એશિયા કપ પહેલા આ પાકિસ્તાની ખેલાડીએ લીધી નિવૃત્તિ, દરરોજ 150 છગ્ગા મારવાનો કર્યો હતો દાવો
છેલ્લું અપડેટ : 02 Sept 2025
એશિયા કપ 2025 શરૂ થાય તે પહેલા પાકિસ્તાન ક્રિકેટ ટીમમાંથી એક મોટા સમાચાર મળ્યા છે. લાંબા સમયથી ટીમની બહાર રહેલા આ વિસ્ફોટક બેટ્સમેનએ આંતરરાષ્ટ્રીય ક્રિકેટને અલવિદા કહી દીધું છે. 33 વર્ષીય આસિફ અલીએ સોમવાર, 1 સપ્ટેમ્બરના રોજ સોશિયલ મીડિયા પર પોસ્ટ કરીને નિવૃત્તિની જાહેરાત કરી હતી.
તેણે લખ્યું, "આજે હું આંતરરાષ્ટ્રીય ક્રિકેટમાંથી નિવૃત્તિ લઈ રહ્યો છું. પાકિસ્તાનની જર્સી પહેરીને દેશનું પ્રતિનિધિત્વ કરવું એ મારા જીવનનું સૌથી મોટું સન્માન રહ્યું છે. ક્રિકેટના મેદાન પર મારા સાથી ખેલાડીઓ, કોચ અને ફેન્સ તરફથી મળેલા પ્રેમ માટે હું આભારી છું."
2018માં ડેબ્યુ
આસિફ અલીએ 2018માં પાકિસ્તાન માટે ડેબ્યુ કર્યું, પહેલા T20માં અને પછી બે મહિના પછી ODI ક્રિકેટમાં. તેને પાવર હિટર અને ફિનિશર તરીકે ટીમમાં સ્થાન આપવામાં આવ્યું હતું. શરૂઆતમાં, તેણે કેટલીક ઈનિંગ્સમાં શાનદાર રમત દર્શાવી હતી, પરંતુ પછી સતત નિષ્ફળ રહ્યો. તે છેલ્લા બે વર્ષથી નેશનલ ટીમની બહાર હતો અને તેની વાપસીની આશાઓ ઓછી થતી જોઈને તેણે હવે નિવૃત્તિ લઈ લીધી છે.
'150 છગ્ગા' નું નિવેદન ચર્ચામાં આવ્યું
તેની વિસ્ફોટક બેટિંગ માટે જાણીતા આસિફે દાવો કર્યો હતો કે તે દરરોજ નેટમાં 150 છગ્ગા મારે છે. આ નિવેદનથી તે ચર્ચામાં આવ્યો હતો અને ફેન્સને તેની પાસેથી મોટા શોટની અપેક્ષાઓ હતી. જોકે, તે મેદાન પર આ દાવા મુજબ પ્રદર્શન નહતો કરી શક્યો.
ભારત સામે નિષ્ફળ રહ્યો હતો
2022માં રમાયેલા એશિયા કપમાં આસિફ અલીને તક મળી હતી. અફઘાનિસ્તાન સામે મેચવિનિંગ ઈનિંગ બાદ તેનું બેટ શાંત રહ્યું. ભારત સામેની બે મેચમાં, તેણે 15 બોલમાં 25 રન બનાવ્યા હતા, જ્યારે 2022ના T20 વર્લ્ડ કપમાં, તે ટીમ ઈન્ડિયા સામે માત્ર 2 રન બનાવીને પવેલિયન પાછો ફર્યો હતો. ત્યારથી, તેની ટીકા થવા લાગી હતી.
આસિફ અલીની કારકિર્દી
આસિફ અલીની કારકિર્દી તેના દાવા મુજબની અપેક્ષાઓ પર ખરી નથી ઉતરી. તેણે પાકિસ્તાન માટે કુલ 79 આંતરરાષ્ટ્રીય મેચ રમી.
- T20I - 58 મેચ, 577 રન, એવરેજ 15, સ્ટ્રાઇક રેટ 133
- ODI - 21 મેચ, 382 રન, એવરેજ 25
આસિફે એપ્રિલ 2022માં તેની છેલ્લી ODI અને ઓક્ટોબર 2023માં તેની છેલ્લી T20I મેચ રમી હતી. ત્યારથી તે નેશનલ ટીમમાંથી બહાર હતો અને ફરીથી પસંદગીની શક્યતાઓ ઓછી થતી જોઈને તેણે ક્રિકેટમાંથી નિવૃત્તિ લેવાનો નિર્ણય લીધો.
