રણજી ટ્રોફીમાં પ્રવેશ કરે છે ઓસ્ટ્રેલિયન અમ્પાયર, જાણો કોણ છે બેન ટ્રેલોર, જે ભારતમાં કામ કરશે

ભારત અને ઓસ્ટ્રેલિયા વચ્ચેના અમ્પાયર એક્સચેન્જ પ્રોગ્રામ હેઠળ એક ઓસ્ટ્રેલિયન અમ્પાયર રણજી ટ્રોફી મેચોમાં અમ્પાયરિંગ કરશે. એક ભારતીય અમ્પાયર ઓસ્ટ્રેલિયામાં ઘરેલુ ક્રિકેટ મેચોમાં અમ્પાયરિંગ કરશે. ઓસ્ટ્રેલિયન અમ્પાયર બેન ટ્રેલોર ભારતમાં બે રણજી ટ્રોફી મેચોમાં અમ્પાયરિંગ કરશે. ભારતીય અમ્પાયર પ્રશાંત જોશી ઓસ્ટ્રેલિયામાં બે શેફિલ્ડ શીલ્ડ અને એક વન ડે કપ મેચમાં અમ્પાયરિંગ કરશે. ભારતમાં ટ્રેલોરનું પ્રથમ કાર્ય દિલ્હીમાં હશે. તે 18-21 ઓક્ટોબર દરમિયાન દિલ્હી અને ગુજરાત વચ્ચેની રણજી ટ્રોફી મેચમાં અમ્પાયરિંગ કરશે. ત્યારબાદ, તે 26-29 ઓક્ટોબર દરમિયાન મુંબઈમાં મુંબઈ અને હરિયાણા વચ્ચેની મેચમાં પણ અમ્પાયરિંગ કરશે.

બ્રેઈન ટ્રેલોર કોણ છે?

બેન ટ્રેલોરને 30 ફર્સ્ટ-ક્લાસ ક્રિકેટ મેચ, 20 લિસ્ટ A મેચ અને 39 બિગ બેશ લીગ મેચોમાં અમ્પાયરિંગનો અનુભવ છે. તેણે બે મહિલા ODI અને ચાર મહિલા T20I મેચોમાં પણ અમ્પાયરિંગ કર્યું છે. અમ્પાયરિંગ ઉપરાંત, ટ્રેલોર ક્રિકેટ ન્યૂ સાઉથ વેલ્સ માટે અમ્પાયર એજ્યુકેશન ઓફિસર પણ છે. તેઓ ભવિષ્યના મેચ અધિકારીઓને ટ્રેનિંગ આપે છે અને વિકસાવે છે. અમ્પાયર શિક્ષણમાં તેના કાર્ય માટે તેને ન્યૂ સાઉથ વેલ્સ ક્રિકેટ અમ્પાયર્સ અને સ્કોરર્સ એસોસિએશન તરફથી ચાર જ્યોર્જ બોરવિક મેમોરિયલ એવોર્ડ્સ મળ્યા છે.

પ્રશાંત જોશી કોણ છે?

ભારતીય અમ્પાયર પ્રશાંત જોશીને સ્થાનિક ક્રિકેટમાં અમ્પાયરિંગનો ઘણો અનુભવ છે. તેણે રણજી ટ્રોફી અને દુલીપ ટ્રોફીમાં 19 ફર્સ્ટ-ક્લાસ મેચ, વિજય હજારે ટ્રોફી અને દેવધર ટ્રોફીમાં 32 લિસ્ટ A મેચ અને 40 T20 મેચમાં અમ્પાયરિંગ કર્યું છે. તેના T20 કાર્યોમાં ઈન્ડિયન પ્રીમિયર લીગ (IPL) અને સૈયદ મુશ્તાક અલી ટ્રોફીના મેચોનો પણ સમાવેશ થાય છે. જોશીનો ઓસ્ટ્રેલિયન પ્રવાસ 11થી 14 નવેમ્બર દરમિયાન ગાબા ખાતે ક્વીન્સલેન્ડ અને તાસ્માનિયા વચ્ચેની શેફિલ્ડ શીલ્ડ મેચથી શરૂ થશે. ત્યારબાદ, તે 16 નવેમ્બરે તે જ મેદાન પર બંને ટીમો વચ્ચે વન ડે કપ મેચમાં અમ્પાયરિંગ કરશે. તેનો એક્સચેન્જ પ્રોગ્રામ 22થી 25 નવેમ્બર દરમિયાન સિડની ક્રિકેટ ગ્રાઉન્ડ ખાતે ન્યૂ સાઉથ વેલ્સ અને ક્વીન્સલેન્ડ વચ્ચેની શેફિલ્ડ શીલ્ડ મેચ સાથે સમાપ્ત થશે.