VIDEO: જેલમાં અચાનક ફાટી નીકળી હિંસા! 10નાં મોત અને 16 કેદીઓ ઘાયલ; ડ્રગ કાર્ટેલ કનેક્શનની આશંકા
છેલ્લું અપડેટ : 09 Oct 2026
મેક્સિકોના (Mexico) સિનોલોઆ રાજ્યની એક જેલમાં કેદીઓ વચ્ચે અચાનક હિંસક અથડામણ (Violent Clash) થતાં ભારે અફરાતફરી મચી ગઈ હતી. આ ઘટનામાં કુલ 10 લોકોનાં મોત થયા છે, જ્યારે 16 કેદીઓ ઘાયલ થયા છે. મૃતકોમાં એક સગીર વયનો યુવક પણ સામેલ છે, જે જેલમાં એક કેદીને મળવા માટે આવ્યો હતો. ઘટનાને પગલે જેલની સુરક્ષા વ્યવસ્થા અને ગુનાહિત જૂથો વચ્ચેના સંઘર્ષને લઈને ચિંતા વધી છે.
સિનોલોઆની જેલમાં 10 લોકોનાં મોત, 16 ઘાયલ
સમાચાર એજન્સી AFPના અહેવાલ મુજબ, ગુરુવારે જેલ પરિસરમાં કેદીઓ વચ્ચે અચાનક હિંસા ફાટી નીકળી હતી. પરિસ્થિતિ એટલી ગંભીર બની હતી કે 10 લોકોનાં મોત થયા હતા. સિનોલોઆના જાહેર સુરક્ષા સચિવ સિનુએ ટેલેસે (Sinuhe Telles) સોશિયલ મીડિયા પર વીડિયો સંદેશ દ્વારા ઘટનાની માહિતી આપી હતી.
તેમણે જણાવ્યું હતું કે હિંસામાં નવ કેદીઓનાં ઘટનાસ્થળે જ મોત થયા હતા. આ ઉપરાંત, એક કેદીને મળવા આવેલા સગીરનું પણ મૃત્યુ થયું હતું. અથડામણમાં ઘાયલ થયેલા 16 કેદીઓને સારવાર આપવામાં આવી રહી છે. જોકે, હિંસા કયા કારણોસર શરૂ થઈ અને તેમાં કયા જૂથો સામેલ હતા, તે અંગે સત્તાવાર માહિતી સામે આવી નથી.
જેલમાં સુરક્ષા વધારાઈ, બખ્તરબંધ વાહનો પહોંચ્યાં
ઘટનાની જાણ થતાં જ જેલમાં વધારાના સુરક્ષાકર્મીઓ તહેનાત કરવામાં આવ્યા હતા. પરિસ્થિતિને કાબૂમાં લેવા અને ઘાયલોને સારવાર માટે ખસેડવા સુરક્ષા દળોએ કામગીરી હાથ ધરી હતી. અહેવાલ મુજબ, જેલ પરિસરમાં એક બખ્તરબંધ વાહન (Armoured Vehicle) અને અનેક એમ્બ્યુલન્સ પણ પહોંચી હતી.
વહીવટીતંત્ર દ્વારા જેલની સુરક્ષા વ્યવસ્થાને વધુ મજબૂત બનાવવામાં આવી છે. સાથે જ, અથડામણમાં સામેલ કેદીઓ અને હિંસા પાછળનાં સંભવિત કારણોની તપાસ હાથ ધરવામાં આવી રહી છે.
ડ્રગ કાર્ટેલ સાથે શું છે કનેક્શન?
મેક્સિકોનું સિનોલોઆ રાજ્ય ડ્રગ્સની હેરાફેરી અને ગુનાહિત જૂથો વચ્ચેના સંઘર્ષ માટે જાણીતું છે. અહીં ડ્રગ કાર્ટેલ (Drug Cartel) વચ્ચે વર્ચસ્વ મેળવવાની લડાઈને કારણે અનેક વખત હિંસક ઘટનાઓ બની છે. જેલોમાં પણ કેદીઓ વચ્ચેની જૂથબંધી સુરક્ષા એજન્સીઓ માટે પડકારરૂપ બની રહે છે.
જોકે, હાલની ઘટનામાં ડ્રગ કાર્ટેલની સીધી ભૂમિકા હોવાની સત્તાવાર પુષ્ટિ થઈ નથી. તપાસ બાદ જ હિંસા પાછળનું ચોક્કસ કારણ સ્પષ્ટ થઈ શકશે.
2016માં પણ જેલમાં થયો હતો ભયાનક સંઘર્ષ
મેક્સિકોમાં જેલની અંદર મોટા પાયે હિંસા થવાની આ પહેલી ઘટના નથી. વર્ષ 2016માં નુએવો લિયોન રાજ્યની ટોપો ચિકો જેલમાં કેદીઓ વચ્ચે થયેલા ભીષણ સંઘર્ષમાં 49 લોકોનાં મોત થયા હતા.
સિનોલોઆની જેલમાં બનેલી તાજેતરની ઘટનાએ ફરી એકવાર જેલોની સુરક્ષા વ્યવસ્થા અને કેદીઓ વચ્ચેની હિંસા અટકાવવાનાં પગલાં અંગે સવાલો ઊભા કર્યા છે. હાલ અધિકારીઓ સમગ્ર મામલાની તપાસ કરી રહ્યા છે.