નેપાળમાં મૃત્યુઆંકમાં સતત વધારો, ભોટેકોશી નદીમાં ફરી પૂરનો ખતરો, 30થી વધુ દેશોના નાગરિકો ગુમ
છેલ્લું અપડેટ : 27 Aug 2026
તિબેટમાં બુધવારે ગ્લેશિયર ફાટ્યા બાદ ચીન-નેપાળ સરહદી વિસ્તારમાં ભારે તબાહી સર્જાઈ છે. પૂર અને કાટમાળની ચપેટમાં આવવાથી સેંકડો લોકોના મોત થયા છે, જ્યારે મોટી સંખ્યામાં લોકો હજુ પણ લાપતા છે. બંને દેશોના અધિકારીઓ મુજબ, અત્યાર સુધીમાં 350થી વધુ લોકોના મોતની પુષ્ટિ થઈ ચૂકી છે અને 1,300થી વધુ લોકો લાપતા હોવાનું કહેવાય છે. લાપતા લોકોમાં મોટી સંખ્યામાં વિદેશી પ્રવાસીઓ સામેલ છે.
મૃત્યુઆંકમાં સતત વધારો
નેપાળમાં પૂરના કારણે મૃત્યુ પામેલા લોકોની સંખ્યા સતત વધી રહી છે. નેપાળ પોલીસના જણાવ્યા અનુસાર, ગુરુવાર સાંજે 5 વાગ્યા સુધીમાં 8 જિલ્લાઓમાંથી કુલ 359 મૃતદેહો મળી આવ્યા છે. નેપાળ પોલીસના પ્રવક્તા અબી નારાયણ કફલે સોશિયલ મીડિયા પોસ્ટ દ્વારા સુધારેલા આંકડાની પુષ્ટિ કરી છે. તાજેતરના આંકડા અનુસાર, રસુવાથી 17, નુવાકોટથી 28, ધાદિંગથી 33, ચિતવનથી 132, ગોરખાથી 30, તનહુંથી 22, નવલપરાસી પૂર્વથી 82 અને નવલપરાસી પશ્ચિમથી 15 મૃતદેહ મળ્યા છે. પોલીસ, સેના અને અન્ય રાહત એજન્સીઓ અસરગ્રસ્ત વિસ્તારોમાં સતત બચાવ કામગીરી ચલાવી રહી છે અને ફસાયેલા લોકોને સુરક્ષિત બહાર કાઢવાનો પ્રયાસ કરી રહી છે.
કયાં દેશના કેટલા નાગરિકો લાપતા?
નેપાળ ટૂરિઝમ બોર્ડે ગુરુવારે જણાવ્યું કે 517 વિદેશી પ્રવાસીઓ હજુ પણ લાપતા છે.
ચીનના સરકારી મીડિયા મુજબ, તિબેટના ગ્યિરોંગ કાઉન્ટીમાં ઓછામાં ઓછા 3 લોકોના મોત થયા છે, જ્યારે 558 લોકો લાપતા છે.
ચીનના વિદેશ મંત્રાલયે એ પણ જણાવ્યું કે નેપાળ તરફથી લગભગ 100 ચીની નાગરિકો લાપતા હોવાનું કહેવાયું છે.
નેપાળ ટૂરિઝમ બોર્ડ અનુસાર, અમેરિકાના 65 નાગરિકો લાપતા છે.
મલેશિયાના 51 લોકોનો હજુ સુધી કોઈ પત્તો લાગ્યો નથી.
યુક્રેનના વિદેશ મંત્રાલયે જણાવ્યું કે તેના 53 નાગરિકો લાપતા છે અને 46 વિદેશી પ્રવાસીઓનો નેપાળી અધિકારીઓ સાથેનો સંપર્ક સંપૂર્ણપણે તૂટી ગયો છે.
ઓસ્ટ્રેલિયાના 35, બ્રિટનના 33 અને કેનેડાના 25 નાગરિકો લાપતા હોવાનું કહેવાય છે.
દક્ષિણ કોરિયા અને ઉત્તર કોરિયાના અધિકારીઓએ પણ પુષ્ટિ કરી છે કે નેપાળના એક હાઇડ્રોઇલેક્ટ્રિક પ્રોજેક્ટ વિસ્તારમાં કામ કરી રહેલા તેમના 9 નાગરિકો લાપતા છે.
નેપાળ ટૂરિઝમ બોર્ડ મુજબ, સિંગાપોરના 8, જર્મનીના 8 અને રશિયાના 8 પ્રવાસીઓ પણ લાપતા છે.
દક્ષિણ આફ્રિકાના 6, લાતવિયાના 6 અને જાપાનના 5 નાગરિકો લાપતા હોવાની માહિતી સામે આવી છે.
