VIDEO: ANDAR NI VAAT / મુંબઈમાં વરસાદ બન્યો આકાશી આફતઃ અનેક વિસ્તારમાં વૃક્ષ ધરાશાયી

મહારાષ્ટ્રમાં આ વર્ષે ચોમાસું રૌદ્ર સ્વરૂપ ધારણ કરી રહ્યું છે, જેમાં ખાસ કરીને આર્થિક રાજધાની મુંબઈ માટે આ વરસાદ આકાશી આફત બનીને તૂટી પડ્યો છે. છેલ્લા બે દિવસથી સતત વરસી રહેલા અવિરત વરસાદને કારણે મુંબઈના મોટાભાગના નીચાણવાળા વિસ્તારો અને મુખ્ય માર્ગો પાણીમાં ગરકાવ થઈ ગયા છે. રસ્તાઓ પર ઘૂંટણસમા પાણી ભરાઈ જવાને કારણે વાહનચાલકો ભારે પરેશાનીનો સામનો કરી રહ્યા છે. મુંબઈની જીવાદોરી ગણાતા વેસ્ટર્ન એક્સપ્રેસ હાઈવે પર ભારે જલભરાવના કારણે કિલોમીટરો લાંબો ટ્રાફિક જામ સર્જાયો છે, જેના લીધે નોકરિયાત વર્ગને ઓફિસે પહોંચવામાં કલાકોનો વિલંબ થઈ રહ્યો છે. ઓફિસો, બજારો અને અનેક રહેણાક વિસ્તારોમાં પાણી ઘૂસી જતાં સ્થાનિક લોકો લાચાર બન્યા છે.

વરસાદની સાથે ફૂંકાયેલા જોરદાર પવનોને કારણે મુંબઈના અલગ અલગ વિસ્તારોમાં વૃક્ષો ધરાશાયી થવાની અનેક ઘટનાઓ સામે આવી છે. વ્યસ્ત ગણાતા ચર્ચગેટ સ્ટેશન પાસે એક વિશાળ ઝાડ ધરાશાયી થતાં અફરાતફરી મચી ગઈ હતી. આ કુદરતી આફત હવે જીવલેણ સાબિત થઈ રહી છે, કારણ કે એક દિવસ પહેલા જ ચેમ્બુર વિસ્તારમાં એક સ્કૂલ બસ પર અચાનક ભારેખમ વૃક્ષ પડતાં એક વ્યક્તિનું કમકમાટીભર્યું મોત નીપજ્યું હતું, જ્યારે બસમાં સવાર અન્ય અનેક લોકો ગંભીર રીતે ઘાયલ થયા હતા. તંત્ર દ્વારા યુદ્ધના ધોરણે રસ્તા પરથી વૃક્ષો હટાવવાની અને પાણીના નિકાલની કામગીરી હાથ ધરવામાં આવી છે, પરંતુ સતત ચાલુ વરસાદ નડતરરૂપ બની રહ્યો છે.

આ આફતની વચ્ચે મુંબઈમાં કુદરતનો એક અલગ નજારો પણ જોવા મળ્યો છે. ભારે વરસાદના કારણે મુંબઈના દરિયાકિનારાના વિસ્તારોમાં અત્યંત આહ્લાદક અને રોમાંચક વાતાવરણ સર્જાયું છે. મુંબઈની જાણીતી ગિરગાંવ ચોપાટી અને મરીન ડ્રાઈવ ખાતે આ અદભુત મોસમનો આનંદ માણવા માટે મોટી સંખ્યામાં લોકો ઉમટી પડ્યા છે. હાઈટાઈડની ઉછળતી લહેરો અને વરસાદી વાછટ વચ્ચે લોકો મરીન ડ્રાઈવ પર સેલ્ફી લેતા અને મસ્તી કરતા જોવા મળ્યા હતા. એક તરફ જ્યાં મુંબઈગરાઓ માટે આ વરસાદ મુશ્કેલીઓનો પહાડ લઈને આવ્યો છે, તો બીજી તરફ પ્રકૃતિપ્રેમીઓ માટે તે ચોમાસાની મજા માણવાની ઉત્તમ તક બની ગયો છે.

બ્યુરો રિપોર્ટ જીએસટીવી