VIDEO: IND vs ENG / ભારતીય કેપ્ટન શુભમન ગિલે જણાવ્યું ત્રીજી ODI હારવાનું કારણ, જાણો કોના પર ફોડ્યું હારનું ઠીકરું
છેલ્લું અપડેટ : 20 Jul 2026
ઈંગ્લેન્ડ સામે લંડનના લોર્ડ્સ ક્રિકેટ ગ્રાઉન્ડ પર રમાયેલી ત્રીજી ODI મેચમાં ભારતીય ટીમને 27 રનથી પરાજયનો સામનો કરવો પડ્યો છે. ઈંગ્લેન્ડ તરફથી મળેલા 388 રનના વિશાળ લક્ષ્યાંકનો પીછો કરતા ભારતીય ટીમ 50 ઓવરમાં 7 વિકેટ ગુમાવીને 360 રન જ બનાવી શકી હતી. આ હાર સાથે જ ભારતે T20 બાદ 3 મેચોની ODIસિરીઝ પણ 1-2થી ગુમાવી દીધી છે. મેચ બાદ ભારતીય કેપ્ટન શુભમન ગિલે ટીમની હાર માટે સ્પષ્ટપણે બોલર્સના ખરાબ પ્રદર્શનને જવાબદાર ઠેરવ્યું છે.
છેલ્લી 3 ઓવરમાં મચેલી તબાહી નડી ગઈ
પોસ્ટ મેચ પ્રેઝન્ટેશનમાં કેપ્ટન શુભમન ગિલે સ્વીકાર્યું કે અંતિમ ઓવર્સમાં બોલર્સે લુટાવેલા રન ટીમને ભારે પડ્યા હતા. શુભમન ગિલે જણાવ્યું, "મને લાગે છે કે 45મી ઓવર સુધી અમે મેચમાં મજબૂત સ્થિતિમાં બનેલા હતા. પરંતુ અમે છેલ્લી 3 ઓવરોમાં ખૂબ જ વધારે રન આપી દીધા. અમે આ ઓવર્સમાં લગભગ 60 રન લુટાવ્યા અને ત્યાંથી જ મેચ અમારા હાથમાંથી સરકી ગઈ."
રન ચેઝ માટે ટીમનો પ્લાન શું હતો?
ભારતીય કેપ્ટન શુભમન ગિલે રન ચેઝની રણનીતિ અંગે ખુલાસો કરતા કહ્યું કે, "હા, ચોક્કસપણે અમે વિચાર્યું હતું કે જો 40 ઓવર પછી અમારી પાસે વિકેટો બચી રહેશે, તો અમે મેચ જીતી શકીશું. જોકે, અમે રન રેટમાં પાછળ પણ રહેવા નહતા માંગતા. આ જ કારણે પાવરપ્લે પછી અમે રન બનાવવાની ગતિ વધારી અને રન રેટને 6 કે 6.5ની આસપાસ જાળવી રાખી. જો અમે 6 કે 6.5ની એવરેજથી રમીને અંતિમ 10 ઓવરમાં 100-110 રન બનાવ્યા હોત, તો પરિણામ કંઈપણ હોઈ શકતું હતું."
પાવરપ્લેમાં પણ બોલિંગ રહી ફ્લોપ
શુભમન ગિલના મતે આ સિરીઝમાં બોલર્સનું પ્રદર્શન અત્યંત નિરાશાજનક રહ્યું છે. તેણે ઉમેર્યું, "આ સિરીઝમાં લગભગ તમામ બેટ્સમેનોએ રન બનાવ્યા છે. પરંતુ આ મેચમાં અમે સારી બોલિંગ ન કરી, ખાસ કરીને પાવરપ્લેમાં. પાવરપ્લે દરમિયાન અમે ઘણા ખરાબ બોલ ફેંક્યા, જેનો ફાયદો ઉઠાવીને ઈંગ્લેન્ડના બંને ઓપનર્સે શાનદાર બેટિંગ કરી અને અમને મેચમાં વાપસી કરવાની કોઈ તક જ ન આપી. ત્યારબાદ ડેથ ઓવર્સમાં પણ તેઓ અમારાથી ઘણું આગળ નીકળી ગયા."
રોહિત-વિરાટની બેટિંગના કર્યા જોરદાર વખાણ
મેચમાં રોહિત શર્માના 138 રન અને વિરાટ કોહલીના 74 રનની ઈનિંગ્સ અંગે વાત કરતા શુભમન ગિલે કહ્યું, "રોહિત અને વિરાટે છેલ્લા કેટલાક વર્ષોમાં દુનિયાના અલગ-અલગ દેશોમાં શાનદાર પ્રદર્શન કર્યું છે. રોહિત ભાઈએ આ મુકાબલામાં જે રીતે બેટિંગ કરી તેનાથી હું ઘણો ખુશ છું. અંતમાં વિકેટ થોડી ધીમી થઈ ગઈ હતી અને રન બનાવવા સરળ નહતા, છતાં તેમણે જે અદ્ભુત ઈનિંગ રમી તે જોવાની ખૂબ મજા આવી."
મેચનો સ્કોરકાર્ડ
મેચમાં ઈંગ્લેન્ડે પ્રથમ બેટિંગ કરતા બેન ડકેટના 141 રન, જેકબ બેથલના 91 રન અને જો રૂટની 48 બોલમાં અણનમ 74 રનની વિસ્ફોટક ઈનિંગની મદદથી 50 ઓવરમાં 3 વિકેટે 387 રન બનાવ્યા હતા. જવાબમાં ભારત તરફથી રોહિત શર્માએ 138 રન, શુભમન ગિલે 77 રન અને વિરાટ કોહલીએ 74 રનની લડાયક ઈનિંગ્સ રમી હોવા છતાં મિડલ ઓર્ડરના ધબડકાને કારણે ટીમ ઈન્ડિયા લક્ષ્યથી 27 રન દૂર રહી ગઈ હતી.
