આજથી શક્તિ આરાધનાના પર્વ આસો નવરાત્રિનો આરંભ; જાણો ખરીદી અને પૂજનના શુભ મુહૂર્ત
છેલ્લું અપડેટ : 11 Oct 2026
આદ્યશક્તિ જગદંબાની આરાધનાના મહા પર્વ આસો નવરાત્રિના ઘટસ્થાપન, પૂજન અને વિજયાદશમી(દશેરા)ના શાસ્ત્રોક્ત મુહૂર્તોનું વિશેષ મહત્ત્વ છે. જ્યોતિષાચાર્ય ડૉ. હેમીલ પી. લાઠીયાએ આપેલી વિગતો અનુસાર, આ વર્ષે નવરાત્રિ મહા પર્વની શરૂઆત 11 ઑક્ટોબર, રવિવારના રોજ (આસો સુદ એકમ) થશે. જ્યારે તેની સમાપ્તિ 19 ઑક્ટોબર, સોમવારના રોજ (આસો સુદ નોમ) થશે.
ચિત્રા નક્ષત્ર અને વૈધૃતિ યોગ વચ્ચે ઘટસ્થાપન મુહૂર્ત
11 ઑક્ટોબર 2026(આસો સુદ 1)ના રોજ ચિત્રા નક્ષત્ર અને વૈધૃતિ યોગ છે. તંત્ર ગ્રંથો જેવાં કે ચંડી રહસ્ય, ચંડી તંત્ર, રુદ્ર યામલ તંત્ર, ભવાની તંત્ર અને દુર્ગા કલ્પતરુ અનુસાર આ સમયગાળામાં સ્થાપન વર્જ્ય ગણાય છે. જો કે, ‘નિર્ણયસિંધુ’ ગ્રંથના વિધાન મુજબ પ્રથમ પ્રહર છોડીને ઘટ સ્થાપન કરી શકાય છે.
સવારનું ઘટસ્થાપન મુહૂર્ત: રવિવાર, 11 ઑક્ટોબર 2026ના રોજ સવારે 09:40થી 12:25 વાગ્યા સુધી.
સંધ્યા સમયનું મુહૂર્ત: ચંડી તંત્ર, ચંડી રહસ્ય અને ભવાની તંત્ર મુજબ સાંજે 06:20થી 07:40 વાગ્યા સુધી.
નોંધ: મત્સ્ય પુરાણના નિયમ અનુસાર રાત્રિના સમયે ઘટસ્થાપન કરવું નહીં.
હોમાષ્ટમી, ઉપવાસ અને મહાનવમીની તિથિઓ
નવરાત્રિ દરમિયાન અષ્ટમી અને નવમી તિથિના પૂજન-ઉપવાસ અંગે નીચે મુજબની વિગતો દર્શાવાઈ છે:
હોમાષ્ટમી: 18 ઑક્ટોબર 2026, રવિવારના રોજ સવારે 08:30 વાગ્યાથી.
મહાષ્ટમી/મહાનવમી ઉપવાસ: 19 ઑક્ટોબર 2026, સોમવારના રોજ સવારે 10:53 વાગ્યાથી.
ઘટ ઉત્થાપન મુહૂર્ત
દેવી તંત્ર અને કાલી વિલાસ તંત્ર ગ્રંથ મુજબ શ્રવણ નક્ષત્રમાં ઘટ ઉત્થાપન કરવાનું વિધાન છે.
તારીખ અને સમય: 19 ઑક્ટોબર 2026, સોમવાર (આસો સુદ 9, શ્રવણ નક્ષત્ર) ના રોજ બપોરે 03:40થી 05:30 વાગ્યા સુધી.
દશેરા / વિજયાદશમી પૂજન અને ખરીદીના મુહૂર્ત
આસો સુદ 10, મંગળવાર 20 ઑક્ટોબર 2026ના રોજ વિજયાદશમી (દશેરા)ની ઉજવણી કરાશે. આ દિવસે વાહન, સોના-ચાંદી, ચોપડા પૂજન કે નવી વસ્તુઓની ખરીદી માટે નીચે મુજબના શુભ મુહૂર્ત રહેશે:
બપોરનું મુહૂર્ત: 12:55થી 01:10 વાગ્યા સુધી.
બપોર પછીનું શુભ મુહૂર્ત: 03:20થી સાંજે 06:05 વાગ્યા સુધી.