બચાવ કામગીરીમાં ભારે પડકારોનો સામનો
અધિકારીઓનું કહેવું છે કે રાહત અને બચાવ કામગીરી યુદ્ધના ધોરણે ચાલુ છે, પરંતુ ખરાબ હવામાન, દુર્ગમ પહાડી વિસ્તારો અને પાણીના તેજ વહેણને કારણે બચાવ કામગીરીમાં ભારે પડકારોનો સામનો કરવો પડી રહ્યો છે. નેપાળ અને ચીન બંને દેશોની એજન્સીઓ સંયુક્ત રીતે સ્થિતિ પર નજર રાખી રહી છે અને લાપતા લોકોની શોધખોળ ચાલુ છે.
35 પુલ અને 45 સસ્પેન્શન બ્રિજ તણાઈ ગયા
નેપાળના રસુવા વિસ્તારમાં ભોટેકોશી નદીમાં ભયાનક પૂરથી ભારે વિનાશ જોવા મળ્યો છે. આ વિનાશક ફ્લેશ ફ્લડમાં લગભગ 362 લોકોના મોત થયા છે અને 1500થી વધુ લોકો લાપતા હોવાનું કહેવાય છે. પૂરના કારણે ઘણા વિસ્તારોનું પરિવહન અને સંપર્ક માળખું પણ ખરાબ રીતે અસરગ્રસ્ત થયું છે. સરકારી આંકડા મુજબ, 35 પુલ અને 45 સસ્પેન્શન બ્રિજ તણાઈ ગયા છે, જેનાથી ઘણા વિસ્તારોનો સંપર્ક કપાઈ ગયો છે.
13 હાઇડ્રોઇલેક્ટ્રિક પ્રોજેક્ટ્સને નુકસાન
આ ઘટનામાં 13 હાઇડ્રોઇલેક્ટ્રિક પ્રોજેક્ટ્સને નુકસાન પહોંચ્યું છે. નેપાળ સેનાએ અસરગ્રસ્ત વિસ્તારોમાંથી 250થી વધુ લોકોને સુરક્ષિત બહાર કાઢ્યા છે. નેપાળમાં હજુ પણ ઘણા લોકો લાપતા છે, જેમાં ઘણા ભારતીય નાગરિકો પણ સામેલ છે.
ભારતના સરહદી રાજ્યોમાં એલર્ટ અને ભારત સરકારની મદદ
આ દરમિયાન, નેપાળમાં આવેલા ભયાનક પૂર પછી ઉત્તર પ્રદેશ અને બિહારમાં પણ વહીવટીતંત્ર એલર્ટ પર છે. ગંડક, નારાયણી અને કોસી નદીના જળસ્તર પર નજર રાખવામાં આવી રહી છે. યુપીના મહારાજગંજ અને કુશીનગર સહિત બિહારના સંવેદનશીલ વિસ્તારોમાં વહીવટીતંત્રને એલર્ટ કરવામાં આવ્યું છે. ગૃહ મંત્રાલય સહિત કેન્દ્રીય મંત્રાલયો સતત સ્થિતિનું મોનિટરિંગ કરી રહ્યા છે. બિહારના 6 જિલ્લાઓમાં ખાસ સાવચેતી રાખવાના નિર્દેશ આપવામાં આવ્યા છે.
નેપાળના વડાપ્રધાનનું નિવેદન: સ્થિતિ હજુ પણ પડકારજનક
વડાપ્રધાન બાલેન શાહે ગુરુવાર સાંજે સોશિયલ મીડિયા દ્વારા પૂર અસરગ્રસ્ત વિસ્તારોની સ્થિતિ અને ચાલુ રાહત કાર્યોની માહિતી આપી હતી. તેમણે નુવાકોટ પહોંચીને પૂર અને ભૂસ્ખલનથી અસરગ્રસ્ત વિસ્તારોની પોતે મુલાકાત લીધી હતી. આ દરમિયાન તેમણે અસરગ્રસ્ત નાગરિકો, સ્થાનિક જનપ્રતિનિધિઓ, સુરક્ષાકર્મીઓ, ડૉક્ટરો અને રાહત કાર્યમાં લાગેલી ટીમો સાથે સીધી વાત કરીને ગ્રાઉન્ડ રિપોર્ટ મેળવ્યો હતો. નિરીક્ષણ બાદ કાઠમંડુ પરત ફરીને વડાપ્રધાને કહ્યું, 'સ્થિતિ હજુ પણ પડકારજનક બનેલી છે. રાજ્યના તમામ વહીવટી અને સુરક્ષા તંત્ર પોતાની પૂરી ક્ષમતા સાથે મેદાનમાં તૈનાત છે.'
