RCB માથે મોટું સંકટ! ટીમ પર લાગી શકે છે એક વર્ષ માટે પ્રતિબંધ?
છેલ્લું અપડેટ : 10 Jun 2025
રોયલ ચેલેન્જર્સ બેંગ્લુરૂ (RCB) માટે ઇન્ડિયન પ્રીમિયર લીગ (IPL) 2025નું પહેલું ટાઇટલ લઈને આવ્યું, પરંતુ તેની ઉજવણી ટીમ માટે ભારે પડી. IPL જીત્યાના એક દિવસ પછી બેંગ્લુરૂમાં ઉજવણી કરવામાં આવી હતી, જેમાં ભાગદોડ મચી ગઈ હતી જેમાં 10થી વધું લોકોના મોત થયા હતા. ઓછામાં ઓછા 33 લોકો ઘાયલ પણ થયા હતા. આ અકસ્માતે RCB અને ભારતીય ક્રિકેટ બોર્ડ (BCCI)ને મુશ્કેલીમાં મુકી દીધા છે. સોશિયલ મીડિયા પર એવો દાવો કરવામાં આવી રહ્યો છે કે જો આ અકસ્માતમાં RCB મેનેજમેન્ટની બેદરકારી સાબિત થાય છે, તો ટીમ પર એક વર્ષ માટે પ્રતિબંધ મૂકવામાં આવી શકે છે. જો આવું થાય તો RCB IPL 2026 માંથી બહાર થઈ જશે.
બેંગલુરુમાં થયેલી ભાગદોડ બાદ પોલીસે RCB, ઇવેન્ટ મેનેજમેન્ટ કંપની DNA એન્ટરટેઈનમેન્ટ અને કર્ણાટક સ્ટેટ ક્રિકેટ એસોસિએશન (KSCA) વિરુદ્ધ FIR દાખલ કરી છે. RCBના માર્કેટિંગ હેડ નિખિલ સોસાલેની ધરપકડ કરવામાં આવી છે. KSCAના બે અધિકારીઓએ રાજીનામું આપી દીધું છે. એવું કહેવામાં આવી રહ્યું છે કે RCB મેનેજમેન્ટે વિજય પરેડની જાહેરાત કરી હતી પરંતુ તેના માટે નિયમોનું પાલન કરવામાં આવ્યું ન હતું. કદાચ આ જ કારણ છે કે પોલીસે તેના માટે પરવાનગી આપી ન હતી. પરંતુ જ્યારે પોલીસે પરવાનગી ન આપવાની માહિતી બહાર આવી ત્યાં સુધીમાં લાખો લોકો એમ ચિન્નાસ્વામી સ્ટેડિયમ તરફ આગળ વધવા લાગ્યા હતા. પોલીસ પર પણ ભીડ વ્યવસ્થાપનમાં બેદરકારીનો આરોપ છે.
હવે સોશિયલ મીડિયા પર એવા અહેવાલો છે કે જો RCB મેનેજમેન્ટ દોષિત સાબિત થાય છે, તો ટીમ પર એક વર્ષ માટે પ્રતિબંધ મૂકવામાં આવી શકે છે. જોકે, BCCI એ આ મામલે કોઈ સત્તાવાર નિવેદન જારી કર્યું નથી. સૂત્રોના જણાવ્યા અનુસાર, જો RCBની બેદરકારી સાબિત થાય છે, તો બોર્ડને કડક નિર્ણય લેવો પડી શકે છે.
IPLના 18 વર્ષના ઇતિહાસમાં બે ટીમો ચેન્નાઈ સુપર કિંગ્સ અને રાજસ્થાન રોયલ્સ પર અગાઉ પણ પ્રતિબંધ મૂકવામાં આવ્યો છે, પરંતુ કારણ કંઈક બીજું હતું. સ્પોટ ફિક્સિંગને કારણે 2015માં આ બંને ટીમોને બે-બે વર્ષ માટે સસ્પેન્ડ કરવામાં આવી હતી. આવી સ્થિતિમાં RCB સામે કાર્યવાહીની શક્યતા નકારી શકાય નહીં.જોકે, લોકો સોશિયલ મીડિયા પર એવું પણ લખી રહ્યા છે કે ટીમ મેનેજમેન્ટની ભૂલ માટે તેને સજા ન આપી શકાય. આમ કરવું ખોટું હશે. કેટલાક નિષ્ણાતો કહે છે કે આ ઘટના RCBની એક ખાનગી ઘટના હતી. આમાં BCCIની જવાબદારી મર્યાદિત છે પરંતુ લીગની વિશ્વસનીયતાને કારણે બોર્ડ દબાણ હેઠળ છે.
