VIDEO: "ઈરાન એક પણ જહાજ પર હુમલો કરશે તો તહેરાનમાં પુલ અને પાવર પ્લાન્ટ ઉડાવી દઈશું": ટ્રમ્પની ચીમકી
છેલ્લું અપડેટ : 22 Jul 2026
હોર્મુઝની સમુદ્રધૂનીમાં વધતા વૈશ્વિક તણાવ વચ્ચે પૂર્વ અમેરિકી પ્રમુખ ડોનાલ્ડ ટ્રમ્પે ઈરાનને ખુલ્લેઆમ ગંભીર પરિણામો ભોગવવાની ચેતવણી આપી છે. સોશિયલ મીડિયા પ્લેટફોર્મ 'ટ્રુથ સોશિયલ' પર એક આક્રમક પોસ્ટ શેર કરીને ટ્રમ્પે સ્પષ્ટ કર્યું છે કે ઈરાનના કોઈ પણ હસ્તક્ષેપ કે ડ્રોન કાર્યવાહી સામે અમેરિકા આકરી લશ્કરી કાર્યવાહી કરશે.
"હવેથી, ઈસ્લામિક રિપબ્લિક ઓફ ઈરાન હોર્મુઝની સમુદ્રધૂનીમાં કોઈપણ જહાજ પર મિસાઈલ, રોકેટ, ડ્રોન કે અન્ય કોઈ પણ હથિયાર અથવા સાધન વડે ગોળીબાર કે હુમલો કરશે, તો અમેરિકા ઈરાનની રાજધાની તહેરાન સ્થિત કે તેની આસપાસ આવેલા એક પુલ અથવા પાવર પ્લાન્ટને બોમ્બથી વિસ્ફોટ કરીને નષ્ટ કરી દેશે. આ બાબતે ધ્યાન આપવા બદલ આભાર! - પ્રમુખ ડોનાલ્ડ જે. ટ્રમ્પ"
દરિયાઈ સુરક્ષા અને વૈશ્વિક રાજકારણ પર અસર
વિશ્વના ક્રૂડ ઓઈલ સપ્લાયનો મોટો હિસ્સો આ દરિયાઈ માર્ગ પરથી પસાર થાય છે, જ્યાં ઈરાન અને પશ્ચિમી દેશો વચ્ચે અવારનવાર ઘર્ષણ થતું રહે છે. ટ્રમ્પના આ નિવેદને આંતરરાષ્ટ્રીય રાજકારણમાં નવો ગરમાવો લાવી દીધો છે. ટ્રમ્પે સ્પષ્ટ કર્યું છે કે વાણિજ્યિક જહાજોની સુરક્ષામાં ખલેલ પહોંચાડવાનો ઈરાનનો કોઈ પણ પ્રયાસ સીધો અમેરિકાની સૈન્ય કાર્યવાહીને નોતરશે. ટ્રમ્પની આ ધમકી વચ્ચે અમેરિકી સેનાએ ઈરાન સામે સતત 11મી રાત્રે સૈન્ય અભિયાન ચલાવ્યું હતું. યુએસ સેન્ટ્રલ કમાન્ડના જણાવ્યા અનુસાર, મંગળવારે મોડી રાત્રે થયેલા આ હુમલા 75 મિનિટ સુધી ચાલ્યા હતા, જેમાં ઈરાનના ઓપરેશન સેન્ટરો, ડ્રોન સ્ટોરેજ અને સૈન્ય લોજિસ્ટિક્સને નિશાન બનાવાયા હતા.
30થી વધુ જહાજો પર હુમલાનો આરોપ
અમેરિકાનો આક્ષેપ છે કે ઈરાને છેલ્લા 3 મહિનામાં હોર્મુઝ ક્ષેત્રમાંથી પસાર થતા 30થી વધુ વેપારી જહાજો પર હુમલા કર્યા છે. અમેરિકી સેનાનું કહેવું છે કે આ જવાબી કાર્યવાહીનો મુખ્ય હેતુ હોર્મુઝમાં વેપારી જહાજો માટે જોખમ ઊભું કરવાની ઈરાનની ક્ષમતાને નબળી પાડવાનો છે.
28 ફેબ્રુઆરીથી શરૂ થયેલો સંઘર્ષ વધુ વિકરાળ બન્યો
આ વર્તમાન સંઘર્ષની શરૂઆત 28 ફેબ્રુઆરીના રોજ થઈ હતી, જ્યારે અમેરિકા અને ઈસરાયેલે ઈરાન પર હુમલા શરૂ કર્યા હતા. તેના જવાબમાં ઈરાને પણ ઈસરાયેલ અને ખાડી દેશોમાં આવેલા અમેરિકી લશ્કરી ઠેકાણાઓ પર હુમલા કર્યા હતા. રિપોર્ટ મુજબ, આ યુદ્ધમાં અત્યાર સુધીમાં હજારો લોકોના મોત થયા છે અને લાખો લોકો વિસ્થાપિત થયા છે.
