બનાવ ત્રીજી વખત બન્યો છે. તેથી તેમનું રાજીનામુ માંગી લેવાય તેવી પ્રબળ સંભાવના છે.
આ પહેલા ૨૦૨૩માં નેટ્સની મેઇન ફ્લાઇટ પ્રોસેસિંગ સિસ્ટમ સંપૂર્ણપણે નિષ્ફળ ગઈ હતી. તેના લીધે બ્રિટનમાં આવતી ફ્લાઇટ્સ માટે બ્રિટિશ એરસ્પેસ બંધ કરવાની ફરજ પડી હતી. તેના કારણે સાત લાખ પેસેન્જરોને અસર થઈ હતી અને એરલાઇન્સોને ૬.૫ કરોડ પાઉન્ડનો ફટકો પડયો હતો. ગયા વર્ષે જુલાઈમાં નેટ્સની રાડાર સિસ્ટમ નિષ્ફળ ઈ હતી. તેના કારણે કંટ્રોલરો પ્લેન્સનું સ્થાન જ બતાવી શકતા ન હતા, તેના કારણે સ્થિતિ વણસી હતી.