IND vs WI દિલ્હી ટેસ્ટ: એમ્પાયર સામે બુમરાહ બોલ્યો, 'તમને ખબર છે એ આઉટ હતો...'
છેલ્લું અપડેટ : 13 Oct 2025
ટીમ ઈન્ડિયા અને વેસ્ટ ઈન્ડિઝ વચ્ચે દિલ્હીમાં ચાલી રહેલી ટેસ્ટ મેચ દરમિયાન હાઈ વોલ્ટેજ ડ્રામા થયો હતો. જસપ્રીત બુમરાહની બોલિંગમાં વેસ્ટ ઈન્ડિઝ ખેલાડી જ્હોન કેમ્પબેલ આઉટ હોવા છતાં એમ્પાયરે આઉટ ન આપતાં બુમરાહ ભડક્યો હતો. એમ્પાયર અને બુમરાહ વચ્ચે બોલાચાલી થઈ હતી. બુમરાહે એમ્પયારને કહ્યું કે, તમને ખબર હતી કે તે આઉટ છે, તેમ છતાં તમે નોટ આઉટ આપ્યો. આનો વીડિયો અને તસવીરો સોશિયલ મીડિયા પર વાયરલ થઈ રહી છે.
શું હતી ઘટના?
નવી દિલ્હીમાં બીજી ટેસ્ટના બીજા દિવસના પ્રથમ સેશનમાં બેટર જ્હોન કેમ્પબેલ બેટિંગ કરી રહ્યો હતો, તે સમયે બુમરાહની બોલિંગમાં બોલ સ્ટમ્પની આગળ કેમ્પબેલના જમણા પેડ પર વાગ્યો હતો. જો કે, પીચ પર હાજર એમ્પાયરે બેટરની તરફેણમાં નિર્ણય સંભળાવ્યો હતો. જેથી ટીમ ઈન્ડિયાએ ડીઆરએસ (ડિસિઝન રિવ્યૂ સિસ્ટમ) લીધું હતું. જો કે, થર્ડ એમ્પાયર પણ આ મામલે નિર્ણય લેવામાં અસમંજસમાં મુકાયા હતા. અનેકવખત રિપ્લે જોયા બાદ પણ એમ્પાયર નક્કી કરી શક્યા ન હતા કે, બોલ પેડને વાગતાં પહેલાં બેટને અથડાયો હતો કે નહીં, અંતે થર્ડ એમ્પાયરે ફિલ્ડ એમ્પાયરનો કૉલ સ્વીકાર્યો હતો, અને કેમ્પબેલને નોટ આઉટ જાહેર કર્યો હતો.
એમ્પાયર સામે ભડક્યો બુમરાહ
ટેક્નોલોજીની મર્યાદાને પગલે થર્ડ એમ્પાયરે નોટ આઉટ જાહેર કર્યો. જો કે, બુમરાહ પોતાનો પક્ષ મૂકતાં ફિલ્ડ એમ્પાયર પર ભડક્યો હતો અને કહ્યું કે, તમને ખબર હતી કે, તે આઉટ છે, પણ ટેક્નોલોજી તે સાબિત કરી શકી નહીં. બુમરાહનું આ નિવેદન સ્ટમ્પના માઈકમાં રેકોર્ડ થયુ હતું. કોમેન્ટેટર્સે પણ બુમરાહની તરફેણમાં કહ્યું હતું કે, થોડું તીક્ષ્ણ નિરીક્ષણ નિર્ણય બદલી શકતુ હતું, પરંતુ તેના માટે નિર્ણાયક પુરાવા નહોતા.
કેમ્પબેલની લાઈફલાઈન ભારત પર ભારે પડી
કેમ્પબેલને લાઈફલાઈન ભારત માટે ભારે સાબિત થઈ. તેણે ટેસ્ટમાં સદી ફટકારી હતી. જો કે, બાદમાં સ્પિનર રવિન્દ્ર જાડેજાએ તેને આઉટ કર્યો હતો. કેમ્પબેલને બીજી વખત લાઈફ લાઈન મળી નહીં. ટીમ ઈન્ડિયાએ પાંચ વિકેટમાં 518 રન ફટકાર્યા બાદ ફર્સ્ટ ઈનિંગમાં વેસ્ટ ઈન્ડિઝ 248 રને રનઆઉટ થઈ હતી.
