VIDEO: જો તમારું બાળક ક્લાસ ટેસ્ટના નામથી ડરે છે તો આ ટિપ્સ દૂર કરશે તેમની 'Test Anxiety'
છેલ્લું અપડેટ : 09 Apr 2026
ઘણા બાળકો માટે સ્કૂલ ટેસ્ટ કોઈ ડરામણા સપનાથી ઓછી નથી હોતી. ઘણીવાર ગભરાટ અને સ્ટ્રેસના કારણે તેઓ એ પણ ભૂલી જાય છે, જે તેમને બરાબર યાદ હોય છે. આવી સ્થિતિમાં વાલી તરીકે તમે તેમની અંદર બેઠેલી આ 'ટેસ્ટ એન્ઝાયટી' ને ઓછી કરવામાં મહત્વની ભૂમિકા ભજવી શકો છો. ચાલો જાણીએ કે બાળકોના આ ડરને ઓછો કરવામાં તમે કેવી રીતે મદદ કરી શકો.
ટેસ્ટ પ્રત્યેનો દ્રષ્ટિકોણ બદલો
અવારનવાર બાળકો એટલે ડરતા હોય છે કારણ કે તેમને લાગે છે કે જો ટેસ્ટમાં સારા માર્ક્સ નહીં આવે, તો સ્કૂલમાં અને ઘરે તેમને ઠોઠ સમજવામાં આવશે. તેમને સમજાવો કે ટેસ્ટ માત્ર એ જાણવાની રીત છે કે તેમણે અત્યાર સુધી શું શીખ્યું છે અને કયા વિષયોમાં વધુ સુધારાની જરૂર છે. ટેસ્ટને હાર-જીતના બદલે શીખવાની પ્રક્રિયાનો એક ભાગ ગણાવો.
સાથે મળીને સ્ટડી પ્લાન બનાવો
ડરનું એક મોટું કારણ સિલેબસ પૂરો ન થવો અથવા છેલ્લા સમયની ભાગદોડ હોય છે. પરીક્ષાના થોડા દિવસો પહેલા જ એક સરળ ટાઈમ-ટેબલ બનાવો. મોટા પ્રકરણોને નાના-નાના ભાગમાં વહેંચી દો. જ્યારે બાળક નાના લક્ષ્યો પૂરા કરે છે, ત્યારે તેનો આત્મવિશ્વાસ વધે છે અને ડર ઓછો થવા લાગે છે.
હકારાત્મક વાતચીતને પ્રોત્સાહન આપો
બાળકોને અવારનવાર એવો ડર રહે છે કે તેઓ ભણેલું બધું ભૂલી જશે અથવા તેમને કંઈ આવડતું નથી. આ નકારાત્મકતા તેમના તણાવને વધારે છે. તેમને પોઝિટિવ વાતો કરવા માટે પ્રોત્સાહિત કરો અને તમે પોતે પણ તેમની સાથે હકારાત્મક વાતો કરો. આનાથી તેમનો કોન્ફિડન્સ વધશે.
રિલેક્સેશન ટેકનિક શીખવો
ગભરાટના શારીરિક લક્ષણો જેમ કે પરસેવો આવવો કે હૃદયના ધબકારા તેજ થવા બાળકને વધુ ડરાવી દે છે. તેમને ઊંડા શ્વાસ લેવાની પ્રેક્ટિસ કરાવો. તેમને શીખવો કે જો એક્ઝામ હોલમાં ડર લાગે, તો ૨ મિનિટ માટે આંખો બંધ કરે અને ઊંડા શ્વાસ લે. આનાથી મગજ શાંત થાય છે અને યાદશક્તિ વધુ સારી રીતે કામ કરે છે.
પૂરતી ઊંઘ અને ખાનપાનનું ધ્યાન રાખો
અધૂરી ઊંઘ અને ખાલી પેટ મગજની કામ કરવાની ક્ષમતા ઘટાડી દે છે, જેનાથી તણાવ વધે છે. તેથી ખાતરી કરો કે ટેસ્ટની આગલી રાતે બાળક ઓછામાં ઓછી ૭-૮ કલાકની ઊંઘ લે. મોડી રાત સુધી જાગીને ગોખણપટ્ટી કરવાનું ટાળો. પરીક્ષાના દિવસે તેમને હળવો પણ પૌષ્ટિક નાસ્તો આપો જેથી બાળક એનર્જેટિક અનુભવી શકે.
