આજથી IndiGo ની ફ્લાઇટ્સ મોંઘી: દિલ્હી-મુંબઈ સહિતના રૂટ્સ પર કેટલું વધ્યું ભાડું? જાણો વિગત
છેલ્લું અપડેટ : 06 Oct 2026
તહેવારોની સીઝન વચ્ચે હવાઈ મુસાફરી કરનારા પ્રવાસીઓ માટે માઠા સમાચાર આવ્યા છે. દેશની સૌથી મોટી એરલાઇન કંપની IndiGo એ પોતાના મુસાફરોને મોટો આંચકો આપતા ડોમેસ્ટિક અને ઇન્ટરનેશનલ રૂટ્સ પર ફ્યુઅલ સરચાર્જ (Fuel Surcharge) વધારવાની સત્તાવાર જાહેરાત કરી દીધી છે. આ નવો નિયમ 6 ઓક્ટોબરથી લાગુ થઈ ગયો છે.
શા માટે વધારાયા ભાડાં?
એરલાઇન દ્વારા જણાવવામાં આવ્યું છે કે તાજેતરમાં એવિએશન ટર્બાઇન ફ્યુઅલ (ATF) એટલે કે વિમાનના ઇંધણના ભાવમાં થયેલા સતત વધારાને ધ્યાનમાં રાખીને આ નિર્ણય લેવામાં આવ્યો છે. ઇંધણના વધતા ખર્ચને સરભર કરવા માટે એરલાઇને મુસાફરો પર ફ્યુઅલ સરચાર્જનો વધારાનો બોજ નાખવો પડ્યો છે.
કયા રૂટ પર કેટલો વધારો?
IndiGo ના જણાવ્યા મુજબ, નવો સરચાર્જ અંતર (Distance) ના આધારે નક્કી કરવામાં આવ્યો છે. જેમાં
ડોમેસ્ટિક ફ્લાઇટ્સ: સ્થાનિક રૂટો પર અંતર અનુસાર ફ્યુઅલ સરચાર્જમાં પ્રતિ ટિકિટ આશરે ₹100 થી ₹350 સુધીનો વધારો ઝીંકાયો છે.
મેટ્રો રૂટ્સ: દિલ્હી, મુંબઈ, બેંગલુરુ, કોલકાતા અને ચેન્નાઈ જેવા મુખ્ય મેટ્રો શહેરો વચ્ચે મુસાફરી કરતા લોકોને હવે બેઝ ફેર ઉપરાંત વધારે સરચાર્જ ચૂકવવો પડશે. જેમાં લાંબા અંતરની અને આંતરરાષ્ટ્રીય ફ્લાઇટ્સ પર આ વધારો અંતર મુજબ વધુ હોઈ શકે છે.
મુસાફરોના બજેટ પર પડશે અસર
દિવાળી અને આગામી તહેવારોની રજાઓ દરમિયાન લોકો મોટી સંખ્યામાં પ્રવાસનું પ્લાનિંગ કરી રહ્યા છે, ત્યારે IndiGo ના આ પગલાથી સામાન્ય મુસાફરોના ખિસ્સા પર સીધી અસર પડશે. એવિએશન નિષ્ણાતોનું માનવું છે કે IndiGo બાદ અન્ય એરલાઇન કંપનીઓ પણ આગામી દિવસોમાં પોતાના ફ્યુઅલ સરચાર્જમાં વધારો કરી શકે છે, જેના કારણે એકંદરે હવાઈ મુસાફરી વધુ મોંઘી બનશે.