VIDEO: ANDAR NI VAAT/ ચમોલીમાં અલકનંદા નદી ઓવરફ્લો, ધુમ્મસની ચાદર વચ્ચે બદ્રીનાથ ધામ નયનરમ્ય દ્રશ્યો
છેલ્લું અપડેટ : 11 Jul 2026
ઉત્તરાખંડના પહાડી વિસ્તારો અને ઉપરવાસમાં છેલ્લા કેટલાક દિવસોથી વરસી રહેલા સતત અનરાધાર વરસાદને પગલે કુદરતનું રૌદ્ર અને રમણીય એમ બંને સ્વરૂપ એકસાથે જોવા મળી રહ્યા છે. ભારે વરસાદના કારણે ચમોલી જિલ્લામાં વહેતી પવિત્ર અલકનંદા નદી ઓવરફ્લો થઈને પોતાના પ્રચંડ વેગ સાથે બે કાંઠે વહી રહી છે, જેને પગલે વહીવટીતંત્ર દ્વારા નદી કાંઠાના વિસ્તારોમાં એલર્ટ જાહેર કરવામાં આવ્યું છે. નદીના આ તોફાની પ્રવાહ વચ્ચે પણ હિમાલયની ગોદમાં બિરાજમાન ભગવાન બદ્રીનાથ મંદિર અને તેની આસપાસની સુંદર પહાડીઓ સંપૂર્ણપણે ગાઢ ધુમ્મસ અને વાદળોની સફેદ ચાદરથી ઢંકાઈ ગઈ છે. આ અલૌકિક વાતાવરણને કારણે બદ્રીનાથ ધામમાં અત્યંત નયનરમ્ય અને દિવ્ય દ્રશ્યો સર્જાયા છે. સોશિયલ મીડિયા પર આ મનોહર દ્રશ્યો વાયરલ થતાં જ દેશભરના લોકોનું ધ્યાન આ તરફ ખેંચાયું છે અને ચોમાસાના આ માહોલમાં પણ શ્રદ્ધાળુઓનો ઉત્સાહ બમણો થઈ ગયો છે.
ભારે વરસાદની આ મોસમ વચ્ચે ચમોલી જિલ્લાનું વાતાવરણ અતિશય આહ્લાદક અને મનમોહક બની જતાં પ્રવાસન ઉદ્યોગને જોરદાર વેગ મળ્યો છે. પ્રતિકૂળ હવામાન હોવા છતાં દેશના ખૂણે-ખૂણેથી મોટી સંખ્યામાં પ્રવાસીઓ અને કુદરતપ્રેમીઓ ઉત્તરાખંડના આ સુંદર નજારાનો લહાવો લેવા માટે દોડી આવ્યા છે. પ્રવાસીઓ બદ્રીનાથ ધામમાં દર્શન કરવાની સાથે-સાથે ભારતના છેલ્લા ગામ તરીકે ઓળખાતા પવિત્ર 'માના' ગામની પણ મુલાકાત લઈ રહ્યા છે. ચારેયબાજુ છવાયેલું ગાઢ ધુમ્મસ, પહાડોને સ્પર્શીને વહી જતા વાદળો અને પહાડી પવન વચ્ચે લોકો આ સુંદર વાતાવરણની મજા માણી રહ્યા છે. સામાન્ય રીતે ચોમાસામાં પહાડો પર પ્રવાસન ધીમું પડી જતું હોય છે, પરંતુ આ વર્ષે સર્જાયેલા આ અદ્ભુત વાતાવરણના કારણે સ્થાનિક હોટેલ સંચાલકો, વેપારીઓ અને પ્રવાસન ક્ષેત્ર સાથે જોડાયેલા લોકોમાં ખુશીનો માહોલ જોવા મળી રહ્યો છે અને સ્થાનિક અર્થતંત્રને મોટો બૂસ્ટ મળ્યો છે. બ્યુરો રિપોર્ટ જીએસટીવી
