વૈભવ સૂર્યવંશીએ ધમાકેદાર બેટિંગ છતાં તકની રાહ જોવી પડશે, ગંભીરે કહ્યું- સોશિયલ મીડિયા નહીં નક્કી કરે પ્લેઈંગ ઈલેવન
છેલ્લું અપડેટ : 06 Oct 2026
15 વર્ષનો વૈભવ સૂર્યવંશી પોતાની પ્રતિભા અને તોફાની બેટિંગથી ભારતીય ક્રિકેટમાં ચર્ચાનો વિષય બની ગયો છે, પરંતુ વેસ્ટ ઈન્ડિઝ સામે શરૂ થતી પાંચ T20ની સિરીઝમાં પણ તેને પ્લેઈંગ ઈલેવનમાં સ્થાન મેળવવા માટે રાહ જોવી પડી શકે છે. ભારતીય ટીમના મુખ્ય કોચ ગૌતમ ગંભીરે સૂર્યવંશી સાથે થયેલી વાતચીતનો ખુલાસો કરતાં કહ્યું છે કે સારા ફોર્મમાં હોવા છતાં અગાઉથી સારું પ્રદર્શન કરનારા ખેલાડીઓના કારણે યુવા બેટરને તક માટે રાહ જોવી પડશે.
સોશિયલ મીડિયાથી નક્કી નહીં થાય ભારતની પ્લેઈંગ ઈલેવન
સૂર્યવંશીએ તાજેતરમાં એશિયન ગેમ્સમાં પણ પોતાની ક્ષમતા બતાવી હતી. શ્રીલંકા સામેની સેમીફાઈનલમાં તેણે મુશ્કેલ પિચ પર માત્ર 21 બોલમાં 38 રન કર્યા હતા. પાકિસ્તાન સામેની ગોલ્ડ મેડલ મેચમાં તેણે 15 રન કર્યા હતા. ઝિમ્બાબ્વે સામેની T20 સિરીઝમાં તે બે અડધી સદી ફટકારી ચૂક્યો છે. આ પહેલા તે ભારતનો સૌથી નાની ઉંમરે આંતરરાષ્ટ્રીય ક્રિકેટ રમનાર ખેલાડી બન્યો હતો. સૂર્યવંશીની બેટિંગે સોશિયલ મીડિયા પર જબરદસ્ત ચર્ચા જગાવી છે. ક્રિકેટ પ્રેમીઓમાં એક વર્ગ ઈચ્છે છે કે તેને અભિષેક શર્મા સાથે ઓપનિંગમાં મોકલવામાં આવે. પરંતુ ગંભીરનું કહેવું છે કે સોશિયલ મીડિયા કે બહારનું દબાણ ભારતીય ટીમની પ્લેઈંગ ઈલેવન નક્કી નહીં કરી શકે.
વૈભવને ટીમમાં સામેલ કરવો હોય તો કોને બહાર બેસાડવો?
કોચ અને કેપ્ટન મેદાન પર મેચ જીતવા માટે જે ખેલાડીઓ અને જે સંયોજનને શ્રેષ્ઠ માને તેના આધારે ટીમ પસંદ કરવામાં આવશે. માત્ર લોકપ્રિયતા કે બહારની ચર્ચાના આધારે નિર્ણય નહીં લેવાય. ગંભીરે એક મહત્ત્વપૂર્ણ મુદ્દો પણ ઉઠાવ્યો છે ‘જો સૂર્યવંશીને રમાડવો હોય તો કોને બહાર બેસાડવો? અભિષેક કે સંજુ? બંનેએ ભારતની T20 સફળતામાં નોંધપાત્ર યોગદાન આપ્યું છે. એટલે એક યુવા પ્રતિભાને તક આપવા માટે સ્થાપિત અને સફળ સંયોજનને અચાનક તોડી નાખવું સરળ નિર્ણય નથી.’
