VIDEO: "આપ પાર્ટીમાં સંસદમાં બોલતા અટકાવવામાં આવે", રાઘવ ચઢ્ઢાએ AAP પર લગાવ્યો આરોપ
છેલ્લું અપડેટ : 27 Apr 2026
આમ આદમી પાર્ટીને મોટો ઝટકો આપતા તેના સહ-સ્થાપક અને રાજ્યસભા સાંસદ રાઘવ ચઢ્ઢાએ પાર્ટી છોડવાની જાહેરાત કરી. તેમણે પાર્ટીમાં અયોગ્ય વાતાવરણ હોવાનો આરોપ લગાવ્યો અને કહ્યું કે છેલ્લા વર્ષોમાં આંતરિક કામગીરી નોંધપાત્ર રીતે બગડી ગઈ છે.
સ્વ-નિર્મિત વીડિયો નિવેદનમાં રાઘવ ચઢ્ઢાએ જણાવ્યું કે, તેઓ ચાર્ટર્ડ એકાઉન્ટન્ટની આશાસ્પદ કારકિર્દી છોડીને રાજકારણમાં આવ્યા હતા. તેમણે પોતાની મુખ્ય યુવાનીના લગભગ 15 વર્ષ આપના નિર્માણમાં સમર્પિત કર્યા. હું કારકિર્દી બનાવવા રાજકારણમાં આવ્યો નહોતો, પરંતુ આજે પાર્ટી જૂનો પક્ષ રહી નથી. આપ પાર્ટીમાં કામ કરવાથી રોકવામાં આવે છે અને સંસદમાં બોલતા અટકાવવામાં આવે છે.
રાઘવ ચઢ્ઢાએ આરોપ લગાવ્યો કે, પાર્ટી હવે થોડા ભ્રષ્ટ અને સમાધાનકારી લોકોના નિયંત્રણમાં આવી ગઈ છે. તેમણે કહ્યું કે મને લાગ્યું કે હું સાચો માણસ છું પણ ખોટા પક્ષમાં છું. તેમણે દાવો કર્યો કે કુલ સાત સાંસદોએ પાર્ટી છોડી છે. એક-બે વ્યક્તિ ખોટા હોઈ શકે, પરંતુ સાત લોકો ખોટા હોઈ શકતા નથી.
રાજ્યસભામાં આ સાત સાંસદોના વિલીનીકરણને મંજૂરી મળતાં ભાજપની સંખ્યા વધીને 113 થઈ ગઈ છે. આપના સાંસદસભ્યોની સંખ્યા માત્ર ત્રણ સુધી ઘટી ગઈ છે. આ નિર્ણય બંધારણની દસમી અનુસૂચિ હેઠળ બે તૃતીયાંશ સભ્યોના વિલીનીકરણ તરીકે માન્ય ગણાયું છે. આપ નેતાઓએ આને વિશ્વાસઘાત ગણાવ્યો છે. આ ઘટના રાજકીય વર્તુળોમાં ચર્ચાનો વિષય બની છે.
