Americaના સમુદ્રમાં રહસ્યમય હલચલ: 9000થી વધુ USO દેખાતાં સંરક્ષણ ક્ષેત્રે હડકંપ
છેલ્લું અપડેટ : 16 May 2026
અમેરિકાના દરિયાકાંઠે સમુદ્રમાં હજારો રહસ્યમય USO જોવા મળ્યા હોવાની ખબરથી દુનિયાભરમાં ચર્ચા શરૂ થઈ ગઈ છે. એક લોકપ્રિય UFO અને USO રિપોર્ટિંગ એપ “એનિગ્મા”એ ઓગસ્ટ 2025થી અત્યાર સુધી અમેરિકાના દરિયાકાંઠા નજીક 9000થી વધુ રહસ્યમય વસ્તુઓ જોવા મળ્યાની નોંધ કરી છે. આ વસ્તુઓ પાણીની અંદર ખૂબ જ ઝડપથી ચાલે છે, દિશા બદલે છે અને પાણીમાંથી હવામાં પણ જઈ શકે છે. આ વસ્તુઓ માનવ બનાવટની ટેકનોલોજી જેવી લાગતી નથી.
UFO એટલે Unidentified Flying Objects એટલે કે આકાશમાં દેખાતી અજાણી ઉડતી વસ્તુઓ. પાણીની અંદર દેખાતી આ પ્રકારની અજાણી વસ્તુઓને USO (Unidentified Submersible Objects) કહેવામાં આવે છે. એટલે એવી કોઈ પણ વસ્તુ જેને પાણીની અંદર જોવામાં આવે પરંતુ તરત ઓળખી ન શકાય. આ વસ્તુઓને નરી આંખે અથવા સેન્સર દ્વારા જોવામાં આવી શકે છે. કેટલાક રિપોર્ટ મુજબ આ વસ્તુઓ ખૂબ જ ઝડપથી ચાલે છે, અચાનક દિશા બદલે છે અને પાણીમાંથી હવામાં કોઈ અવરોધ વગર બહાર આવી જાય છે. આવી ક્ષમતાને “ટ્રાન્સમિડિયમ” કહેવાય છે, એટલે કે હવા અને પાણી બંનેમાં સરળતાથી ગતિ કરવાની શક્તિ.
એનિગ્મા એપે શું ખુલાસો કર્યો?
એનિગ્મા એપ 2022થી UFO સંબંધિત માહિતીનો મોટો ડેટાબેસ તૈયાર કરી રહી છે. અત્યાર સુધી આ એપ પર લગભગ 30,000 UFO સાઇટિંગ્સ નોંધાઈ ચૂકી છે. જોકે ઓગસ્ટ 2025 પછી લોકોનું ધ્યાન આકાશથી હટીને સમુદ્ર તરફ ગયું છે. માત્ર ઓગસ્ટથી અત્યાર સુધી અમેરિકાના દરિયાકાંઠાના લગભગ 16 કિલોમીટર વિસ્તારમાં 9000થી વધુ USO રિપોર્ટ નોંધાયા છે.
તેમાંથી લગભગ 500 સાઇટિંગ્સ દરિયાકાંઠાથી માત્ર 8 કિલોમીટર અંદર નોંધાઈ હતી. સૌથી વધુ કેસ કેલિફોર્નિયામાં નોંધાયા છે, જ્યાં 389 ઘટનાઓ સામે આવી છે. ફ્લોરિડામાં 306 કેસ નોંધાયા છે. અમેરિકાના અનેક દરિયાકાંઠા વિસ્તારોમાં આવી વસ્તુઓના “ક્લસ્ટર” જોવા મળ્યા છે.
લોકો શું કહી રહ્યા છે?
ઘણા લોકોએ જણાવ્યું કે પાણીની અંદર બે અજાણી વસ્તુઓ ચમકતી દેખાઈ હતી. કેટલીક વસ્તુઓ પાણીમાંથી બહાર આવીને હવામાં ઉડી ગઈ અને પછી ફરીથી પાણીમાં સમાઈ ગઈ. આ વસ્તુઓ એટલી ઝડપથી ચાલતી હતી કે સામાન્ય માનવી દ્વારા બનાવવામાં આવેલી સબમરીન અથવા જહાજ તેની બરાબરી કરી શકે તેમ નથી.
“Catastrophic Disclosure” પુસ્તકના લેખક કેન્ટ હેકેનલાઇવલી કહે છે કે અમેરિકી નૌસેનાના સેન્સર ઘણી વખત પાણીની અંદર અસાધારણ ઝડપથી ચાલતી વસ્તુઓને પકડી લે છે. તેમના મુજબ આ વસ્તુઓ સમજની બહાર છે. તેમણે મસ્તીમાં એવું પણ કહ્યું હતું કે તેમના સેન્સર પાણીની અંદર ભૂતો પકડી રહ્યા છે.
નિષ્ણાતો અને પૂર્વ નૌસેના અધિકારીઓની ચિંતા
નિવૃત્ત રિયર એડમિરલ ટિમ ગેલોડેટે ચેતવણી આપી છે કે આવી વસ્તુઓ અમેરિકાની સમુદ્રી સુરક્ષા માટે જોખમ બની શકે છે. તેમણે 2019ના એક વીડિયોની ચર્ચા કરી હતી જેમાં એક અજાણી વસ્તુ USS Omaha નામના જહાજની નજીકથી પસાર થઈને પ્રશાંત મહાસાગરમાં ગાયબ થઈ ગઈ હતી.
તેમના કહેવા મુજબ પાઇલોટ્સ અને સૈનિક સાધનોએ એવી વસ્તુઓ રેકોર્ડ કરી છે જે માનવ ટેકનોલોજીની સીમાથી ઘણી આગળ છે. તેમણે સરકાર પર આ મામલે સંપૂર્ણ માહિતી જાહેર ન કરવાનો આરોપ પણ લગાવ્યો છે.
શું આ એલિયન છે?
હાલ સુધી કોઈ ચોક્કસ પુરાવા નથી કે આ વસ્તુઓ એલિયન સ્પેસક્રાફ્ટ છે. કેટલાક નિષ્ણાતો માને છે કે આ અદ્યતન ડ્રોન્સ, ગુપ્ત સૈનિક ટેકનોલોજી અથવા કુદરતી ઘટનાઓ પણ હોઈ શકે છે. પરંતુ આટલી મોટી સંખ્યામાં મળતી રિપોર્ટ્સ અને તેમની અસાધારણ ક્ષમતાઓ વૈજ્ઞાનિકોને આશ્ચર્યમાં મૂકી રહી છે.
સમુદ્રને છુપાવા માટેનું શ્રેષ્ઠ સ્થળ માનવામાં આવે છે કારણ કે મહાસાગરોનો મોટો ભાગ હજુ પણ સંપૂર્ણ રીતે શોધાયો નથી. અનેક એક્સપર્ટનું કહેવું છે કે આવી વસ્તુઓ અમેરિકાની સમુદ્રી સુરક્ષાને પડકાર આપી રહી છે. જો આ કોઈ વિદેશી દેશોની ગુપ્ત ટેકનોલોજી હશે તો જોખમ વધુ થઈ શકે છે.
