શેફાલી વર્મા સામે ICCની એક્શન, ઝિમ્બાબ્વે સામેની મેચમાં કેચ છોડ્યા બાદ ગુસ્સે થવાની સજા મળી

ભારતીય મહિલા ક્રિકેટ ટીમની સ્ટાર બેટ્સમેન શેફાલી વર્માને ઝિમ્બાબ્વે સામેની બીજી T20I મેચ દરમિયાન ICC આચારસંહિતાનું ઉલ્લંઘન કરવા બદલ સત્તાવાર રીતે ચેતવણી આપવામાં આવી છે. તેના શિસ્ત રેકોર્ડમાં એક ડિમેરિટ પોઈન્ટ પણ ઉમેરવામાં આવ્યો છે. આ ઘટના 18 ઓક્ટોબરના રોજ રાયપુરમાં રમાયેલી મેચ દરમિયાન બની હતી. ICC અનુસાર, શેફાલીએ ખેલાડીઓ અને ખેલાડી સહાયક કર્મચારીઓ માટે આચારસંહિતાના લેવલ 1નું ઉલ્લંઘન કર્યું હતું. તેણી પર કલમ ​​2.2 હેઠળ ગુનો નોંધવામાં આવ્યો હતો, જે આંતરરાષ્ટ્રીય મેચ દરમિયાન મેદાન પર ક્રિકેટ સાધનો, કપડા અથવા અન્ય સામગ્રીના દુરુપયોગ સાથે સંબંધિત છે.

કેચ છોડ્યા પછી ગુસ્સામાં બોલ ફેંક્યો

પ્રથમ ઈનિંગની 12મી ઓવરમાં ભારતની બોલિંગ દરમિયાન આ ઘટના બની હતી. શેફાલી વર્માએ શ્રી ચરણીની બોલ પર મિડ-ઓફ પર ચિપો મુગેરી-તિરિપાનોનો કેચ છોડ્યો. આનાથી હતાશ થઈને શેફાલીએ ગુસ્સામાં બોલ જમીન પર ફેંકી દીધો. આ વર્તનને આચારસંહિતાનું ઉલ્લંઘન માનવામાં આવ્યું. શેફાલીએ પોતાની ભૂલ સ્વીકારી અને ICC મેચ રેફરી પેનલના જીએસ લક્ષ્મી દ્વારા પ્રસ્તાવિત દંડ સ્વીકાર્યો છે. આથી  ઔપચારિક સુનાવણીની જરૂર નહતી. છેલ્લા 24 મહિનામાં આ તેનું પહેલું ઉલ્લંઘન હતું.

જો ડિમેરિટ પોઈન્ટ વધે તો પ્રતિબંધ લાદવામાં આવી શકે છે

ICCના નિયમો અનુસાર, જો કોઈ ખેલાડી 24 મહિનાના સમયગાળામાં ચાર કે તેથી વધુ ડિમેરિટ પોઈન્ટ મેળવે છે, તો તેને સસ્પેન્શન પોઈન્ટમાં રૂપાંતરિત કરવામાં આવે છે. બે સસ્પેન્શન પોઈન્ટ મળવાથી એક ટેસ્ટ, બે ODI અથવા બે T20I મેચ, જે પણ પહેલા આવે તેમાં પ્રતિબંધ લાગી શકે છે. ડિમેરિટ પોઈન્ટ 24 મહિના સુધી ખેલાડીના શિસ્ત રેકોર્ડ પર રહે છે. આ સમયગાળા પછી તે રેકોર્ડમાંથી દૂર કરવામાં આવે છે.

ભારતે સિરીઝ જીતી

રાયપુર મેદાન પર બનેલી ઘટના છતાં, શેફાલીનું બેટ બીજી T20Iમાં ચાલ્યું હતું. તેણે માત્ર 25 બોલમાં 55 રનની ધમાકેદાર ઈનિંગ રમી અને ભારતની જીતમાં મુખ્ય ભૂમિકા ભજવી. પહેલી T20Iમાં કઠિન સંઘર્ષનો સામનો કર્યા પછી ભારતીય ટીમે બીજી મેચમાં જોરદાર પ્રદર્શન કર્યું. પહેલા બેટિંગ કરતા ઝિમ્બાબ્વેએ 102 રનમાં આઠ વિકેટ ગુમાવી દીધી. જવાબમાં, ભારતે નવમી ઓવર સુધીમાં ટાર્ગેટ ચેઝ કરી લીધો અને સિરીઝમાં 2-0 થી અજેય લીડ મેળવી લીધી. બંને ટીમો વચ્ચે ત્રીજી T20I મેચ 20 ઓક્ટોબરે રાયપુરમાં રમાશે.