290 ભારતીયો સંપર્ક વિહોણા, 84 લોકોને બચાવાયા
નેપાળમાં આવેલા પૂરના કારણે 290 ભારતીય નાગરિકો સાથે હાલમાં કોઈ સંપર્ક થઈ રહ્યો નથી, જેમની શોધખોળ ચાલુ છે. બીજી તરફ, રાહત અને બચાવ કામગીરીમાં જોડાયેલી ટીમોએ સફળતા મેળવીને 84 ભારતીયોને સુરક્ષિત બચાવી લીધા છે. રેસ્ક્યુ કરાયેલા લોકોમાં ત્રિશૂલી-I પ્રોજેક્ટમાં ફસાયેલા 63 વર્કર્સ અને તમિળનાડુના 21 લોકો સામેલ છે. વહીવટીતંત્ર સંપર્ક વિહોણા અન્ય નાગરિકોનો ઝડપથી પત્તો લગાવવામાં લાગેલું છે.
કૃત્રિમ તળાવ બનતા નેપાળ સરકારે એલર્ટ જાહેર કર્યું
નેપાળ સરકારના સેટેલાઇટ તસવીરોના વિશ્લેષણ પરથી મળેલા રિપોર્ટ મુજબ, રસુવાગઢી સરહદથી લગભગ 18 કિલોમીટર ઉપર લેંડે નદીનો પ્રવાહ સંપૂર્ણપણે બંધ થઈ ગયો છે. આ રુકાવટના કારણે કાંઠાના વિસ્તારમાં લગભગ 0.11 ચોરસ કિલોમીટર વિસ્તારમાં એક મોટી અસ્થાયી લેક (તળાવ) બની ગઈ છે. નેપાળ સરકારે ચેતવણી જાહેર કરતા કહ્યું છે કે આ કુદરતી તળાવનો બંધ તૂટવાથી નીચાણવાળા વિસ્તારોમાં અચાનક ભયાનક પૂર આવવાનું મોટું જોખમ ઊભું થયું છે. વહીવટીતંત્રે નદીના નીચાણવાળા વિસ્તારોમાં રહેતા તમામ નિવાસીઓ અને સંબંધિત અધિકારીઓને ખૂબ જ સાવચેતી રાખવા અને હાઇ એલર્ટ પર રહેવાનો નિર્દેશ આપ્યો છે.
ભોટેકોશી નદીમાં તળાવ ફાટવાનો અને ફરી પૂરનો ખતરો
નેપાળ સરકારે ભોટેકોશી નદીમાં સંભવિત પૂરના જોખમ અંગે વિશેષ નોટિસ જાહેર કરી છે. ચીન તરફથી મળેલી તાજી માહિતી અને સેટેલાઇટ ઇમેજ મુજબ, નદીનો પ્રવાહ રોકાઈ ગયો છે અને ગઈકાલે જ્યાં પૂર આવ્યું હતું ત્યાં એક તળાવ બની ગયું છે. નોટિસમાં જણાવાયું છે કે તળાવમાં પાણીનું સ્તર વધી રહ્યું છે અને તે ફાટવાનું જોખમ છે. આ સ્થિતિને ધ્યાનમાં રાખીને, ભોટેકોશી નદીના નીચાણવાળા કાંઠાના વિસ્તારોના રહીશો, પ્રવાસીઓ અને બચાવ કાર્યકર્તાઓને નદીના કિનારા અને જોખમી વિસ્તારોથી દૂર સુરક્ષિત જગ્યાએ રહેવા વિનંતી કરવામાં આવી છે.
વહેતા પાણીમાં કૂદીને સામાન બહાર કાઢતા લોકો, પોલીસે આપી ચેતવણી
નેપાળ પોલીસે સોશિયલ મીડિયા પ્લેટફોર્મ X પર એક વિડીયો શેર કર્યો છે જેમાં સ્થાનિક લોકો નદીમાં તણાઈને આવતા કાટમાળમાંથી સિલિન્ડર અને લાકડાં જેવી વસ્તુઓ બહાર કાઢવા માટે દોડી રહ્યા છે. ઘણા લોકો વહેતા પાણીમાં ઊતરીને પોતાનો જીવ જોખમમાં મૂકી રહ્યા છે. આ વિડીયો સામે આવ્યા બાદ નેપાળ પોલીસે લોકોને ચેતવણી આપી છે કે તેઓ પોતાનો જીવ જોખમમાં ન મૂકે અને સુરક્ષિત રહે.
આંતરરાષ્ટ્રીય મદદ માટે ઓનલાઇન પોર્ટલ શરૂ કરાયું
નેપાળ સરકારે પૂરપીડિતોની મદદ કરવા ઇચ્છતા આંતરરાષ્ટ્રીય દાતાઓ માટે અલગ પેમેન્ટ પોર્ટલ જાહેર કર્યું છે. વડાપ્રધાન દૈવી આપત્તિ રાહત ફંડમાં વિદેશી દાતાઓ સીધી સહાયતા રકમ જમા કરાવી શકે તે માટે આ વ્યવસ્થા શરૂ કરવામાં આવી છે. આ સિસ્ટમ દ્વારા વિદેશી દાતાઓ પોતાના ડેબિટ કે ક્રેડિટ કાર્ડ અથવા QR Code મારફતે સીધી જ આર્થિક સહાય જમા કરાવી શકે છે.
